Yãmb ra miime bɩ?

Bõe yĩng tɩ pĩnd Israyɛll nebã ra yaood pʋg-beoleng yaoodo?

Pĩnd wẽndẽ wã, rao sã n da wa rat pag n kẽ kãadem, a ra segd n yaoo pagã roagdb pʋg-beoleng yaoodo. Ra tõe n yɩɩ ligdi, rũmsi, wall teed sẽn tar yõod wʋsgo. Wakat ninga, raoã ra segd n tʋm n kõo bi-puglã roagdba, wa sẽn yɩ to-to ne a Zakoobã. A Zakoob sak n tʋma yʋʋm a yopoe n kõ a Rasɛll ba wã, n yaool n na n paam n kẽ kãadem ne a Rasɛlle. (Sɩng. 29:17, 18, 20) Bõe yĩng tɩ b ra yaood pʋg-beoleng yaoodo?

Biibl-mit a ye yʋʋr sẽn boond t’a Carol Meyers yeelame: “Pʋg-beoleng yaoodã bi-puglã roagdb sẽn da reegdã yaa sẽn na n dol tʋʋmd ning bi-puglã sẽn da tʋmd n sõngd zakã rãmb koobã wɛɛngẽ wã.” Tõeeme me tɩ pʋg-beoleng yaoodã ra kɩtdame tɩ zems-n-taar ning sẽn be bi-puglã roagdb ne raoã roagdb sʋkã pãng paase. Zag-kãensã a yiibã neb ra tõe n sõnga taab toog wakate. Sẽn paase, yaoodã ra wilgdame tɩ b rɩka bi-puglã n kõ sɩda, la t’a na n yii a roagdbã zakẽ n kẽng a sɩdã nengẽ t’a tɩ get a yell masã.

Pʋg-beoleng yaoodã ra pa wilgd tɩ b koosa bi-puglã wall b ra-a lame ye. Rẽ wɛɛngẽ, sebr a yembr yeelame: “Pĩnd Israyɛllẽ wã, sẽn da yaa tɩlɛ tɩ b kõ bi-pugl roagdb ligd bɩ bũmb a to wã ra wõnda b raa bi-puglã. La yaool n pa woto ye. Wõnda pʋg-beoleng yaoodã ra yaa sẽn na n dol tʋʋmd ning bi-puglã sẽn da tʋmd n sõngd zakã rãmbã, la pa sẽn na n da-a ye.”

Rũndã-rũndã, tẽns kẽer pʋsẽ, nebã ket n deegda pʋg-beoleng yaoodo. Roagdb nins sẽn yaa kiris-nebã sã n na n kos pʋg-beoleng yaoodo, b pa segd n deeg tɩ loog nug ye. Woto, b kɩtdame tɩ ‘nebã fãa yã tɩ b yaa neb sẽn pa dem-dem ye.’ (Fili. 4:5; 1 Kor. 10:32, 33) Leb n wilgdame tɩ b pa “neb sẽn nong ligdi,” wall rat-tɩ-loog-rãmb ye. (2 Tɩm. 3:2) Sẽn paase, roagdb sẽn yaa kiris-neb sã n pa kos pʋg-beoleng yaood sẽn loog nugu, pa na n yɩ tɩlɛ tɩ raoã bas pagã sẽn na yɩl n tɩ bao ligd wʋsg n wa yao yaoodã ye. Raoã sã n yaa so-pakda, a pa na n getẽ t’a segd n basa so-pakrã tʋʋmde, n bao tʋʋmd a to n dɩk a sẽkã fãa n tʋme, sẽn na yɩl n paam ligd zembal n wa yao pʋg-beoleng yaoodã ye.

Tẽns kẽer pʋsẽ, goosneema wã yiisa noy pʋg-beoleng yaoodã wɛɛngẽ. Rẽ wɛɛngẽ, kiris-nebã segd n tũu tẽngã laloa wã. Bõe yĩnga? Bala Wẽnnaam Gomdã yeta kiris-nebã tɩ b “sak nanambsã,” la b sak noy nins b sẽn yiisdã, sã n mik tɩ pa kɩɩsd Wẽnnaam noyã ye.—Rom. 13:1; Tʋʋ. 5:29.