Segl-y y meng y sũurã pʋgẽ

D sã n wa zãmsd Biiblã, d ratame tɩ bũmb nins d sẽn bãngd a Zeova zugã kẽ d sũurã. A Ɛsdras kõo mak-sõng rẽ wɛɛngẽ, bala a “ra yãka yam a sũur pʋgẽ n na n vaees a Zeova Tõogã.” (Ɛsd. 7:10) Bõe la d tõe n maan n segl d mens d sũyã pʋsẽ?

Pʋʋs-y-yã. Nand tɩ y sɩng zãmsgo, pʋʋs-y-yã. Kos-y-yã a Zeova t’a sõng-y tɩ y wʋm bũmb ning y sẽn na n zãmsã võore, la y tõog n tũ.—Yɩɩn. 119:18, 34.

Bɩɩs-y sik-m-menga. Wẽnnaam solgda sɩdã ne neb nins sẽn yaa wuk-m-mens rãmb n teeg b meng bãngrã. (Luk 10:21) Ra maand-y vaeesg y sẽn dat n wilg nebã y bãngr yĩng ye. Y sã n wa mik tɩ y tagsa wã pa zems ne Wẽnnaam rẽndã, bɩ y sik y meng n toeeme.

Kelg-y Rĩungã yɩɩlle. Mizik kẽeda sũuri. Dẽnd d sã n deng n kelg Rĩungã yɩɩll n yaool n sɩng Biiblã zãmsgo, na n sõng-d lame tɩ d segl d mens sõma tɩ zãmsgã kẽ-do.