Logtor yir tɩbsg yɛla—Segls sẽn zems sẽn na yɩl n welg zu-loeese
1 Yʋʋmd 1990 sɩpaolg kiuugã (ne farende) la yʋʋmd 1992 bõn-bɩʋʋng kiuugã D Rĩungã Ministɛɛrã seb-paasdem kõo kɩbay sẽn na yɩl n sõng koe-moondba tɩ b welg zu-loees sẽn tõe n puki, b sẽn zãgs zɩɩm ningrã yĩnga. Yʋʋmd 1999, bõn-bɩʋʋng kiuugã D Rĩungã Ministɛɛrã Yãmb sʋgsgã leoore, seb-neng a 3, sull a 5 wã me goma yel-kãngã yelle.
2 B yiisa seb-paasdem kãngã sẽn na yɩl n kõ vẽnegr n paas kɩbay nins sẽn be sɛb nins b sẽn sõdg zugẽ wã pʋsẽ. D sagend-y lame tɩ y lebg n ges-ba, sẽn na yɩl tɩ yellã fãa yɩ vẽeneg y yamẽ wã.
3 Wakat buud fãa, d tõeeme n wa tar bãag sẽn tõe n ning sardã d sẽn dɩk kãn-kãe n na n tũ Biiblã noy zɩɩmã sõngã wɛɛngẽ wãmakr pʋgẽ. Tõnd ka minim n tagsd tɩ yell woto tõe n paam-d lame ye. Baasg zãnga, ka yam tʋʋmd tɩ d segl d mense, tɩ bala d ka mi yell a woto na n wa paam-d sɩda?
4 Bũmb ning kiris-ned sẽn segd n maan pipi yaa pʋʋs a Zeova sẽn na yɩl n paam pãng n tõog n mao ne makrã. (Yel. 3:13-16; Yɩɩl 55:2322 in NW) Yiibu, a miimi t’a tõe n teega a tẽeb saam-biisã n paam sõngr la teelgo.
5 Sard sẽn ka vigsd rɩkr yaa tɩlae: Baa yɛlã sẽn sõs n yaa to-to fãa, tõnd ned kam fãa tog n dɩka a meng sard sẽn ka vigsd n teel zɩɩma la vɩɩma sõngo. Biiblã wilgda vẽeneg tɩ Wẽnnaam sõgen dãmbã tog n laka b mens ne zɩɩm. (Tʋʋ. 15:28, 29; 21:25) Tara yõod hal kẽeng tɩ tõnd wʋm no-kãngã nens toɛ-toɛ fãa võore, sẽn na yɩl n tõog n bãng sẽn sakda, sẽn ka sakda, la bũmb ning sẽn yaa sũur kaset yell n bake. Yaa tõnd sẽn na n dɩk sard sẽn ka vigsd logtoɛɛmbã taoorã n wilgd tɩ tõnd sakda Wẽnnaam no-kãngã. Tõnd sã n maan sãmb-sãmb bilf bala, naoor wʋsgo b geta rẽ wala bũmb sẽn wilgd tɩ d tõe n sak n kɩɩsame, tɩ ne rẽ bɩ b paam sor n ning zɩɩmã.—1 Pɩɛ. 5:8-10; Yel. 29:25; Mat. 16:25.
6 Logtor yirẽ kɩbay kʋmbg tʋʋmd sulã la Logtor yirẽ wʋm-taab sula: Sẽn na yɩl n sõng b rãmb nins sẽn baood sõngr b sã n wa seg zu-loɛɛg sẽn tɩ loe ne zɩɩm ningrã, Sosiete wã lugla Logtor yirẽ kɩbay kʋmbg tʋʋmd sul Brooklyn la a filiall dãmbẽ wã yʋʋmd 1998, yʋʋm-vẽkr kiuugã. A leb n lugla Logtor yirẽ wʋm-taab sul b sẽn kʋmsd ne nasarend tɩ SEƐLAS (C.L.H.) galʋ-tẽn-kãsems wʋsg sẽn yɩɩd pʋsẽ dũniyã gill zugu. Logtor yirẽ kɩbay kʋmbg tʋʋmd sullã sɩnga tʋʋmd Kodivoaar yʋʋmd 1993 tɛka. A geta Logtor yirẽ wʋm-taab sul a tãabo (Abidzã, Buake la Ma), sẽn tar kẽem dãmb 14 b sẽn kõ zãmsg zall tʋʋmde. A leb n geta sul a woto buud a yiibu (Bobo Diulaso la Waogdgo), sẽn tar kẽem dãmb a yoob tʋʋmd yelle.
