D tall bas-m-yam t’a Zeova na n kogla tõndo, dũni-kãngã saabã sasa

Ka la bilfu, a Zeova sẽn maand sũ-mar ne dũni-kãnga wã na n talla tɛka. B na n wa sãama ziri tũudmã, tẽns-tẽns sẽn lagem taab n na n wa zab ne Wẽnnaam nin-buiidã, a Zeova na n wa sãama nin-wẽnsã Armagedõ zabrã sasa me. Kiris-nebã gũuda sasa kãensã sẽn tar yõod wʋsgã.

Yaa sɩd tɩ d pa mi yɛlã fãa to-kãsengã wɛɛngẽ ye. Wala makre, d pa mi to-kãsengã sẽn na n sɩng wakat ning takɩ ye. D pa mi politik sulã sẽn na n wa tik bũmb nins n yik zabr ne tũudmã ye. D pa mi tẽns-tẽnsã sẽn lagem taabã sẽn na n zab ne Wẽnnaam nin-buiidã sẽn na n kaoos to-to, pa rẽ bɩ sẽn na n yɩ to-to ye. Sẽn paase, d pa mi bũmb nins a Zeova sẽn na n wa tũnug ne n sãam nin-wẽnsã Armagedõ zabrã sasa ye.

La Biiblã sõngda tõnd tɩ d bãng bũmb nins sẽn yaa tɩlɛ ne-dã, sẽn na yɩl tɩ d tall bas-m-yam la raoodo, bũmb nins sẽn na n wa maan beoog-daarã yĩnga. Wala makre, d miime tɩ d bee “yaoolem wakatã” saabẽ. (2 Tɩm. 3:1) D miime tɩ b sẽn na n zab ne tũudmã n kaoos to-to wã wɛɛngẽ, b na n ‘booga ra-kãens sõore,’ sẽn na yɩl tɩ b ra wa sãam tũudum hakɩɩkã ye. (Mat. 24:22) D miime t’a Zeova na n wa fãaga a nin-buiidã. (2 Pɩy. 2:9) Sẽn paase, d miime tɩ soab ning a Zeova sẽn yãk t’a na n sãam nin-wẽnsã la a kogl kʋʋn-kãsengã neb Armagedõ zabrã sasa wã yaa tɩrlem soaba, la pãng soaba.—Vẽn. 19:11, 15, 16.

Yaa vẽeneg tɩ bũmb nins sẽn na n wa maanã na n kɩtame tɩ nebã ‘sob rabeemã yĩnga.’ La d sã n bʋgsd a Zeova sẽn fãag a nin-buiidã to-to pĩnd wẽndẽ wã zugu, la a sẽn vẽneg bũmb nins n togs beoog-daarã wɛɛngẽ wã zugu, d tõe n ‘yik n yalsame la d nak n gese,’ n tall bas-m-yam tɩ d fãagrã kolgdame.—Luk 21:26, 28.