D sẽn tõe n zãms neb Biiblã to-to tɩ wom biisi
1. Bõe la koe-moond sẽn zãmsd ned Biiblã segd n maane?
1 Ned pa tõe n tũ a Zeova tɩ pa yẽ n “bool-a ye.” (Zã 6:44) La baasgo, koe-moond fãa segd n sõnga a karen-biig t’a paam d saasẽ Ba wã zoodo. (Zak 4:8) Woto baoodame tɩ koe-moondbã segend zãmsgã. D sã n kɩtdẽ tɩ karen-biigã karemd sull fãa tɩ d sokda sogsgã bala, pa sek a na wʋm koɛɛgã sõma, n lebg kiris-ned ye.
2. Koe-moond sã n dat n zãms ned Biiblã tɩ wom biisi, bõe la a segd n maane?
2 Koe-moond sã n dat n zãms ned Biiblã tɩ wom biisi, a segd n sõng-a lame, 1) t’a wʋm Biiblã sẽn sɩd yet bũmb ningã, 2) t’a sak Biiblã sẽn yetã, 3) la a tũ rẽ a vɩɩmã pʋgẽ. (Zã 3:16; 17:3; Zak 2:26) La tõe n taa kiisi, tɩ karen-biig yaool n tõog n maan woto fãa. Baasgo, a sã n tõog n maan bõn-kãensã a ye fãa, wilgdame tɩ yẽ ne a Zeova zoodã pãng paasdame, la t’a na n wa rɩka a meng n kõ-a.
3. Bõe yĩng tɩ koe-moond segd n sokd a karen-biigã a tagsgo?
3 Karen-biigã tagsg yaa wãn ne Biiblã sẽn yetã?: D sã n dat n bãng karen-biigã sã n wʋmda Biiblã sẽn yetã võore, la a sã n sak n deegame, d segd n sõngd-a lame t’a togsd a tagsgo, la d ra gomd wʋsg ye. (Zak 1:19) Rẽ yĩnga a sɩd wʋmda Biiblã sẽn yetã võor bɩ? A tõe n wilga rẽ ne a meng goam bɩ? A tagsg yaa wãn ne a sẽn bãngã? Rẽ yĩnga a kɩsa sɩd tɩ Biiblã sẽn yetã zemsame bɩ? (1 Tes. 2:13) A miime t’a segd n tũ a sẽn bãngã a vɩɩmã pʋgẽ bɩ? (Kol. 3:10) Yɩl n paam sogs-kãensã leoore, d maag d yĩng n sok karen-biigã t’a togs a tagsgo, la d kelg-a.—Mat. 16:13-16.
4. Sã n yaa toog ne karen-biig t’a wʋm Biiblã sẽn yet wall a tũ, d maanda wãna?
4 Yɩl tɩ ned toeem a tagsg la a manesem, pa nana ye. (2 Kor. 10:5) Karen-biigã sã n pa sak n na n tũ a sẽn bãngã, d maanda wãna? D segd n talla sũ-mare, n bas tɩ Wẽnnaam Gomdã la a vʋʋsem sõngã kẽ a sũurã, n sõng-a t’a toeeme. (1 Kor. 3:6, 7; Heb. 4:12) Sã n yaa toog ne karen-biig t’a wʋm Biiblã sẽn yet wall a tũu, sẽn são yaa d toeem sõsg la d ra modg-a ye. D sã n kell n tall sũ-mar la d wilgdẽ tɩ d nong-a lame, a tõe n wa toeemame.