7 Logtor yirẽ kɩbay kʋmbg tʋʋmd sulã vaeesda logtoeemd zʋrno rãmb sẽn yɩɩd 3 600 dũniyã gill zug sẽn na yɩl n bãng woperasiõ la tɩbsg sẽn ka tũnugd ne zɩɩm sẽn be, la b sõmblem sẽn yaa to-to. Logtor yirẽ kɩbay kʋmbg tʋʋmd sull ning sẽn be Brooklynã kʋmbdame la b tũusd kɩbay kãensã tɩ rẽ poor bɩ a tool-b filiall fãa Logtor yirẽ kɩbay kʋmbg tʋʋmd sulli. Rẽ poore, filiallã sull taasda kɩba-kãens Logtor yirẽ wʋm-taab sulã, logtor yiy la logtoɛɛmb kẽere. (Wakat ninga Logtor yirẽ kɩbay kʋmbg tʋʋmd sullã toola logtoeemd sɛb sẽn wilgd bũmb ning b sẽn tõe n maan n ka tũnug ne zɩɩm, tɩ tõog n saas tak-tɩ-m-tak logtor yir ningã pʋgẽ.) Wakat fãa a togsda tʋʋmd sulã bʋʋd d sẽn tõoge, sẽn na n sõng bʋ-kaoodbã tɩ b vaees tõnd yɛlã ne yam-welgr n paase. A leb n tara logtoɛɛmb sẽn sakd n lagem n tʋm yʋy sẽn na yɩl tɩ tʋʋmd sulã sɛb zems ne wakatã tɩ b tõog n dɩk n tʋm, zu-loɛɛg sẽn tɩ loe ne zɩɩm ningr sã n puki. Rũndã woto, d tara logtoɛɛmb sẽn sak n na n lagem n tʋm bãmb 214 Kodivoaar la 61 Burkĩna Faso.
8 Logtor yirẽ kɩbay kʋmbg tʋʋmd sulã leb n geta Logtor yirẽ wʋm-taab sulã tʋʋmde, la a get tɩ b paamd zãmsgo. Galʋ-tẽns nins b sẽn beẽ wã, SEƐLASÃ siginda tigiss ne logtoɛɛmbã sẽn na yɩl n taas-b kɩbaya wakat fãa, ne bõn-datl sẽn yaa kɩt tɩ d moorã yɩ noog ne-b n paase. B leb n maanda vaees-n-gɛsg sẽn na yɩl n yã logtoɛɛmb a taab sẽn na n sak n maan wopeer n ka tũnug ne zɩɩm. Wakat fãa saam-bi-kãensã sakame n na n sõng-yã. Ra tol-y n maan sãmb-sãmb ne b sõngr baoob ye, n tũnug ne yãmb tigingã kẽem dãmbã n maan dẽ. Koe-moondb kẽer ninga b yõy yell pʋgẽ, b sẽn kaoos tɩ loog n yaool n na n kos sõngrã yĩngã.
