Roagdba, zãms-y y kambã bilf-bilf tɩ b tall miunung sẽn tar yõodo
1 Ned ka rogd ne miunung sẽn tar yõod ye, leb n pa yaar me la b paamd-a ye. Sẽn yɩɩd fãa, zãms kambã bilf-bilf tɩ b tall miunung sẽn yaa sõma rɩkda sẽka. “Zãms ned bilf-bilfã” rat n yeelame tɩ “kõ bilf-bilf n paasdẽ” bɩ “maandẽ tɩ kẽed bilf-bilfu.” Roagdbã segdame n yɩ neb sẽn maand yɛlã n ka vaandẽ, sẽn na yɩl n “ket n wubd [b kambã] a Zeova kiblgã la a tagsg zãmsgã pʋgẽ.”—Ef. 6:4, NW.
2 Sɩng-y b yãadem wakat tɛka: Kom-kɩdsã tara tõog sẽn yaa kãseng n na n zãms la b maan bõn-paalse. Baa kãsembã sẽn nong n getẽ tɩ buud-gom-paalg zãmsg yaa toogã, kamb nins sẽn nan ka ta lekoll kõomã tõe n zãmsa buud-goam a yiib bɩ a tãab wakat yɛng pʋgẽ. Ra tol-y n tags tɩ y biigã yaa yãag wʋsg n ka tõe n tall miunung sẽn yaa sõma ye. B sã n sɩng pĩnd n zãms biigã Biiblã sɩd la b kell n tall woto maanego, biigã ne a wa ta yʋʋm a wãna t’a yamã pida ne bãngr ning sẽn na n kɩt t’a “yɩ yam soab fãagrã yĩnga.”—2 Tɩm. 3:15, NW.
3 Kɩt-y tɩ koe-moonegã tʋʋmd yɩ miunungu: Miunung sẽn tar yõod b sẽn segd n zãms biigã a wubrã yʋʋm wakat yaa Wẽnnaam Rĩungã koe-noog moondẽ n ka vaandẽ wã. Roagdb wʋsg sɩngda rẽ maanego, n talld b kambã n moond koe-noogã zak-zak tɩ b ket n yaa kom-peelse. Roagdbã sã n kẽesd b mens kasetã tʋʋmd pʋgẽ n ka vaandẽ, rẽ sõngda b kambã tɩ b tall naneb la yẽesem ne ministɛɛrã. Roagdbã tõe n wilgda kambã b sẽn tõe n kõ kasetã to-to koe-moonegã tʋʋmd neng fãa pʋgẽ.
4 Kẽes-m-meng Teokaratik ministɛɛrã lekoll pʋgẽ me sõngda kambã. Lekollã zãmsd-b-la miunung sẽn yaa sõma zãmsgã wɛɛngẽ, la b sẽn tõe n karem to-to n wʋm yɛlã võore. B zãmsda b sẽn tõe n maan to-to n sõs Biiblã zugu, n maan lebg-n-tɩ-ges rãmba, la Biibl zãmsg ne neba. Zãmsg a woto tõe n tus-b lame tɩ b maan so-pakrã tʋʋmd la b bao n paam zu-nood tʋʋm sẽn yaa zalle. Betɛll neb wʋsg la misioneer dãmb tẽegda b sẽn da wa n sɩng ministɛɛr lekollã paalmã ne yamleoogo, la b get-a-la wala segls sẽn sõng-b tɩ b tall miunung sẽn tar yõodo.
5 Tõnd fãa yaa wala yagd Yagd Kãseng a Zeova nugẽ. (Ezai 64:7) Yagdã sã n yaa nom-nom n yɩɩda, a nombã yaa nana n yɩɩda. La a sã n wɩsgd n paasdẽ fãa la a nombã sẽn lebgd toog n yɩɩda. Yaa woto me ne ninsaalba. B sã n ket n yaa poala, b toeeng yaa nana-nana n yɩɩda: biig sã n yaa poll n yɩɩd fãa la b tõe me n toeem-a n yɩɩda. Yaa kambã yãadem wakat la b wubrã yʋʋma, sẽn yaa wakat ning b sẽn tõe n toeem-b tɩ b yɩ nin-sõma bɩ nin-wẽnsã. Y sẽn yaa roagd sẽn get y kamb yell ne nonglmã, bɩ y sɩng pĩnd n zãmsd y kambã bilf-bilf tɩ b tall miunung sẽn tar yõod kiris-neb ministɛɛrã pʋgẽ.