Gũusg Gasg ning wʋmb sẽn pa toogã la yãmb dat bɩ?

Yʋʋmd 2012 wao-fugdg kiuugã Rĩungã Tʋʋmd sebrã pʋgẽ, d ra wilgame tɩ b na n yiisda Gũusg Gasgã ne ãngilind wʋmb sẽn pa toogo. B sɩnga ne yʋʋmd 2011 sẽoog kiuug rasem 15 rẽndã. Yaa vẽeneg tɩ woto sõngda tigims wʋsg neb dũniyã gill zugu. Koe-moondb kẽer sẽn pa karemd ãngilindã sẽn wʋm kibarã, b ra sokda b mens bãmb me sã n na n wa paama Gũusg Gasg a woto b buud-gomdã pʋgẽ.

A Zezi sẽn zãms nebã bũmb ning tɩ be Matɩe sak a 5 n tãag a 7 wã tara pãng wʋsgo, la a goamã wʋmb yaa nana. A leb n pa gom wʋsg ye. “Tʋm-tʋmd sẽn tũud sɩdã” sẽn dat n dɩkd a Zezi togs-n-taarã yĩnga, wakat fãa a maanda a sẽn tõe, n dat tɩ Wẽnnaam nin-buiidã sẽn paamd zãmsg ning b tẽebã kengr yĩngã yɩ zãmsg wʋmb sẽn yaa nana. (Luk 12:42) Woto yĩnga, yʋʋmd 2013 yʋʋm-vẽkr kiuugã tɛka, Gũusg Gasg ning b sẽn yiisd zãmsgã yĩngã na n yita ne farend la portigɛ ne ɛspayõll wʋmb sẽn yaa nana. Zãmsg fãa pʋgẽ, sulã sõore, sogsgã la gom-zu-biyã ne sẽn be Gũusg Gasg a to wã pʋgẽ wã na n tũuda taaba. Yaa gom-biisã võor sẽn na n yɩ nana n yɩɩdã bala. Gũusg Gasgã zãmsg taoor-lʋɩtã la karemdã pa na n get be, sã n pa mikame tɩ nebã fãa la bal zãada rẽ ye. Baasgo, sẽn zãad-b Gũusg Gasg kãngã na n mikame tɩ vɛrse rãmbã la fot-rãmbã yaa a ye. Woto kɩtame tɩ bãmb me tõe n tũ karengã la b leokdẽ. D kɩsa sɩd tɩ na n sõnga neb wʋsg tɩ b “wʋm” Wẽnnaam Gomdã võor sõma, tɩ kẽ b “sũyã,” tɩ b tõog n tũ.—Matɩe 13:14, 15, 19, 23.

Sɩngrẽ wã, tõe tɩ kẽer na n zãada a yiibã n getẽ, n na n bao n bãng Gũusg Gasg ning sẽn yaa nana wã sẽn sõngd-b to-to tɩ b wʋm zãmsgã võor sõma. Ned sã n tagsd tɩ Gũusg Gasg ning sẽn yaa nana wã n yaa sõma ne yẽ, a tõe n yãa sẽn get-b sɛbã yellã n kose, tɩ sã n wa fãa bɩ b kõt-a.