9 Sõngr sẽn tar yõod raab wakate: Ad soay nins y sẽn segd n tũ, yãmb bɩ y zakã ned sã n tog n maan wopeere (yaa sẽn yãk raar tɩ yaa yãgb yell me), tɩ tak-tɩ-m-tak yiki, logtor yirã sẽn dat n tũnug ne zɩɩmã yĩnga, yãmb bɩ y nin-nongr sã n lʋɩ bãag tɩ wɩng wʋsgo, bɩ logtorã bɩ logtor yirã yel-gɛtb sã n yeel tɩ b na n boola bʋʋd biig (bɩ kãsem) wɛɛngẽ: 1) Bool-y y tigingã kẽem dãmbã, tɩ y sã n nan ka maan dẽ. Tõnd tagsgã sẽn ya a soab zɩɩmã wɛɛngẽ wã yĩngã, yaa yam tʋʋmd tɩ d togs kẽem dãmbã d sã n wa baood tɩbsg logtor yiri. 2) Rẽ poore, kẽem dãmbã sã n get tɩ yaa tɩlae, b na n telfõna SEƐLAS ning sẽn pẽ-a n yɩɩdã. Y sã n tʋlla, Logtor yirẽ wʋm-taab sullã neb tõe n wa sõng-y-la logtor yirã.—Ezai 32:1, 2.
10 Logtor yirẽ wʋm-taab sulã sẽn sigl la b tʋmd to-to: D tara mi-beoog wʋsg ne saam-bi-kãensã sẽn sak n na n sõng b rãmb nins sẽn tar zu-loees tɩbsgã wɛɛngẽ wã, b sẽn wilgd maan-m-meng-maoong ne nonglmã yĩnga. Baasg zãnga, d segd n ninga d yamẽ tɩ SEƐLASÃ neb wʋsg sẽn yɩɩd ka logtoɛɛmb ye. B yaa kẽem dãmb sẽn mi Biiblã noy sõma, tɩ rẽ yĩng bɩ b tõe n sõng-d tɩ d tall Biiblã tagsg yɛl toɛ-toɛ pʋsẽ sẽn tɩ loe ne tɩbsg sẽn ka tũnugd ne zɩɩmã. Ka bãmb tʋʋmd tɩ b togs-y tɩbsg ning y sẽn segd n maana, bɩ b sagl-y tɩt nins y sẽn segd n dɩkã ye. Leb n ka b tʋʋmd tɩ b kõ sõngr ligd wɛɛngẽ ye. Yel-kãensã yaa yãmb meng bal n welgde. Yʋʋmd 1975, zĩ-likr kiuug 1 daar Gũusg Gasgã (farende), seb-neng 607 yetame: “Yaa vẽeneg tɩ bãag tɩbsg zugu, tagsa toɛ-toɛ n be. . . . B basame t’a Zeova Kaset soab fãa yãk tɩbsg ning a sẽn tagsd tɩ yaa sõma n yɩɩdã.”—Ges-y yʋʋmd 1982, bõn-bɩʋʋng kiuug rasem 15 Gũusg Gasgã (farende), seb-nens 22-29 me.
11 Logtor yirẽ wʋm-taab sulã, sẽn get babs takɩ b sẽn yãk b yĩng yellã, tʋʋmd yaa sõng koe-moondbã tɩ b welg logtor yir ne laloa wã pʋgẽ zu-loeese, sẽn tɩ loe ne b tẽebã la b sũur kasetã. Sẽn be-b b pʋsẽ yaa kẽem dãmbã tɩ b tʋʋmdã yaa:
◼ Maan pe-kɩʋʋng tʋʋmd n teel la b bels bãad dãmbã la zagsã neb yɩɩrã bãagã sẽn wat ne wã sẽn namsdã. Yaa sɩd tɩ tiging fãa kẽem dãmb n segd pipi n kõ sõngr a woto buudu. Yitẽ-la sõma wʋsg tɩ kẽem dãmbã togs SEƐLASÃ nedã b sẽn na n ges a yellã tẽeb sẽn yaa to-to. B yãame tɩ kiris-neb kẽer tẽeb sẽn ka tar pãng pa kõ mak-sõng logtor yiy ye. Tigingã kẽem dãmb sã n da rɩk sẽk n togs SEƐLASÃ yɛl a woto, a ra na n tõogame n yɩɩd n ges kiris-nin-kãensã ne nonglem la gũusg nins sẽn yaa tɩlae wã.—Ges-y yʋʋmd 1985, tʋʋl-nif kiuug rasem 15 Gũusg Gasgã (farende), seb-nens 12-15.
