Yaa nonglmã n tusd tõnd tɩ d moondẽ
1 Nebã mii tõnd a Zeova Kaset rãmbã sõma n yɩɩd wala neb sẽn moond Rĩungã koɛɛg ne yẽesem. (Mat. 24:14) Neb sẽn yɩɩd milyõ a yoob n moond koe-noogã dũniyã gill zugu. Nin-paals sã n lagem ne tõnd koe-moonegã pʋgẽ, b naagd-b-la sõor kãng pʋgẽ. Yaa neb nins sẽn sɩd moond koe-noogã la b sõta, n paamd sõor a woto.
2 Bõe n tusd tõnd tɩ d kõt d meng n maand tʋʋm kãngã sẽn ka nana wã? Ka modgre, leb n ka arzɛk bɩ waoogr daab yĩng la d sẽn maand-a wã ye. Pipi wã, tõnd wʋsg ra maanda rabeem ne tʋʋmdã, d ra tagsdame tɩ d ka tõe-a ye. Sẽn paase, naoor wʋsgo nebã pa kelg ye. (Mat. 24:9) Yaa toog ne neb wʋsg sẽn yɩɩd tɩ b bãng bũmb ning sẽn tusd tõnd tɩ d maan tʋʋmdã. Bũmb n segd n tusd tõnd tɩ d ket n nangd pãnga.
3 Nonglmã pãnga: A Zezi wilga noor ning sẽn yaa kãseng n yɩɩdã sẽn ya a soaba, n yeel tɩ d ‘nong Zusoaba d Wẽnnaam ne d sũur fãa, la ne d ratem fãa, la ne d yam fãa, la ne d pãnga fãa.’ (Mark 12:30) Tõnd nanda a Zeova sẽn ya a soabã la a sẽn yaa ned ning buudã. A yaa Naab Sẽn-ka-to la bũmb fãa Naanda, sẽn “zems tɩ reeg pẽgre la waoogre la pãnga.” Yaa woto fãa n kɩt tɩ d nong-a wã. (Wil. 4:11). A zʋg-sõma wã sẽn yaa kãsemsã ka tar mak-n-taar ye.—Yik. 34:6, 7.
4 D sẽn mi a Zeova la d nong-a wã, tusda tõnd tɩ d kɩtdẽ tɩ d vẽenemã yãgd neba sʋka. (Mat. 5:16) Tõnd vẽenemã yãgdame, d sã n pẽgd-a nebã sʋka, d sã n gomd a tʋʋm kãsemsã yelle, la d sã n moond a Rĩungã koɛɛga. Wala malɛkã sẽn yɩgd n pɩʋʋgd saasã sẽn yeelã, d tara “koe-noog sẽn ka sɛta n na n moon . . . buud fãa la goam toɛ-toɛya fãa la neba fãa.” (Wil. 14:6) Pãng ning sẽn tusd tõnd tɩ d moond dũniyã gill zugã yaa nonglmã.
5 Dũniyã neb getame tɩ tõnd koe-moonegã yaa “yalemd” b sẽn ka segd n kelge. (1 Kor. 1:18) Zĩig fãa, b maoome n na n gɩdg tõnd tʋʋmdã. Nonglem ning d sẽn tarã kõta tõnd pãnga, tɩ d tõe n yeel wala tʋm-tʋmdbã woto: “Tõnd ka tõe n ka togs bũmb nins tõnd sẽn yã la d wʋma ye. . . . A zemsame tɩ tõnd sak Wẽnnaam n yɩɩd nebã.” (Tʋʋ. 4:20; 5:29) Baa ne kɩɩsgã, moonegã tʋʋmd ket n paamda pãng dũniyã babs fãa pʋsẽ.
6 Tõnd nonglmã ne a Zeova yaa wa bug-witim sẽn tusd tõnd tɩ d togsd nebã a bõn-sõma wã. (Zer. 20:9; 1 Pɩɛ. 2:9) D na n ket n ‘wilgda neba bãmb tʋʋma . . . tɩ bõe, bãmb maana bõn-kãsemse’!—Ezai 12:4, 5.