Yɩɩn-paal Wẽnnaam waoogr yĩnga!
1 Watch Tower Bible and Tract Society of Pennsylvania sẽn maan tigsg ning yʋʋmd 2014 zĩ-likr kiuug rasem a 4 daarã, b yãka yam n na n maneg tõnd yɩɩlã sebre. Ad sɩd yɩɩ kiba-noogo! B tẽega kɛlgdbã yɩɩlã yõod sẽn ta zĩig ning Wẽnnaam tũudmã pʋgẽ.—Yɩɩl 96:2.
2 La tõe tɩ y sokda y meng woto: ‘Bõe yĩng tɩ d yɩɩlã sebr dat manegre?’ Yaa bʋʋm toor-toor yĩnga. Pipi, tõnd sẽn wʋmd Wẽnnaam goamã võor to-to wã paasdame, tɩ d segd n toeem yɩɩlã goam kẽere. (Yel. 4:18) Bʋʋm a yiib-n-soabã yaa tɩ tõnd yɩɩlã goam wʋsg tika Traduction du monde nouveau wã. D sẽn maneg Biibl-kãng goam kẽerã yĩnga, d segd n toeema gom-biis sãnda sẽn be tõnd yɩɩlã sebr pʋgẽ. Manesgã sẽn na n yɩ wʋsgã, d na n paasa yɩɩl a taab d sebrã pʋgẽ.
3 La rẽ yĩnga d segd n gũume tɩ seb-paallã yi tɩ d yaool n sɩng yɩɩl bɩ? Ayo. Yaa ne sũ-noog la d rat tɩ y bãng tɩ ka la kiis a wãna, d na n ninga yɩɩn-kãensã kẽer tõnd sɩtã (jw.org.) pʋgẽ. Yɩɩn-paall sã n yi, d na n ning-a-la tʋʋmdã tigsg na-kẽndrã baasgẽ, la d wilg tɩ yaa “yɩɩn-paalle.”
4 D sẽn na n zãms yɩɩlã to-to: Yɩɩn-paall zãmsg tõe n yɩɩ toogo. La wa yɩɩl-gʋlsdã, tõnd rat n zẽka d koees n yɩɩl tigissã sasa, n da “sĩnd ye.” (Yɩɩl 30:13) Ad sagls a wãn sẽn tõe n sõng-y tɩ y zãms yɩɩlã.
Kelg-y yʋʋmbã teed b sẽn na n ning sɩtã pʋgẽ wã rãamd n yɩlme. Y sã n kelg-b naoor wʋsgo, tẽegrã yɩta nana.
Zãms-y yɩɩllã gom-biis ne zugu.
Tũud-y mizikã n yɩɩndẽ, hal n wa tõe n yɩɩl n pa ges sebrã zug ye.
Zak pʋgẽ Biiblã zãmsgã sasa bɩ y mi n yɩɩnd ne y zakã rãmba, hal n wa bãng yɩɩllã sõma.
5 B sã n wa ning yɩɩn-paall tʋʋmdã tigsg na-kẽndrẽ, tigingã neb na n deng n kelga mizikã sɩngre, n yaool n naag n yɩɩl wa d sẽn minim n maandẽ wã.
6 Wa y sẽn mi wã, d tigissã sasa, d sã n naagd taab n yɩɩnd n pẽgd a Zeova, noom-d lame. Woto yĩnga, d segd n gũusame n da yit yɩɩllã sasa ye. Sã n pa mikame tɩ yaa tɩlae.
7 Bũmb a to me la d tõe n maan n wilg tɩ d nanda d tũudmã yɩɩla. D tigis-kãsemsã sasa, nand tɩ sɛsiõ fãa sɩnge, b rengd n ninga miziki. Yʋʋmd fãa, yaa naoor a yiib la saam-biis ne saam-bi-pogs sẽn yit dũniyã ween-vɩɩs a naasã yãkd b ligdi, n kẽng Patterson sẽn be Niuyork soolmẽ wã n tɩ segl yɩɩn-nood Wẽnnaam waoogrã yĩnga. Woto yĩnga, sɛsiõ wã taoor lʋɩt sã n wa kos kɛlgdbã tɩ b tɩ zĩnd n kelg mizikã, d segd n sakame. Rẽ, d tõogd n segla d meng d sũurã pʋgẽ, n kelg tigsgã sẽn na n sɩngã.—Ɛs. 7:10.
8 Rũndã, d tigsgã baasgẽ, d na n yɩɩla yɩɩn-paalle, t’a gom-zugã yaa: “Rĩungã luglame: Bɩ a wa!” Tigsg ning siglgã sẽn maand yʋʋmd fãa wã sasa, b yɩɩla yɩɩn-kãngã n wilg tɩ yaa yʋʋm 100 masã la Wẽnnaam Rĩungã Rĩm dɩt naam.e
9 Sãmbg sẽn ka be, yɩɩn-paalã yaa “bõn-sõma” sẽn yit a Zeova nengẽ. (Mat. 12:35a) Bɩ d mao n zãms-b sõma n wa tõe n yɩɩl-b ne d sũy fãa n pẽg d Wẽnnaamã.—Yɩɩl 147:1.