Tull-y n bas-y sɩgaarã ne y sũur fãa

“Bũmb ning sẽn sõng sɩga-yũudbã n tɩ yɩɩd tɩ b tõog n bas sɩgaarã yũubã, yaa b sẽn da rat rẽ ne b sũur fãa wã.”—“Stop Smoking Now!”

KOƐƐG-KOƐƐGA, y sã n dat n bas sɩgaarã yũubu, sẽn tar yõod n tɩ yɩɩd yaa tɩ y sẽn na n dat n bas rẽ ne y sũur fãa. Bõe la y tõe n maan tɩ kɩt tɩ y rat n bas sɩgaarã ne y sũur fãa? Ad bũmb a yembre: Tags-y n ges-y y sẽn na n bas sɩgaarã yũubã sẽn na n naf yãmb to-to wã.

Y na n tõog n kẽgsa ligdi. Y sã n yũud sɩgaar pake daar fãa, yaa dolaarã ligd milyõ tusa la y yiisd yʋʋmd fãa. “M zɩɩ n bãng tɩ m da sãamda ligd wʋsg sɩgaarã yũub pʋgẽ ye.”—A Gyanu sẽn yit Nepal.

Y na n paama sũ-noog n paase. “Yaa m sẽn bas sɩgaarã yũubã la m paam sũ-noogo. M yĩnsã laafɩ me ra paasdame.” (A Regina sẽn yit Afirikdisiid) Ned sã n bas sɩgaarã yũubu, a tõe n maneg n wʋma bũmb toor-toor yũugu, a tõe n lemba bũmb toor-toor n bãng b noosem, a yĩnsã keelem paasdame, a neermã me na n paasame.

Y yĩnsã laafɩ wã na n paasame. “Rap la pagb nins fãa sẽn basd sɩgaarã yũubã nee rẽ yõodã zĩig pʋgẽ, b yĩns laafɩ wã wɛɛngẽ.”—Centre américain d’épidémiologie.

Y na n maneg n kɩsa y meng sɩda. “M basa sɩgaarã yũubu, bala m da pa rat tɩ sɩgaarã yɩ m zu-soab ye. M da rat n sooga m mengã.”—A Henning sẽn yit Danemark.

Na n nafa y zakã rãmb la y zo-rãmbã. “Sɩgaarã yũubã . . . sãamda neb nins sẽn be ne yãmbã yĩnsã laafɩ. . . . B maana vaeesg n mik tɩ yʋʋmd fãa, neb nins sẽn be ne sɩga-yũudb n vʋʋsd sɩgaarã bug-zõosã bãmb tusã n maand kaalem fulfuud kãnsɛɛr yĩnga, la sũur bãag yĩnga.”—Société américaine du cancer.

Y na n nooga y Naandã sũuri. Biiblã yetame yaa: “M nin-nongdse, . . . bɩ d yɩlg d mens n yiis rẽgd buud fãa sẽn yaa yĩngã rẽnda.” (2 Korẽnt rãmbã 7:1) Biiblã paasame: “Kõ y yĩnsã tɩ yɩ maoong . . . sẽn yaa sõngo, sẽn tat Wẽnnaam yam.”—Rom dãmbã 12:1.

“M sẽn wa n bãng tɩ Wẽnnaam kisa bũmb nins sẽn dẽgemd yĩngã, m yãka yam n na n bas sɩgaarã yũubu.”—A Sylvia sẽn yit Ɛspayn.

La naoor wʋsgo, d sã n dat n maan bũmb bala pa sek ye. D tõeeme me n dat neb a taabã sõngre. Wala makre, d zakã rãmb la d zo-rãmbã sõngre. Bõe la b tõe n maan n sõnge?