SOGSG KOM-BƖƖSÃ SẼN SOKDE
Mam pa nong lekollã ye: M maanda wãna?
Karen-saam-dãmb sẽn yaa dem-deme. Karen-bi-taasã pẽdgre. Ɛgzame-rãmbã poorẽ yɩɩre, la devoaar-dãmb wʋsgã f sẽn segd n maan zakẽ wã. Woto fãa yĩnga f sã n yeel tɩ f pa nong lekollã f bee bʋʋm.a Bi-pugl a ye yʋʋr sẽn boond t’a Rasɛllb yeelame yaa:
“Sẽn yaa zĩig ning fãa la m be, sãoo m sẽn na n be lekollẽ wã. M nonga m sẽn na n be mogrã noore, ne m zo-rambã, wall n sõngd m roagdbã n segendẽ bɩ n yɩlgd zakã!”
Fo-me sã n tagsd wa a Rasɛlle, f tõe n getame tɩ lekollã yaa wa b sẽn ning-f bãens roogo, tɩ f segd n tõog toog hal n tãag f karengã baasgẽ. Bũmb bee f sẽn tõe n maan n toeem f sẽn get lekollã to-to wã bɩ?
Fo miime bɩ? F sã n toeem f tagsgã lekollã wɛɛngẽ, f bãngda f sẽn tõe n maan yɛlã to-to, n pa le getẽ tɩ lekollã yaa zɩɩb ye. Lekollã na n sõng-f lame tɩ f paam minim sẽn na n naf foo, f sã n wa lebg kãsma.
Sẽn na yɩl n toeem yam lekollã wɛɛngẽ, bɩ f tags sẽn pʋgdã yelle:
F karengã. Fo sã n karme, na n sõng-f lame tɩ f tõog n mao ne zu-loees f sẽn na n paam tʋʋmã zĩigẽ la vɩɩmã nens a taabã pʋgẽ, n pa teegd neb a taabã wakat fãa ye. Sok f meng yaa: ‘Baa m sã n pa nong bũmb kẽer lekollã wɛɛngẽ, wãn to la karengã nafd maam?’
Biiblã saglga: “Bĩng yam, la f tagsd sõma wakat fãa.”—Yel-bũnã 3:21.
F sã n dat n bãng n paase, bɩ f ges sõsg ning gom-zug sẽn yaa: “M sã n pa paam not-sõma lekollẽ wã, bõe la m tõe n maane?”
F sẽn minim n maand bũmb ninsã. Minim-sõma nins f sẽn zãms lekollẽ wã tõe n sõng-f lame tɩ f bãng n sigl f sẽkã, tɩ f yɩ ned sẽn tõe n wõr a menga, la ned sẽn nong tʋʋma. Rẽ yaa bũmb sẽn na n yɩ tɩlɛ ne-fo, f sã n wa lebg kãsma. Sok f meng yaa: ‘Wãn to la minim-sõma wã m sẽn paam lekollẽ wã sõngd-m tɩ m yaa ned sẽn tõe n wõr a menga, la ned sẽn nong tʋʋma? Bõe wɛɛngẽ la m tõe n modg n paase?’
Biiblã saglga: “Tʋʋm-toog buud fãa tara yõodo.”—Yel-bũnã 14:23.
F sã n dat n bãng n paase, bɩ f ges sõsg ning gom-zug sẽn yaa: “Wãn to la m tõe n sigl m sẽkã tɩ zemse?”
Foo ne f taabã zems-n-taare. F sã n sõsd ne f karen-bi-taasã lekollẽ wã, tõe n sõng-f lame tɩ f bɩɩs nimbãan-zoeer la f waoogd f taabã. Bi-bɩɩg a ye yʋʋr sẽn boond t’a Zozuwe yeelame tɩ “f sã zãms goam la kelgre, tara yõod wa f sẽn zãmsd kʋdemdã yɛl la siãnsã. Yaa minim sẽn na n sõng foo f vɩɩmã tõre.” Sok f meng yaa: ‘Bõe ne bõe la m bãng lekollẽ wã, m manesem sẽn tog n yɩ to-to ne m taabã wɛɛngẽ, baa neb nins yɛl wall b sẽn tẽed bũmb ninsã sẽn yaa toor ne maamã?’
Biiblã saglga: “Bao-y laafɩ ne nebã fãa.”—Ebre-rãmbã 12:14.
F sã n dat n bãng n paase, bɩ f ges sõsg ning gom-zug sẽn yaa: “Bõe la m tõe n maan n paas m minimã sõs ne nebã wɛɛngẽ?”
Beoog sẽn wate. Lekollã tõe n sõng-f lame tɩ f bãng zĩig ning f sẽn tar minim n tɩ yɩɩdã, tɩ f tõe n tik rẽ n yãk f sẽn na n maan beoog sẽn wate. Pʋg-bɩɩg a ye yʋʋr sẽn boond t’a Brook yeelame yaa: “F tõe n paamame meng tɩ b sõng-f tɩ f paas f minimã bũmb ning wɛɛngẽ, wa mam sẽn maanã. Woto f sã n wa karem n sa, f tõe n sɩnga tʋʋma.” Sok f meng yaa: ‘M sã n wa karem n sa, bõe la m tõe n maan n ges m mengã yelle? M maanda wãn n bãng tɩ m sẽn zãmsd bũmb ningã zemsa ne tʋʋmd ning m sẽn dat n wa tʋmã?’
Biiblã saglga: “Tags sor ninga fo sẽn tũuda yelle.”—Yel-bũnã 4:26, Wẽnnaam Sebre 1983.