Malɛk n gom ne a Maari

PƲG-​SAD ning yãmb sẽn ne fotã zugã yʋʋr la a Maari. Yaa Israɛll pʋg-​sad sẽn be Israɛll tẽng a ye sẽn boond tɩ Nazarɛte. Wẽnnaam miime t’a yaa pʋg-​sõngo. Yaa rẽ n so t’a tʋm a malɛk a Gabriyɛll t’a tɩ gom ne-⁠a. Yãmb mii a Gabriyɛll sẽn wa n yeel a Maari bũmb ning bɩ?

A Gabriyɛll yeela a Maari yaa: ‘Mam pʋʋsda foo, bala fo yaa ned Wẽnnaam sẽn ning barka. A Zeova bee ne foom.’ A Maari ra nan zɩ n yã nin-​kãngã ye. A yɛɛsame, bala a ra pa wʋmd a Gabriyɛll goamã võor ye. La a Gabriyɛll yeel-⁠a lame yaa:

‘Maari, da zoe rabeem ye; tɩ bõe, Wẽnnaam ninga foo barka. A na n kɩtame tɩ fo rɩk pʋg n dog biiga, n pʋd a yʋʋr t’a Zezi.’

A Gabriyɛll paasa woto: ‘Biigã na n yɩɩ nin-​kãsenga, la b na n boond-⁠a lame tɩ Wẽnnaam Sẽn-⁠ka-⁠to biiga. A Zeova na n kɩtame t’a lebg rĩm wa a Davɩɩde, la a na n dɩɩ naam wakat fãa, la a naamã ka na n sɛ abada!’

La a Maari soka a Gabriyɛll yaa: ‘Mam na n maana wãn n tõog n dog biig tɩ m nan ka kẽ kãadem la m ka mi raoa?’

A Gabriyɛll yeel-⁠a lame yaa: ‘Wẽnnaam pãngã na n buii foom. Woto yĩnga, b na n boonda biig ning fo sẽn na n dogã tɩ Wẽnnaam biiga. Gese, fo roagd a Elizabɛt me rɩka pʋga. Nebã ra yetame t’a kʋʋlame n pa tõe n le paam biig ye. La a na n doga bi-​ribla. Tɩ bõe, bũmb ka be Wẽnnaam sẽn ka tõe ye.’

Rẽ masã a Maari yeelame yaa: ‘Mam yaa a Zeova tʋm-​tʋmda. Bɩ a kɩt tɩ kell n yɩ wa yãmb sẽn yeelã.’ La malɛka loogame.

A Maari kẽnga tao-​tao n na n tɩ ges a Elizabɛte. A Maari sẽn ta a Elizabɛt nengẽ wã, a Elizabɛt wʋma a koɛɛgã, la biigã sẽn da be a Elizabɛt pʋgẽ wã sũur yɩɩ noog t’a virsi. A Elizabɛt pida ne Wẽnnaam vʋʋsem sõngã, la a yeela a Maari yaa: ‘Wẽnnaam ninga foo bark pagbã fãa sʋka.’ A Maari zĩnda ne a Elizabɛt n kolg kiis a tãab n yaool n lebg n kul Nazarɛte.

A Maari ra segd n kẽe kãadem ne a Zozɛfe. La a Zozɛf sẽn wʋm t’a Maari tara pʋgã, a ra pa rat n kẽ kãadem ne-⁠a yɛs ye. La Wẽnnaam malɛkã yeela a Zozɛf yaa: ‘Kẽ kãadem ne a Maari la f ra zoe rabeem ye. Bala yaa ne Wẽnnaam pãng la a rɩk pʋgã.’ A Zozɛf ne a Maari sɩd kẽe kãadem, n gũud a Zezi rogmã masã.