Koe-moondbã segd n pʋʋsdame
1. Bõe n yaa tɩlae sẽn na yɩl tɩ d tõog n moon koɛɛgã?
1 Tõnd pa tõe n moon koɛɛgã ne d meng pãng ye. Yaa a Zeova n kõt tõnd pãng tɩ d moond koɛɛgã. (Fil. 4:13, NW ) A tũnugda ne a malɛgsã n sõngd tõnd tɩ d yãt neb nins sẽn baood sɩdã. (Wil. 14:6, 7) Tõnd bʋta sɩdã nebã sũyẽ la d zãgsd koom, la yaa a Zeova n kɩtd tɩ bɩtẽ. (1 Kor. 3:6, 9) Dẽnd tara yõod tɩ koe-moondbã pʋʋs d saasẽ Ba wã n kos a sõngre.
2. Bõe ne bõe la d tõe n pʋʋs n kose?
2 Bũmb nins d sẽn tõe n kose: D sã n wa rat n moon koɛɛgã, d segd n pʋʋsa a Zeova. (Ef. 6:18) D tõe n pʋʋs n kosa bõe ne bõe? D tõe n pʋʋs n kosa a Zeova t’a kõ-d raoodo, la a sõng-d tɩ d tall tagsg sẽn yaa sõma neb nins d sẽn na n moonã zugu. (Tʋʋ. 4:29) D tõe n kosa a Zeova t’a sõng tõnd tɩ d yã neb sẽn sɩd rat n zãms Biiblã. Ned sã n sok tõnd bũmbu, d tõe n pʋʋsa d sũurẽ koɛɛg-koɛɛg n kos a Zeova t’a sõng-d tɩ d bãng n leoke. (Neh. 2:4) D tõeeme n kos t’a sõng-d tɩ d kell n lʋɩɩs koɛɛgã mooneg taoore. (Zak 1:5) Sẽn paase, d sã n pʋʋsd a Zeova bark d sẽn paam n yaa a koe-moondbã, a sũur noomame.—Kol. 3:15.
3. D sã n pʋʋsd neb a taabã yĩnga, wãn to la tõe n sõng ne koɛɛgã moonego?
3 D pʋʋs neb a taabã yĩnga: D segdame n “pʋʋs taab yĩnga,” tɩ wakat ning meng bɩ d pʋd d koe-moond-taas yʋya. (Zak 5:16; Tʋʋ. 12:5) Yãmb laafɩ wã paoodame tɩ y pa tõe n moon wʋsg bɩ? Sã n yaa woto bɩ y pʋʋs koe-moondb nins sẽn tar keelem n tõe n moonã yĩnga. Bãng-y tɩ y pʋʋsgã tõe n sõnga neb a taabã wʋsgo! Zemsame me tɩ y kos Wẽnnaam t’a bʋk pãn-soaadbã sũyã koe-moonegã wɛɛngẽ, sẽn na yɩl tɩ d tẽed-n-taasã tõog “n zĩnd bãane n paam laafɩ.”—1 Tɩm. 2:1, 2.
4. Bõe yĩng tɩ d segd n pʋʋs n da base?
4 Yɩl n moon koe-noogã dũniyã gill zugu, sɩd yaa tʋʋm-kãsenga. La d sã n ‘pʋʋs n pa base,’ ne a Zeova sõngre d na n tõogame.—Rom 12:12.