◼ Kõ kɩbay la sagls yellã zugu, sẽn yit Logtor yirẽ kɩbay kʋmbg tʋʋmd sulã la Sosiete wã sɛb nins sẽn gomd zɩɩmã yellã pʋsẽ. La yaa bãadã meng n tar zɩɩb n segd n wilg a meng sẽn kɩs sɩd ne bũmb ninsã. Tẽeg-y tɩ yaa bãadã n wilgd a sẽn tẽed bũmb ninsã la a gomd n teend a tẽebã. Pa a zakã neb bɩ SEƐLASÃ n tog n maan dẽ ye. Bas-m-yard n tog n zĩnd bãadã ne a logtorã sʋka.
◼ Modg n paam logtoɛɛmb nins sẽn sakd n lagemd n tʋmdẽ wã teelgo, sã n mik tɩ logtoɛɛmbã ka sak n na n tɩbs yãmb n ka tũnug ne zɩɩm. Tõeeme tɩ b tõog n dɩk segls tɩ b yã logtor sẽn sakd n lagem n tʋm t’a togs logtoɛɛmb nins sẽn tɩbsdã bũmb ning b sẽn tõe n maan n ka tũnug ne zɩɩm. Rẽ sã n ka tõoge, y tõe n baoo sõngr logtoɛɛmb a taab nengẽ. Y tara sor n tõe n tɩ yã logto-mit a to, ba a sã n ka tʋmd logtor yir ning pʋgẽ yãmb sẽn beẽ wã. Baasg zãnga, ra yi-y-yã, tɩ sã n ka y mii hakɩk tɩ logtor sẽn maand wopeer bee zĩig a to sẽn tõe n ges y yelle. Ned sã n yi logtor yirẽ n sa, yaa toog tɩ b le sak-a be. Mo-yõs sã n wa wa, bɩ y ra maan sãmb-sãmb ne SEƐLASÃ boolg ye, n tũnug ne yãmb tigingã kẽem dãmb n maan dẽ. Saam-biis nins sẽn be sul-kãensã pʋsẽ wã paama zãmsg yɛl a woto welgr pʋsẽ, la b na n makame n yẽs ne-b tɩ b sake.
12 Ned kam fãa tʋʋmde: D nee vẽeneg tɩ segls a woto tõogr bee ne ned ning fãa yellã sẽn pakã sẽn na n lagem sõma n tʋme. Nananda yaa tɩlae tɩ d wilg vẽeneg tɩ tara yõod tɩ y reng n beool yɛl a woto, n maand gũusg y daar fãa vɩɩmã pʋgẽ. Yaa b sẽn ka tũud bãana la yɩlemdã noyã n wat ne sãmpog la bãas wʋsgo. (Ges-y yʋʋmd 1991, sɩpaolg kiuug rasem 22 Réveillez-vous! wã, seb-nens a 4, 5) Sẽn paase, tara yõod wʋsg tɩ d ra gũ tɩ wa kẽ n bõog tɩ d yaool n bao logtoɛɛmb sõngr ye.
