Yãmb sogsgã leoore

◼ Rẽ yĩnga d tõe n talla d Biibl karen-biig n yi koe-moonegã sẽn na yɩl t’a bãng d sẽn moond to-to wã bɩ?

Naoor wʋsgo, neb nins sẽn pa reeg lisg n yaool n yit koe-moonegã ne a Zeova Kaset rãmbã yaa neb sẽn pidsd yɛl nins b sẽn baood tɩ b pids rẽ wɛɛngẽ wã.

Neb wʋsg nanda a Zeova Kaset rãmbã, b sẽn tʋmd tʋʋm-sõng sẽn pa wõnd a taaba, sẽn yaa moon nebã zak-zak la b zãms-b Biiblã tɩ b lebg karen-biisã. (Mat. 28:19, 20) Zãma wã sã n yã ned sẽn yãagd a Zeova Kaset rãmbã b koe-moonegã pʋgẽ, bõe la b na n tẽ? Sãmbg sẽn ka be, b na n tẽeme t’a yaa a Zeova Kaset soaba, bɩ t’a na n lebga a Zeova Kaset soaba.

La neb kẽer n yit koe-moonegã ne tõnd n yaool n nan pa Kaset rãmb ye.

Wala makre, wakat ninga, kãsem dãmb kẽer sakame tɩ kiba-kɩtba, inivɛrsite karen-saam dãmb bɩ neb a taab yãag Kaset soab zak-zak koe-moonegã pʋgẽ, sẽn na yɩl tɩ b bãng d sẽn tʋmd d tʋʋmdã to-to wã. La yaa vẽeneg tɩ ned sã n yãagd tõndo, a segd n manega a meng n wõneg tõnd la a tall yel-manesem sẽn zemse. Sẽn paase, Kaset soabã tõe n wilgda a kɛlgdbã t’a tũud-n-taagã yaa kiba-kɩt bɩ karen-saamb sẽn dat n bãng d sẽn tʋmd d tʋʋmdã to-to.

Kiris-nebã me tallda b kamb n yit koe-moonegã, baa b sã n paooda wʋsgo, bɩ b nan pa koe-moondb sẽn pa reeg lisgu. Roagdb kãensã pa basd b kamb b yen-yen yir ye. B peegd-b lame n yit koe-moonegã, tɩ b sã n wa kẽnd soayã zut ne-b bɩ b gomd Wẽnnaam noyã la a Gomdã yell ne-ba. (Tõo. 6:4-7) La woto zemsa ne roagd sẽn yaa kiris-ned sẽn segd n maanã. Rẽ pa yembr ne f sẽn na n peeg ned sẽn tũud-f bal n dat n ges f sẽn moond to-to wã ye. Sãmbg sẽn ka be, roagdbã sẽn zãmsd b kambã woto wã yaa sẽn na yɩl tɩ b wa yɩ koe-moondb n pẽgd a Zeova.—Mat. 21:15, 16.

La sã n yaa ned sẽn zãmsd Biiblã ne tõnd n tol n dat n lebg Kaset soaba? A sã n dat n gom “Wẽnnaam tʋʋm-kãsemsã” a sẽn zãms Biiblã pʋgẽ wã yell ne a roagdba, a tʋmd-n-taase, a yags la ne neb a taaba, zemsame. (Tʋʋ. 2:11) La d saagdame t’a na n wa yãame t’a segd n yãagda tigingã neb n yit n ‘moond Wẽnnaam goamã.’—Tʋʋ. 13:5.