A Zeova raarã kolgame
1 Kiris-nebã gũuda a Zeova raarã ne b sũy fãa. Yaa daar ning a Zeova sẽn na n sãam dũni-wẽng kãngã tɩ rẽ poor bɩ a kẽes-b dũni-paalg tɩrlem sẽn na n zĩnd pʋgẽ wã. (2 Pɩɛ. 3:12, 13) Sẽn mik tɩ d pa mi a Zeova raarã sẽn na n wa wakat ning takɩ wã, d segd n kell n yɩɩ gũusdba, la d sõng neb a taabã tɩ bãmb me maan woto. (Eze. 33:7-9; Mat. 24:42-44) Wẽnnaam Gomdã bãngr-goam zut bʋgsg na n kɩtame tɩ d kɩs sɩd n paas t’a ‘Zeova ra-kãsenga kolgame.’—Sof. 1:14.
2 Dũni gill pãn-soaadb sẽn da na n pʋg taaba: Wilgr 17:9-11 pʋgẽ, tʋmd-tʋmd a Zã goma “rĩm dãmb a yopoe” yelle, tɩ b makd dũni gill pãn-soaadb a yopoe sẽn da na n pʋg taaba. A Zã goma “rĩm a nii soab” yell me, tɩ rĩm kãng makd Nasiõzĩni sẽn yaa tẽns sẽn lagem taab siglgã. Rẽ yĩnga d segd n gẽega dũni gill pãn-soaadb a taab waoong bɩ? Ayo, bala, bãngr-gomdã yeelame tɩ rĩm a nii-n-soaba “na n kẽnga a sãoong zĩigẽ,” la rẽ poore b pa gom rĩm a to waoong yell ye. Bãngr-gom-kãngã sõng-y lame tɩ y bãng d sẽn be wakat ningã bɩ?
3 Daniɛll 2:31-45 sõngd-d lame tɩ d wʋm a Zeova raarã sẽn watã võore. Bãngr-gom-kãng pʋgẽ, bõn-naandg kãsengã a Nebukadnezaar sẽn yã zãmsd pʋgẽ wã makda dũni gill pãn-soaadbã sẽn pʋg taabã. Pãn-soaadb kãens fãa zoe n zĩndame. Yaa bʋg soab n dɩt naam rũndã-rũndã? D bee pãn-soaad ninga bõn-naandgã nao sẽn makdã naam wakato. Bãngr-gomdã bilgda bũmb ning sẽn na n pʋglã vẽenega. B na n sãama ninsaalbã naam fasɩ “tɩ soolem sẽn ka tõe n sãam” led a zĩiga. Rẽ yĩnga y mii rẽ sẽn wilgd to-to t’a Zeova raarã kolgame wã bɩ?
4 Kaset a taaba: D yãta kaset a taab sẽn wilgd t’a Zeova raarã kolgame. Tõnd nee tʋm-tʋmd a Poll sẽn deng n togs neba yel-manesem sẽn na n yɩ to-to ‘yaoolem wakatã’ sẽn pidsdi. (2 Tɩm. 3:1-5) Sẽn paase, d kẽesda d mens dũni gill kasetã kũun tʋʋmd sẽn segd n pids tɩ saabã yaool n wa wã pʋgẽ. (Mat. 24:14) Bɩ d ket n wilgd ne koe-moonegã maasem tɩ malɛkã sẽn moon bũmb ningã yaa yãgb yelle. A mooname yaa: “Bɩ y zoe Wẽnnaam la y waoog bãmba; tɩ bõe, bãmb bʋʋd kaoob wakat taame.”—Wil. 14:6, 7.