13 D rɩk makr ne weoogã. D sã n beool n dɩk segls kẽere, bã-kãngã toolem sẽn wat ne sãoongã tõeeme n ka zãag zĩig ye. Wala makre, 1) Gãand-y fu-roog pʋgẽ (Ges-y yʋʋmd 1997, sẽoog kiuug rasem 22 Réveillez-vous! wã, seb-neng 31); 2) Yiis-y bũmb nins sẽn tõe n wa ne rũmsã (Ges-y yʋʋmd 1998, sẽoog kiuug kiuug rasem 22 Réveillez-vous! wã, seb-neng 24); la 3) Yeelg-y fu-yord sẽn tar nus-wogd wĩndgã lʋɩɩs poore (Ges-y yʋʋmd 1993, sig-noy kiuugã rasem a 8 Réveillez-vous!, seb-neng 15). Sẽn paase, saam-biis kẽer maana yam-kaalg n ka tɩbs b weoog sẽn yaa kɛgeng ne tɩɩm ning sẽn zemsã ye. Yell a ye weoogã sẽn wat ne yaa zɩɩm paoogre. Rẽ sã n wa lebg wẽng wʋsgo, logtoɛɛmb kẽer tõe n wa tʋllame n sagl zɩɩm ningri. Sãmbg sẽn ka be, rẽ poore, a soabã na n makame n bool SEƐLASÃ n tũnug ne kẽem dãmbã. La b sã n da reng pĩnd n beool n dɩk seglse, n pa maan yam-kaalgo, b ra na n tõog n gilẽ-la zu-loe-kãngã.
14 B rãmb nins sẽn paamd sõngr ne Logtor yirẽ wʋm-taab sullã maasmã segd n togsa sullã neb yɛlã baasgo, la zu-loees nins b sẽn paam ne logtorã bɩ logtor ning sẽn kʋʋd yĩnsã (anɛstezistã) wopeerã poore. Rẽ na n sõnga tʋʋmd sullã tɩ b kõ neb a taab sẽn baood sõngr kɩbay sẽn yaa takɩ, sẽn zemse, la b sẽn tõe n tall bas-yard ne. SEƐLASÃ neb getame tɩ yaa bʋko, tɩ b rãmb nins sẽn paamd tɩbsgã sã n sãoog bala, b nong n yĩmdame n ka togsd sullã neb yellã sẽn baas to-to. Rẽ kɩtame tɩ kɩbay sẽn tar yõod menemdẽ tɩ b ka tõe n gʋls n bĩng n wa sõng neb a taab ye.
15 Sẽn na n baase, wakat fãa bɩ y ning y yamẽ kaset sẽn yaa sõma wʋsg ning tõnd manesem sẽn ka vigsd la sẽn pukd maan-tɩ-zemsã sẽn kõ wã, la y ra yĩm n wilg y mi-beoog sõngrã logtor ning sẽn maan wopeerã sẽn kõ wã yĩnga, la b sẽn ges d yellã yĩng ye.
16 D saagdame tɩ segls nins b sẽn togs ka wã na n sõnga yãmba, la a kell n sõng logtoɛɛmbã la logtoɛɛmb nins sẽn maand wopeerã sẽn sakd n tɩbsd tõndã, tɩ b bãng t’a Zeova Kaset rãmbã ka yẽesem sẽn loog noor dãmb ye, la tɩ b yaa kiris-neb sẽn tʋll n ta Wẽnnaam yam.
[Zĩ-gũbri, seb-neng a 5]
Yãmb laafɩ sã n wa boog wʋsg hal tɩ b wa rat n ning yãmb zɩɩm, ges-y zĩ-gũb-kãngã n bãng y sẽn segd n maanega:
◼ Bool-y y tigingã kẽem dãmb tɩ b sõng-y-yã.
◼ Sã n yaa tɩlae, kɩt-y tɩ kẽem dãmbã bool Logtor yirẽ wʋm-taab sull (SEƐLAS) ning sẽn pẽ-a n yɩɩdã.
◼ SEƐLASÃ tõe n sõnga yãmb n gom ne logtoɛɛmbã la neb a taaba.
◼ SEƐLASÃ tõe n sõng-y lame tɩ y yã logtoɛɛmb a taab tɩ b yã logtoɛɛmb nins sẽn na n maan yãmb wopeerã n wilg-b tɩ-ledgdse.
◼ SEƐLASÃ tõe n sõng-y lame tɩ y kẽng logtor yir a to sẽn na n sak n lagem n tʋm, sẽn na yɩl tɩ y paam tɩbsg ning sẽn segdã.