Rao sẽn pa rabɛɛma

NEBÃ ra lebgda wʋsgo. Bãmb wʋsg ra tʋmda tʋʋm-​wẽns wa a Kayẽ. La ned a ye n da pa woto ye. Yaa a Enoke. A Enok ra pa rabɛɛm ye. Nebã fãa ra yaa nin-​wẽnse, la a Enok ra ket n tũuda Wẽnnaam.

Yãmb mii bũmb ning sẽn kɩt tɩ nebã ra tʋmd tʋʋm-​wẽnsã bɩ? Tags-⁠y n ges-⁠y-​yã. Yaa ãnd n kɩt t’a Ãdem ne a Hawa kɩɩs Wẽnnaam n dɩ tɩɩgã bila? Yaa malɛg-​wẽng ning b sẽn boond Biiblã pʋgẽ t’a Sʋɩtãanã. A Sʋɩtãan datame tɩ nebã fãa lebg wẽnse.

Daar wa n taame tɩ Wẽnnaam a Zeova yeel a Enok t’a tɩ togs nebã yaa: ‘Wẽnnaam na n wa sãama nin-​wẽnsã fãa.’ La nebã sẽn wʋm rẽ wã, b sũyã segd n puugame. Tõeeme meng tɩ b makame n na n kʋ a Enoke. La a Enok ra segd n talla raood wʋsgo, sẽn na yɩl n tõog n togs nebã Wẽnnaam sẽn na n maan bũmb ningã.

Wẽnnaam pa sak t’a Enok vɩɩmd nin-​wẽnsã sʋk n kaoos ye. A Enok paama yʋʋm kobs-​tã la pis-​yoob la a nu bal n yaool n ki. Bõe yĩng tɩ d yet tɩ ‘yʋʋm kobs-tã la pis-​yoob la a nu bala’? Bala wakat kãnga, nebã ra tara keelem n yɩɩd rũndã-rũndã nebã, la b ra vɩɩ n kaoosdame n yɩɩd tõndo. Wala makre, a Enok biig a Metusela paama yʋʋm kobs-⁠wɛ la pis-​yoob la a wɛ n yaool n ki!

A Enok kũumã poore, nebã wẽnemã paasame. Biiblã yetame tɩ ‘nebã tagsg fãa ra yaa wẽng bala,’ la tɩ ‘wẽngã ra yaa wʋsg dũniyã zugu.’

Yãmb mii bũmb ning sẽn kɩt tɩ wẽngã ra yaa wʋsg wakat kãngã wã bɩ? A Sʋɩtãan ra le paama yam-​wẽng a to n na n belgd nebã tɩ b tʋmd tʋʋm-​yoodo. D na n goma rẽ yell masã.