D maanda wãn n bãng Biibl karen-biig sã n bɩta tẽebã wɛɛngẽ?

Koe-moond sã n zãmsd ned Biiblã, a segd n mi n maaga a yĩng n ges a soabã sã n maanda modgre. A tõe n soka a meng woto: Karen-biigã rengd n segenda zãmsgã, n karemd vɛrse rãmbã bɩ? (Tʋʋ. 17:11; 1 Tes. 2:13) A leokda ne a meng goama, la a wilgdẽ t’a sũur nooma ne bũmb ning a sẽn zãmsd Biiblã pʋgẽ wã bɩ?—Yel. 2:1-6.

Rẽ yĩnga a goamã ne a yel-manesmã wilgdame tɩ masã a tũuda Biiblã noyã? (1 Kor. 6:9, 10) A toeemda zʋg bɩ? (Ef. 4:22-24) A nonga bũmb ning a sẽn zãmsdã, hal n gomd rẽ yell ne a roagdba, a tʋmd-n-taas la a yags bɩ? (Luk 6:45) A wata tigissã bɩ? A sã n pa watẽ, yaa laafɩ kaalem wall bʋʋm sẽn sek yĩng bɩ? (Heb. 10:23-25) D sã n tags modg-kãensã karen-biigã sẽn segd n maanã yelle, d bãngda hal sẽn ta zĩ-bʋg la a sak n deeg koɛɛg ning sẽn sel a sũurã pʋgẽ wã ne sũ-bʋgsem.—Zak 1:21.

Wakat ning d sẽn tõe n bas n pa le zãmsd ned Biiblã. Koe-moond sã n tõog a sũur n zãms ned Biiblã n kaoose, t’a soabã ket n pa modgdẽ, yɩta sõma t’a bas-a la a bao neb nins sẽn sɩd ratã. (Mat. 10:11-13) Sɩd me, wakat ninga yaa sõma tɩ d bas zãmsgã. Pẽg-y karen-biigã a sẽn zoe n maan modgrã, la y wilg-a tɩ ned sã n bãng bũmb Biiblã sẽn yete, a tog n tũume. Y tõe n karma ka-fẽrgdã yel-bũndã a Zezi sẽn wẽ wã t’a kelge, la y wilg-a zĩis toor-toor a naasã bõn-buudã sẽn lʋɩẽ wã, la y yeel-a tɩ yel-bũndã wilgdame tɩ ned sẽn tar sũ-sõng sã n wʋm Rĩungã koɛɛgã, a na n modgame n wilg t’a sakame. Y tõeeme me n sõs ne karen-biigã y sẽn gũus n yã bũmb ningã. Gom-y ne bʋgsem, n wilg-a yell ning sẽn be wã vẽenega. (1 Kor. 14:8, 9) Wilg-y-yã-a t’a sã n tõog n maneg yellã, y tõe n le sɩnga zãmsgã. Y tõe n pɩʋʋgda wakat-wakat n kengd a raoodo.—Ges-y yʋʋmd 1970, tʋʋl-nif kɩʋʋgã Rĩungã Tʋʋmd seb-neng a 4.

D sã n moon koɛɛgã n seg ned sẽn zãms Biiblã n base, yɩta sõma tɩ d bao n bãng a sẽn zãms n kaoos to-to, sẽn yaa ned ning n da zãmsd-a, la bõe yĩng t’a base. Y sã n mi ned ning sẽn da zãms-a Biiblã, bɩ y reng n yã nin-kãng ne tʋʋmdã yel-gɛtã, n yaool n bãng y sã n tõe n le sɩnga Biiblã zãmsg ne-a. Neb kẽer zoe n zãmsa Biiblã ne koe-moondb toor-toore, n pa tol n maan modgr ye. Yaa neb nins sẽn sɩd rat n bãng sɩdã la d tog n bao la d sõnge.