Yãmb ra miime bɩ?

Bõe la maan-kʋʋdbã sẽn da be Zerizalɛm wẽnd-doogẽ wã ra maand ne rũmsã b sẽn kʋʋd n maand maandã zɩɩm?

YƲƲMD fãa, pĩnd wẽndẽ Israyɛllã maan-kʋʋdb ra kʋʋda rũms tusa n maand maand wẽnd-doogã tẽn-kugr zugu. Zʋɩf-rãmbã kʋdemd yɛl-mit a Zozɛf yeelame tɩ Pak fãa, b ra kʋʋda pe-bi tus kobs-yi la pis-nu la zaka. Rũms wʋsg a woto zɩɩm ra yaa wʋsgo. (Maan. 1:10, 11; Sõd. 28:16, 19) Bõe la b ra maand ne zɩɩmã?

Tẽn-vaeesdbã sẽn vaees wẽnd-doog ning a Erood sẽn me wã yãame tɩ bũmb toor-toor la b ra maan sẽn na yɩl tɩ zɩɩmã zoet n yit wẽnd-doogẽ wã. Yaa wẽnd-do-kãng pʋgẽ la Zʋɩf-rãmbã ra waoogd Wẽnnaam n tãag b sẽn sãam-a yʋʋmd 70 soabã.

Ad bũmb a yiib b sẽn da maane:

• B ra tuu bogd tẽn-kugrã tẽngre: Miisna wã pʋgẽ, b wilga b sẽn da maan bũmb ning tẽn-kugrã sẽn beẽ wã. Yaa sebr sẽn gomd Zʋɩf-rãmbã noy yell b sẽn gʋls yʋʋmd 200 soabã loogr poore. Sebrã pʋgẽ, b yeelame tɩ bogd a yiib la b ra tu tẽn-kugrã kɩreng a yembre, tɩ zɩɩmã ne koomã b sẽn tar n pekd tẽn-kugrã tũud be n zoet n kẽed Sedrõ longẽ wã.

  Tẽn-vaeesdbã sẽn vaees n yã bũmb ninsã wilgdame tɩ sɩd yaa woto. Sebr a ye sẽn gomd Zʋɩf-rãmbã kʋdemdã yell yeelame tɩ tẽn-vaeesdbã yãa ko-soay wẽnd-doogã sɛɛga, la tɩ tõe tɩ ra yaa sẽn na yɩl tɩ maandã zɩɩmã la koomã tõe n tũud be n zoet n yit wẽnd-doogẽ wã.

• B ra wata ne koom wʋsgo: Sẽn na yɩl tɩ tẽn-kugrã la bogdã b sẽn tu wã kell n yɩ yɩlemde, maan-kʋʋdbã ra rata koom wʋsgo. Bũmb toor-toor la b ra maan tẽngã pʋgẽ tɩ maan-kʋʋdbã tõe n paam koom wa b sẽn date. Bãgse, bulsi, ko-soay la bũmb a taab b sẽn da maan tɩ koomã zoet n wat wẽnd-doogẽ wã n da be be. Tẽn-vaeesd a Joseph Patrich yeelame tɩ pĩnd wẽndẽ wã, wẽnd-doog a to kae tɩ b sigl yɛlã sõma woto n tõe n paamd koom tɩ sekdẽ, n yɩlgd zĩigã tɩ ko-rẽgdã zoet n yit me ye.