D tʋm ne d sɛbã sõma
1. a) Bõe n kɩt tɩ neb nins sẽn da segd n maneg wẽnd-doogã tʋm sõma ne laog ning b sẽn kõ-bã? b) Wãn to la tõnd me tõe n dɩk b togs-n-taare?
1 Rĩm a Zozɩas sẽn da wa n segend wẽnd-doogã manegrã, a pẽga neb nins b sẽn yãk tɩ b na n tʋm tʋʋmdã. A yeelame tɩ “b sã n na n kɩs b ligda bɩ b ra yaas n sõd ye. Tɩ bala, bãmb tʋmda ne pʋ-peelem.” (2 Rĩm 22:3-7) Tʋm-tʋmdbã sẽn tʋm sõma ne laog ning b sẽn kõ-bã wilgdame tɩ b nanda Wẽnnaam tʋʋmdã. Rũndã-rũndã, tõnd me sẽn moond Wẽnnaam koe-noogã, d segd n tʋma sõma ne bũmb nins d sẽn tar n moondẽ wã. Tõnd sɛbã bee bõn-kãens sʋka.
2, 3. Koe-moonegã wakate, bõe la d segd n maan n wilg tɩ d nanda d sɛbã?
2 Koe-moonegã wakate: Tõnd sã n nong koɛɛg ning sẽn be tõnd sɛbã pʋsẽ n tar yõodã, la d mi tɩ b yiisda ligd wʋsg sẽn na yɩl n maan seb-kãensã, d na n nand-b-la hal wʋsgo. Yaa neb nins sẽn sɩd baood sɩdã la tõnd sɛbã nafda, sẽn dat n yeel tɩ neb nins sẽn sɩd nong koɛɛg ning tõnd sẽn taasdã, la b nand tõnd tʋʋmdã. (Mat. 10:11) Rẽ n so tɩ d pa segd n bas d sɛbã ne neb nins sẽn pa wilgd tɩ b nonga koɛɛg ning sẽn be Biiblã pʋgẽ wã ye. Tõnd sã n moon koe-noogã tɩ ned maan wa a rat wa a pa rata, d tõe n kõo a soab seb-bil la d ra kõ-a sebr a to ye. D sẽn pʋɩt d sɛbã to-to wã segd n wilgame tɩ d mii b yõodã sẽn ta zĩig ninga. D ra bas-b zĩig fãa tɩ b wa rɩg tẽng ye. Sẽn na yɩl n da wa sãam d sɛbã zaalem, bɩ d reng n ges tõnd sẽn zoe n tar-b rãmb zakẽ wã sã n pa wʋsg n yaool n bao a taaba.
3 Tõnd zʋrno rãmbã sẽn yit kiuug-kiuugã yĩnga, d segd n pʋɩ-b-la tao-tao tɩ wakatã pa loog ye. Rẽ n so tɩ d segd n modg n yi koe-moonegã n pʋɩ zʋrno rãmbã tɩ sẽn dat-bã paam n karme. Tõnd sã n wa mik tɩ d zʋrno rãmbã zamda zakẽ, yɩta sõma tɩ d ges d sẽn tõe n maan to-to n yit zʋrno rãmbã pʋɩɩb daar n paase. La sã n mik tɩ d pa tõe n maan dẽ, bɩ d boog tõnd sẽn deegd sɛbã sõore. Tõnd sã n tũ sagl-kãensã, d wilgdame tɩ d geta arzɛk ning Wẽnnaam sẽn kõ-dã yell sõma.—1 Kor. 4:2; 1 Pɩɛ. 4:10, 11.
4. a) Sã n yaa ne Rom dãmb 2:21, bõe la kiris-ned sẽn zãmsd a taab segd n maan n yɩɩda? b) Bõe n tõe n sõng-d tɩ d nand bũmb nins a Zeova sẽn bobl tõndã hal wʋsgo?
4 Tõnd mengã la d zaka rãmb sẽn tar sɛb ninsã: Rom dãmb 2:21 pʋgẽ wã, tʋm-tʋmd a Poll yeela woto: “Fo zãmsda neb a taaba, n yaool n ka zãmsd f meng ye.” Tõnd sã n baood sẽk n karemd d sɛbã sẽn tik Biiblã zugã la d bʋgsdẽ, d wilgdame tɩ tõnd mengã nanda zãmsg ning a Zeova sẽn kɩt t’a tʋm-tʋmdã kõt-d wakat fãa wã. (Luk 12:42) Tõnd mengã bɩ tõnd ne d zakã rãmb sã n karemd sɛbã n bãngd tʋm-tʋmd sẽn tũud sɩdã sẽn vẽnegd bũmb ning n wilgdẽ wã, na n sõng-d lame tɩ d nand bũmb nins fãa a Zeova sẽn bobl tõndã hal wʋsgo. D segd n zãmsa kambã me tɩ b zã b sɛbã neere, la b ra gʋl b zug yaar ye. Sẽn leb n paase, d segd n bĩnga d sɛbã sõma tɩ d sã n wa yi koe-moonegã n na n wilg-b bɩ mik tɩ b yaa sõma.
5, 6. Bõe ne bõe la d tõe n maan n da wa sãam d sɛbã zaalem?
5 D segd n deega sɛb nins sẽn yaa tɩlae ne tõndã bala. Tõnd sã n wa rat Bible de référence la sɛb a taab wala Concordance, Index, Étude perspicace, la Prédicateur, bɩ d komand n zems la d ra wa komand-b yaare, bala b maanegã yaa ligd wʋsgo. Coffret de périodiques rãmbã yaa tõnd mengã sɛb bĩngr yĩnga. D pa segd n dɩk tɩ lebg d mooneg korg ye.
6 Rẽ yĩnga, yãmb gʋlsda y yʋʋrã ne y adɛrs y mengã sɛb fãa zut bɩ? Woto na n kɩtame tɩ b sã n wa menem bɩ y tõog n yã-b la y ra bao a taab ye. Yãmb sã n wa menes y Biible, y yɩɩl sebr wall sebr a to, bɩ y tɩ ges b sẽn bĩngd te-yãtmã zĩig Rĩungã roogẽ bɩ tigis-kãsengã zĩigẽ.—Luk 15:8, 9.
7. Tõnd sã n tʋmd ne d sɛbã sõma, bõe la d wilgd a Zeova?
7 A Zeova bobla a nin-buiidã zɩɩb la tʋʋmd kãsenga, t’a arzɛk ning a sẽn bobl a “tʋm-tʋmdã” bee rẽ fãa sʋka. (2 Tɩm. 1:12; Luk 12:42-44, 48b; 1 Tɩm. 6:20) Tõnd sẽn nand Wẽnnaam tʋʋmdã yĩnga, bɩ d modg n kell n tʋm ne d sɛbã sõma koe-moonegã pʋgẽ, la d modg n zã tõnd mengã sẽn tar sɛb nins n karemdẽ wã neere. D sã n maand woto, d wilgdame tɩ d zãada Rĩungã arzɛk ning a Zeova sẽn bobl-dã sõma.—Luk 16:10.