A Zozɛf bee bãens roogẽ

B SẼN wa n tall a Zozɛf n kẽng Eziptã t’a tara yʋʋm 17 bala. Yaa rao a ye sẽn boond t’a Potifaar n da-⁠a t’a lebg a yamba. A Potifaar ra yaa Ezipt naab a Faraõ sodaasã taoor soab a ye.

A Zozɛf ra tʋmda sõma n kõt a zu-​soab a Potifaare. Rẽ n so t’a Zozɛf sẽn wa n lebg kãsengã, a Potifaar kɩtame t’a get a zakã fãa yelle. La bõe yĩng t’a Zozɛf be bãens roogẽ? Yaa a Potifaar pagã n maane.

A Zozɛf bɩɩme n lebg ra-​sãnga, t’a Potifaar pagã rat t’a Zozɛf gãand-⁠a. La a Zozɛf pa sak ye, bala a miime tɩ yaa wẽnga. A Potifaar pagã sũur puugame. A sɩdã sẽn yi tʋʋmã n wa wã, a yaga ziri t’a Zozɛf baoome n na n gãand yẽ. A Potifaar ra tẽedame t’a pagã togsda sɩda. A sũurã puuga wʋsg ne a Zozɛf t’a kɩt tɩ b tɩ pag-⁠a bãens roogẽ.

Ned ning sẽn gũud bãensã roogã wa n mikame t’a Zozɛf yaa nin-​sõngo, t’a yeel-⁠a t’a ges neb a taabã sẽn be bãensã roogẽ wã fãa yelle. Raar a yembre, ned ning sẽn get a Faraõ rɩɩbã yellã, la ned ning sẽn yaa a rã-kɩtã maaname t’a Faraõ sũurã puugi, t’a kɩt tɩ b kẽes-⁠b bãens roogẽ. Yʋng a yembre, b yiibã fãa gãandame n zãmse, la b ra pa mi b zãmsdã võor ye. La vẽkembeoogã, a Zozɛf yeel-⁠b lame tɩ b togs yẽ b sẽn zãms bũmb ningã. B sẽn togs-⁠a wã, Wẽnnaam sõnga a Zozɛf t’a wilg-⁠b b zãmsdã võore.

A Zozɛf yeela rã-kɩtã woto: ‘Ra-​tãta, b na n yiis-⁠a foo bãensã roogẽ, tɩ fo lebg a Faraõ rã-kɩt yɛsa. La fo sã n wa yi, bɩ f gom mam yell ne a Faraõ t’a yiis-⁠m bãensã roogẽ.’ La a Zozɛf yeela ned ning sẽn geta rɩɩbã yell yaa: ‘Ra-​tãta, a Faraõ na n kɩtame tɩ b fiuug fo zugã.’

Ra-​tãt-⁠n-​daarã sẽn sɩd ta, a Faraõ kɩtame tɩ b fiuug sẽn geta rɩɩbã yellã zugu, la a kɩt tɩ b yiis rã-kɩtã bãensã roogẽ. La rã-kɩtã sẽn lebs n sɩng a tʋʋmdã a Faraõ nengẽ wã, a yĩma a Zozɛf yell fasɩ! A pa gom a Zozɛf yell ne a Faraõ ye. A Zozɛf kell n paa bãensã roogẽ.