B koosa a Zozɛfe

BI-​BƖƖG ning raoã sẽn gãdã nimbãaneg pa tar yãmb sɩda? A yʋʋr la a Zozɛfe. A kẽem dãmbã rɩk-⁠a lame n koos ne rap sẽn debd Ezipti. A Zozɛf sã n ta be, a na n lebga yamba. La bõe yĩng t’a kẽem dãmbã maand woto? Yaa sũ-kiir yĩnga.

B ba a Zakoob nonga a Zozɛf hal wʋsgo. A sẽe kasaab-​neer meng n kõ-a. A kẽem dãmbã sẽn ne tɩ b baabã nonga a Zozɛf wʋsgã yĩnga, sũ-kiir yõk-⁠b lame, tɩ b kisg-⁠a. Bʋʋm a to me n da kɩt tɩ b kis-⁠a.

A Zozɛf gãandame n zãms naoor a yiib fãa t’a kẽem dãmbã wõgemded a taoore. A Zozɛf sẽn togs a kẽem dãmbã, b kisg-⁠a lame n paase.

Raar a yembre, a Zozɛf kẽem dãmbã ra bee weoogẽ n gũud b ba a Zakoob piisã. A Zakoob tʋma a Zozɛf t’a tɩ ges a kẽem dãmbã. A Zozɛf kẽem dãmbã sẽn wa n ne-⁠a t’a watẽ wã, kẽer yeelame tɩ b wa tɩ b kʋ-⁠a. La a Rubɛn sẽn yaa b fãa kẽemã yeelame tɩ b ra kʋ-⁠a ye. B yõk-⁠a lame n tɩ lob bul-​koɛɛng pʋgẽ, n yaool n na n zĩnd n tags n ges b sẽn na n maan-⁠a bũmb ninga.

Rẽ poor bilfu, b yãa a Ismaɛll buudã neb sẽn pɩʋʋgde, t’a Zida yeel tɩ b koos a Zozɛf ne Ismaɛll nebã. B sɩd koos-⁠a lame n deeg wanzuri ligd 20. Ad a Zozɛf kẽem dãmbã sɩd ra yaa nin-​wẽnse!

La bõe la a Zozɛf kẽem dãmbã ra na n tɩ yeel b baaba masã? B kodga boɛɛga, n dɩk boɛɛgã zɩɩmã n bol a Zozɛf fu-​neerã tɩ moog sõma. B sẽn ta yirã, b rɩka fuugã n tɩ wilg b ba a Zakoob n yeel woto: ‘Tõnd yãa fu-​kãngã n dɩke. Bɩ y reeg n ges ka a Zozɛf fuugã la woto?’

A Zakoob sẽn ges fuugã, a bãngame tɩ yaa a Zozɛf rẽndã. A kelmame n yeel tɩ ‘we-​rũng n kʋ a Zozɛfe.’ Yaa woto la a Zozɛf kẽem dãmbã da rat tɩ b ba wã tagse. B ba wã sũur sãamã wʋsg t’a yãb rasem ka tɛka. La a Zozɛf ra pa ki ye. D ges bũmb ning sẽn paam-⁠a Ezipti.