D togsda nebã Rĩungã koe-noogo
1 Yaoolem wakat kãensã sẽn yaa toog sasa wã, neb wʋsg pa tar saagr ye. (Ef. 2:12) Neb a taab me teega arzɛkã, nanambsã, siãnsã, la bũmb a taaba. D sũur noomã wʋsg d sẽn tar saagr hakɩk ne beoog daarã. Saag-kãng yaa “sɩɩg baar sẽn ka vigsda, la sẽn ka kaoogde.”—Heb. 6:19.
2 Wẽnnaam Rĩungã na n kɩtame tɩ tẽngã lebg arzãna. Tõnd neb nins sẽn ki-bã na n vʋʋgame. (Tʋʋ. 24:15) Naongã, wẽgbã, bãasã, kʋʋlmã, la kũumã pa na n zĩnd yɛs ye. (Yɩɩl 9:19; Mat. 12:20, 21; Wil. 21:3, 4) Woto fãa yaa bũmb nins a Zeova sẽn pʋlem tɩ na n pids ka la bilfã kẽere. Yaa bʋg pidsg la yãmb gũud n yɩɩda?
3 D moon koe-noogã: D pa segd n tall Rĩungã koe-noog tõnd d ye bal yĩng ye. D sẽn nong Wẽnnaam la neb a taabã kɩtdame tɩ d ‘moond koe-noogã naong rãmbã, . . . n belsd sũ-sãoong rãmbã, la d moond koɛɛgã tɩ yembs paamd fãagre, tɩ zoens paamd b nini, la d kõt sẽn namsdbã lohorem,’ wa a Zezi sẽn maanã. (Luk 4:18) Tʋm-tʋmd a Poll ra moonda koe-noogã raasẽ wã la zĩis nins a sẽn da tõe n yã neba. A kẽesa a meng wʋsg koɛɛgã mooneg pʋgẽ. (Tʋʋ. 18:5) D sã n dɩk a mak-sõngã n moond koɛɛgã ne yẽesem, na n kɩtame tɩ “yɩɩrã ne dũniyã yɛla, la arzɛgs belgr” ra boog d saagrã ye.—Mark 4:19.
4 D sã n segd neb sẽn pa rat n kelge, bɩ neb sẽn gɩdgd tõnd tɩ d ra moon koɛɛgã, d saagrã pa na n boog ye. D na n ‘talla d tẽebã kãn-kãe n da yuus ye.’ (Heb. 10:23) D pa “zoet yãnd ne koe-noogã ye.” (Rom 1:16) Tõe tɩ d sẽn modgd wʋsg la d tar tẽeb kãn-kãe wã na n kɩtame tɩ neb kẽer kelg-do.
5 Baa ne tõnd sẽn wilgd nebã tɩ yɛlã sẽn tar kengrã pidsda Biiblã bãngr-goamã, d pa neb sẽn moond yel-beed ye. D koɛɛgã mooneg tika Wẽnnaam Rĩungã koe-noog zug n yɩɩda. Bɩ d modg n moon koe-no-kãngã ne yẽesem sẽn na yɩl n wa paam d ‘tẽebã pidsgu.’—Heb. 6:11.