Bũmb ning sẽn kɩtd tɩ karen-saamb tʋʋmd wom biisi
1. Bõe n kɩtd tɩ koe-moond yɩ karen-saamb sõngo?
1 Bõe n kɩtd tɩ koe-moond yɩ karen-saamb sõngo, t’a tʋʋmdã womd biisi? Yaa a sã n yaa ned sẽn karem n zãage, bɩ sẽn tar minim wall tõog ning bɩ? Ayo! A segd n talla zʋg-sõng ning sẽn kɩtd tɩ ned tõe n pids Tõogã fãa wã. Yaa zʋg-sõng kãng n kɩtd me tɩ b bãng a Zezi karen-biisã n welge. A Zeova meng tara zʋg-sõng kãng n yɩɩda. Yaa nonglmã. (Zã 13:35; Gal. 5:14; 1 Zã 4:8) Karen-saamb sõng segd n tara nonglem.
2. Bõe yĩng tɩ tar yõod wʋsg tɩ d nong nebã?
2 D nong nebã: Karen-saamb Kãseng a Zezi wilgame t’a nonga nebã, tɩ rẽ kɩt tɩ nebã ra kelgd-a. (Luk 5:12, 13; Zã 13:1; 15:13) Nebã yell sã n pak tõndo, d sã n paam segb fãa, d na n taas-b-la koɛɛgã. Baa namsg bɩ nebã sẽn pa rat n kelgã pa na n gɩdg tõnd ye. D na n wilgda nebã tɩ d rata b neere, la d modgd n kɩtdẽ tɩ koɛɛgã zemsd ne-ba. D sã n wa zãmsd ned Biiblã, la baa d sã n wa segend d sẽn na n tɩ zãms-a bũmb ningã, d na n sak n dɩka sẽk ning sẽn sekdã.
3. D sã n nong Biiblã sẽn yetã, wãn to la rẽ na n sõng-do?
3 D nong Biiblã sẽn yetã: A Zezi ra nonga Wẽnnaam Gomdã, n da get rẽ wa arzɛka. (Mat. 13:52) D sã n nong Biiblã sẽn yetã, d sẽn gomd to-to wã na n wilgdame tɩ d kɩsa sɩd ne d sẽn yetã, tɩ rẽ tõe n kɩt tɩ nebã kelg-d sõma. Leb n na n kɩtame tɩ baa d pa tar tõog la minim bɩ d ra tagsd rẽ yell ye. D na n tagsda koɛɛgã sẽn tar yõodã yelle, tɩ rẽ tõe n kɩt tɩ d rabeemã booge.
4. Bõe n na n sõng-d tɩ d tall nonglem?
4 D tall nonglem: Bõe n na n sõng-d tɩ d nong nebã? Yaa d sẽn na n tagsd nonglem ning a Zeova ne a Biigã sẽn wilg ninsaalbã yelle, la d tẽegdẽ tɩ neb nins d sẽn taasd koɛɛgã bee lik pʋgẽ, b sẽn pa mi Wẽnnaamã yĩnga. (Mark 6:34; 1 Zã 4:10, 11) D sã n zãmsd Biiblã n pa vaandẽ la d bʋgsd a goamã zugu, d na n nonga a sẽn yetã n paasdẽ. Nonglmã yaa zʋg-sõng vʋʋsem sõngã sẽn kõte. (Gal. 5:22) Dẽnd d tõe n kosa a Zeova t’a kõ-d a vʋʋsem sõngã, la a sõng-d tɩ d nonglmã paase. (Luk 11:13; 1 Zã 5:14) Baa d yaa ned sẽn pa karem n zãage, bɩ sẽn pa tar minim la tõogo, wall d tũuda a Zeova sẽn nan pa kaoose, d sã n tar nonglem, d na n tõog n yɩɩ karen-saamb sõngo, tɩ d tʋʋmdã womd biisi.