Yãmb tigingã mooneg zĩig yalmame bɩ?

¹ A Zezi kõo kaset sõma-sõma pĩnd Israɛll tẽngã sẽn da yalmã fãa pʋgẽ, hal Zide galʋ-tẽnsã n tɩ tãag Galile tẽn-kɩremsã. (Mark 1:38, 39; Luk 23:5) Tõnd me tog n taasa koe-noogã neb wʋsg wa d sẽn tõe tɛka. (Mark 13:10) La rẽ tõe n yɩɩ toogo. Bõe yĩnga?

² Afirik nin-taoor la a tẽn-sʋk tigims wʋsg mooneg zĩis wʋsg sẽn yɩɩd yaa tẽn-kɩremsẽ, hal tɩ b yalmã zãag zĩig wʋsg menga. Buud-gom-zẽms tigims tõeeme n moond galʋ-tẽn-bɛd sẽn tar neb wʋsg pʋsẽ, n baood neb nins sẽn gomd bãmb buud-gomdã bala. Bõe la d tõe n maan n sõng neb nins sẽn vɩ mooneg zĩ-yalems a woto pʋsẽ tɩ b bãng sɩdã a Zeova, a Zezi, la Rĩungã wɛɛngẽ?

³ Reng-y n segl neere: Tʋʋmdã yel-gɛt la ned ning sẽn get-a moonegã zĩis yellã segd n sigla tigingã neb tɩ b lagem taab n moon mooneg zĩ-kãensã sõma. B tõe n yãka sib takɩ rẽ yĩnga, sẽn yaa wakat ning neb wʋsg sẽn tõe n dɩk raar tõr n moonã. Y sã n wa moond zĩ-zãrgẽ, bɩ y maan segls sẽn na yɩl n moon n kaoose, n zɩ y midi wã rɩɩb n kẽnge. Y tõe n maana moonegã yiib tigisg pĩnd n yɩɩda, sẽn na yɩl n tõog n yã sẽk n kẽng moonegã zĩigẽ, bɩ y maan tigisgã zĩig sẽn pẽ ne y sẽn na n moonẽ wã. Y tõe n lagma taab sull-sull n kẽ mobila, bɩ n luaas mobill tɩ neb wʋsg tõog n naage. Maan-y segls n tɩ moon tẽn-kɩremsã yʋʋmdã sasa ning saag sẽn ka niid tɩ soayã yaa sõma wã.

⁴ Zĩis nins tigims sẽn moond neb sẽn gomd buud-gom-zẽna, b tõeeme n ka sãam b sẽkã sẽn tar yõodã b sã n tar neba yʋy la b adɛrs rãmba, la yaoolem karte. Sigl-y moonegã zĩis sõma sẽn na yɩl tɩ moondb sull tõog n kẽng sẽn gomd-b buud-gom-zẽna sẽn be babgã pʋgẽ wã nengẽ.

⁵ Modg-y n paam sɛb sõor sẽn sek n zɩ n kẽnge. Sã n mikame tɩ b ka minim n moond zĩ-kãng tao-tao, zemsdẽ lame tɩ y bas seb-vãoog bɩ zʋrnall kʋdr sẽn ka-b yiyã zagsẽ. Yãmb sã n tara Aimeriez-vous en savoir plus sur la Bible ? seb-vãadã, bɩ y kɩs-a ned ning fãa y sẽn sege, la y bas-a sẽn ka-a yir fãa zakẽ.

⁶ Lagm-y taab n tʋm sõma: Zĩ-yaleng mooneg baoodame tɩ tigingã neb fãa lagem taab n sõnge. Sorã sã n yaa woko, b rãmb nins sẽn lagem taab mobillã pʋgẽ n debda tõe n naaga taab n sõng ne esãasã ligdi. Y sã n yã ned sẽn dat n sõs n kaoose, y segd n wilgame tɩ y yaa tags-tɩ-bɩ soaba. Wakat fãa bɩ y ning y yamẽ tɩ y segd n moona neba fãa sẽn be bab-kãng pʋgẽ wã, sẽn paase, tags-y sullã neb a taabã sẽn tõe n yas n gũud yãmbã yelle. Yãmb sã n dat n sõs ne ned sẽn dat n bãng n paas n kaoose, rẽ yĩnga y tõe n maana segls tɩ sullã neb a taab ket n moondẽ bɩ?

⁷ Maan-y segls takɩ sẽn na yɩl n lebg n tɩ ges neb nins fãa sẽn tʋlg n na n bãng n paasã. Zĩig nins rẽ sẽn tõeyã, a soabã adɛrs sẽn yãk a toogo, modg-y n paam a telefõnã nimero sẽn na yɩl n wa tõog n lebg n kõ-a kasetã n paas ne telefõna maasem. Tẽn-kɩremsẽ wã soayã sã n ka tar yʋy bɩ zagsã sã n ka tar nimero rãmba, bɩ y maag y yĩng n mams zĩigã n dẽeg kart buudu, bɩ y gʋls n bilg zĩigã sẽn yaa to-to wã sẽn na yɩl n tõog n lebg n wa ges a soabã.

⁸ Ad sɩd yaa zu-no-kãseng n kõ-do, d sẽn tũud a Zezi no-kãensã wã: “Yãmb sẽn kẽ tẽng ninga fãa, a sã n yaa tẽn-kãsenga bɩ tẽn-bila, bɩ y bao ned sẽn zemse.” (Mat. 10:11) Sãmbg sẽn ka be, a Zeova na n ninga y modgrã barka, y sẽn sak n na n modg n tʋm tʋʋm kãngã sẽn tar bark n yɩɩdã yĩngã!