D rɩk no-rɛɛsdbã togs-n-taare: A Amos
1. Bõe yĩng t’a Amos kibarã tõe n keng d raoodo?
1 Yãmb zoe n tagsame tɩ y sẽn pa karem n zãag la y yaa talg yĩnga, y pa tõe n moon koɛɛgã bɩ? Sã n yaa rẽ, a Amos kibarã tõe n kenga y raoodo. A ra yaa pe-kɩɩma, n da send kankamse. Baasgo, a Zeova kõ-a-la a vʋʋsem sõngã t’a moon koɛɛg sẽn tar pãnga. (Amos 1:1; 7:14, 15) Rũndã-rũndã me, yaa sik-m-mens rãmbã la a Zeova yãkd tɩ b tʋmd a tʋʋmdã. (1 Kor. 1:27-29) Sagl-bʋs me la no-rɛɛs a Amos kibarã tõe n kõ-d koe-moonegã wɛɛngẽ?
2. Bõe n kɩt tɩ koe-moonegã sasa, d tõe n tall raood d kɩɩsdbã taoore?
2 D ra bas tɩ kɩɩsdbã tõog-d ye: A Amazia ra yaa Israyɛll buud piigã rĩungã neda, n da yaa sãnem nag-bilã maan-kʋʋda. A sẽn wa n wʋm a Amos sẽn moond koɛɛgã n leok-a to-to wã, yaa wa a sẽn yeel a Amos woto: ‘Loog n kul tɩ tõnd tara d tũudum.’ (Amos 7:12, 13) A Amazia rõda no-rɛɛs a Amos n da rat tɩ rĩm a Zeroboam gɩdg a tʋʋmdã. (Amos 7:7-11) La a Amos pa maan dabeem ye. Rũndã-rũndã me, tũudmã taoor dãmb sẽn dat n nams a Zeova nin-buiidã, b baooda politikã taoor dãmb sõngre. La a Zeova pʋlma tõnd tɩ zab-teed nins fãa nebã sẽn na n tall n zab ne tõndã ka na n tõog ye.—Ezai 54:17.
3. Koe-bʋs la d taasd nebã?
3 D moon Wẽnnaam bʋ-kaoorã koɛɛg la d wilg bark nins sẽn watã: Baa a Amos sẽn taas Israyɛll buud piigã bʋ-kaoor koeesã, a sebrã baasgẽ, a togs-b lame t’a Zeova na n wa lebs n manega b tẽngã, la a wilg-b bark toor-toor sẽn wate. (Amos 9:13-15) Tõnd me taasda nebã Wẽnnaam bʋ-kaoorã daar koɛɛga. La pa rẽ bal ye, d moonda “Wẽnnaam soolem” koe-noogã n yɩɩda. (2 Pɩɛ. 3:7; Mat. 24:14) A Zeova sẽn na n sãam nin-wẽnsã Armagedõ wã na n paka sor tɩ tẽngã lebg arzãna.—Yɩɩl 37:34.
4. Bõe yĩng tɩ d tõe n kɩs sɩd tɩ d tõe n maana a Zeova raabã?
4 Yɩl n moon Rĩungã koɛɛg dũni sẽn pid ne wẽn-kɩɩsdb pʋgẽ pa nana ye. D segd n maoome n wilg tɩ d sẽn dɩk d meng n kõ a Zeova wã, d sɩd tʋll n maana a raabã. (Zã 15:19) La d kɩsa sɩd t’a Zeova na n ket n sõngd-d-la wa a sẽn sõng a Amos to-to wã, tɩ d tõog n tʋm a tʋʋmdã.—2 Kor. 3:5.