Yãmb sʋgsgã leoore
◼ A Zeova Kaset rãmbã tagsg yaa wãn-wãn ne vote?
Biiblã tara noy sẽn yaa vẽenes sẽn sõngd Wẽnnaam sõgen dãmbã tɩ b tall tagsg sẽn zems yel-kãngã wɛɛngẽ. La yaool n ka wõnd Biiblã tara noor sẽn yaa vẽeneg sẽn kɩɩsd votgã meng ye. Wala makre, bʋʋm ka be sẽn segd n gɩdg yel-gɛtb sull tɩ b ra maan vot n tõog n dɩk sard sẽn tɩ loe ne b ãnterpiriiz ye. A Zeova Kaset rãmbã tigims nong n dɩkda sard b tigissã wakat la tigingã ligd rɩk-n-tʋm wɛɛngẽ, n zẽkd b nus n votdẽ.
La yaa wãn to ne votgã tẽng nanambs yãkr wakate? Yaa sɩd tɩ demokarasi tẽns kẽer pʋsẽ, hal sẽn ta tẽngã neb 50 koabg zug pa kẽngd n tɩ vot na-yãkrã raar ye. La a Zeova Kaset rãmbã yẽ ka gɩdgd neb a taabã tɩ b ra vot ye. B leb n ka yikd n maood n kɩɩsdẽ tɩ b ra maan vot na-yãkrã wɛɛngẽ me ye. B waoogda pãn-soaadb nins b sẽn yãk wa sẽn zems na-yãkr a woto sasa wã, la b sakd-ba. (Rom 13:1-7) La sã n yaa ne b mengã sã n na n votã ned na-baoodbã sʋkã, rẽ bee ne a Zeova Kaset soab fãa t’a rɩk sard sẽn tik a sũur kasetã Biiblã sẽn zãmsã la a sẽn wʋmd zɩɩb ning a sẽn tar Wẽnnaam la Tẽngã taoorã võor to-to wã zugu. (Mat. 22:21; 1 Pɩɛ. 3:16) Kaset dãmbã sã n dɩkd sard kãngã sẽn yaa ned kam fãa yellã, b geta yɛl a wãna.
Pipi, a Zezi Kirist yeela a karen-biisã wɛɛngẽ tɩ: ‘Bãmb ka dũniyã rẽnda wa mam sẽn ka dũniyã rẽndã.’ (Zã 17:14) A Zeova Kaset rãmbã ka reemd ne no-kãngã tũub ye. B sẽn “ka dũniyã rẽnda,” b pa kẽesd b toog dũniyã politik yɛl pʋsẽ ye.—Zã 18:36.
Yiibu, tʋm-tʋmd a Poll goma a meng yell n yeel t’a yaa “ãmbasadɛɛr” sẽn tʋmd Kirist yʋʋr yĩng yẽ wakatẽ nebã nengẽ. (Ef. 6:20, NW; 2 Kor. 5:20, NW ) A Zeova Kaset rãmbã tẽedame tɩ masã Kirist Zezi yaa Wẽnnaam saasẽ Rĩungã Rĩm a sẽn zĩnig naam geer zugu. Rẽ n so, tɩ wala ãmbasadɛɛr dãmba, b tog n moon dẽ n wilg tẽns-tẽnsã. (Mat. 14:14; Wil. 11:15) B gũudame tɩ ãmbasadɛɛr dãmb yɩ pa-kẽesd-m-toog rãmba, n da kẽ tẽns nins b sẽn tʋmẽ-ba yɛl pʋsẽ ye. B sẽn tʋmd Wẽnnaam saasẽ Rĩungã yʋʋr yĩngã kɩtame t’a Zeova Kaset rãmbã me tagsdẽ tɩ b ka segd n kẽ tẽns nins b sẽn beẽ wã politik yɛlẽ ye.
Bʋʋm a tãab-n-soab d sẽn segd n ges yaa tɩ neb nins sẽn naag n vot ned tʋʋmdẽ tõeeme n tall taal ne bũmb nins nin-kãng sẽn maandã. (1 Tɩm. 5:22) Kiris-nebã segd n tagsa neer n ges b sã n datame n tʋk zɩɩb kãngã.
Naas-n-soaba, a Zeova Kaset rãmbã nanda b kiris-neb lagem-n-taarã wʋsgo. (Kol. 3:14) Tũudum sã n kẽes a meng politik yɛl pʋsẽ, naoor wʋsgo wat n baasa ne welgr a nebã sʋka. A Zeova Kaset rãmbã rɩkda a Zezi Kirist togs-n-taar n pa kẽed politik yɛlẽ tɩ ne rẽ bɩ b kogl b kiris-neb lagem-n-taarã.—Mat. 12:25; Zã 6:15; 18:36, 37.
Bʋʋm a nu la yaoolem soab yaa t’a Zeova Kaset rãmbã sẽn pa kẽed politik yɛlẽ wã kõt-b-la sor tɩ b tõe n taas neb sẽn be politik sigls toɛ-toɛ fãa pʋsẽ Rĩungã koɛɛg sẽn tar yõod wʋsgã.—Heb. 10:35.
Noy nins sẽn tik Gʋlsgã zug b sẽn wilg yĩngrã yĩngã, tẽns wʋsg pʋsẽ a Zeova Kaset soab fãa rɩkda a meng sard n ka votg na-yãkrã wɛɛngẽ ye, la sor ning b sẽn tar n tõe n dɩk sard a woto wã tara yẽbgr tẽngã laloa pʋgẽ.
Baa a Zeova Kaset rãmbã sẽn dɩk sard ning yɛl toɛ-toɛ taoore, b gũusdame n kogend b kiris-neb pa-kẽesd-m-toogã la b sẽn tar sor ning n tõe n gom ne pʋ-peelmã. Yɛla fãa pʋgẽ, b teegda Wẽnnaam a Zeova t’a kõ-b pãnga, yam, la a sõng-b tɩ b ra kɩɩs b tẽebã ne manesem ba a yembr ye. Woto b wilgda bas-yard ne Yɩɩl Sõamyã gʋlsdã gom-kãensã: “Yãmb yaa mam pĩiga la mam pãng zĩiga. Yãmb yʋʋr yĩnga bɩ y lʋɩ mam taoore n tɛ maam.”—Yɩɩl 31:3.