Pãng soab a Samsõ

YÃMB mii rao ning sẽn tall pãng n yɩɩg nebã fãa wã yʋʋr bɩ? Yaa bʋ-​kaood a Samsõ. Yaa a Zeova n da kõ-a a pãngã. Nand t’a Samsõ rog menga, a Zeova yeela a Samsõ ma wã yaa: ‘Fo na n dɩka pʋg n dog bi-​ribl ka la bilfu. Yaa yẽ n na n fãag Israɛll nebã Filisti nebã nugẽ.’

Filisti nebã ra yaa nin-​wẽns sẽn vɩ Kanaã. B ra tara sodaas wʋsgo. B sodaasã ra namsda Israɛll nebã hal wʋsgo. Raar a yembre, a Samsõ ra wa n debda Filisti nebã nengẽ, n tek n seg bõn-​yẽeg sẽn kelemde. La a Samsõ kʋʋ bõn-​yẽegã ne a nusã bala. A kʋʋ Filisti neb wʋsg me.

A Samsõ wa n yãa pʋg-​sad a ye n nongẽ. Pʋg-​sadã yʋʋr la a Dalila. Filisti nanambsã yeela a Dalila t’a sã n tõog n wilg-⁠b bũmb ning sẽn kɩt t’a Samsõ tar pãng wʋsg woto wã, bãmb ned kam fãa na n kõ-a-⁠la wanzuri ligd koeems tusr la koabga. Yaa ligdã la a Dalila ra rata. A ra pa nong a Samsõ ne Wẽnnaam nebã ye. A pẽdga a Samsõ n dat t’a togs-⁠a bũmb ning sẽn kɩt t’a tar pãng wʋsgã.

A Dalila wa n tõog n kɩtame t’a Samsõ na n togs-⁠a. A Samsõ yeel-⁠a lame yaa: ‘Mam sẽn dogã tɛka, b zɩ n wõrs mam zugã zoobd ye. Mam yaa Nazireẽ, sẽn dat n yeel tɩ yaa Wẽnnaam n so maam m yõor tɛka. Mam sã n põng m zugã, mam pãngã na n sɛɛme.’

A Dalila sẽn paam t’a Samsõ togs-⁠a woto wã, a maaname t’a Samsõ gũs a karsã zugu, t’a bool ned t’a na n wa wõrs a zoobdã. A Samsõ sẽn wa n nekã, a mikame t’a pãngã boogame t’a lebg wa neb a taabã. Filisti nebã wa n yõk-⁠a lame n feo a ninã, n maan-⁠a b yamba.

Raar a yembre, Filisti nebã maana kibs kãseng n na n waoog b wẽnnaam a Dagõ. B kɩtame tɩ b yiis a Samsõ bãens roogẽ n tall-⁠a n wa tɩ b na n yaal-⁠a la b paoog-⁠a. La a Samsõ zoobdã ra paam n tobame. A Samsõ yeela bi-​ribl ning sẽn da tɛt-⁠a wã t’a sõng-⁠a t’a tik roogã tẽn-​sʋk lals a yiib nins sẽn zãad roogã. A Samsõ sẽn paam n ta lalsã zĩigẽ wã, a pʋʋsa a Zeova n yeel t’a kõ-a pãnga, n yaool n tik lalsã n kelem tɩ: ‘M na n lagma Filisti nebã n ki.’ Yaa Filisti neb tus a tãab n da be kibsã zĩigẽ. A Samsõ tika lalsã n tus ne a pãngã fãa tɩ siig n kell n kʋ-⁠b fãa.