A Zeova Kaset rãmbã tẽebã yaa bʋse?

“Tõnd datẽ lame n kelg foo tɩ f togs fo sẽn tagsde, bala tõnd miimi tɩ zĩig fãa, b kɩɩsda sull ning fo sẽn tɩ loe ne wã.” (Tʋʋma 28:22, La Bible en français courant) Kob-yendẽ Rom nin-kãsems kãensa sẽn da be Zʋɩf rãmb sʋkã kɩsa togs-n-ta-sõng sẽn tɩ yɩɩda. B ra ratame n dɩ kɩbarã a yẽgrẽ wã n tɩge la b bas yɩng nebã wɩdg kelgre.

Woto me rũndã-rũndã, naoor wʋsgo, b rõta a Zeova Kaset rãmba, la na n yɩɩ tudgr ne ned sẽn na n tɩ bao neb nins sẽn kis bãmba nengẽ n bãng sɩdã ne bãmb wɛɛngẽ. Rẽnda tõnd sũur noomame tɩ d na n togs-y tõnd tẽeb nins sẽn yaa kãsemsã kẽer n bake.

Biiblã, a Zezi Kirista la Wẽnnaam

Tõnd tẽedame tɩ “Gʋlsem zãng yita Wẽnnaam nengẽ la a tara yõodo”. (2 Tɩmote 3:16.) La baa neb kẽer sã n sãmbdẽ tɩ tõnd sɩd pa kiris-neba, togs-kãnga yaa ziri bala. Tõnd sakame n deeg tʋmd-tʋmd a Pɛɛr kasetã a sẽn togs a Zezi Kirista wɛɛngẽ woto wã: “Yʋʋr a to ka be saagã tẽngr b sẽn kõ ninsaalbã sʋka, tɩ tõnd segd n paam fãagr ye.”—Tʋʋma 4:12.

Baasg zãnga, wala a Zezi sẽn yeel t’a yaa “Wẽnnaam Biriblã” la tɩ ‘Ba wã n tʋm-a wã’, a Zeova Kaset rãmbã tẽedame tɩ Wẽnnaam yaa kãseng n yɩɩd a Zezi (Zã 10:36; 6:57). A Zezi meng sak n deegame: “Ba wã yaa kãseng n yɩɩd maam.” (Zã 14:28; 8:28). Woto yĩnga, tõnd pa tẽed t’a Zezi zema Ba wã, wala Tãablem sẽn zãmsda ye. Sẽn yaa lebend ne rẽnda, tõnd tẽedame tɩ yaa Wẽnnaam n naan-a la a pa ta Wẽnnaam ye.—Kolos rãmb 1:15; 1 Korẽnt dãmba 11:3.

Moor goam pʋgẽ, Wẽnnaam yʋʋrã yaa a Zeova. Biiblã yetame: “Bɩ b bãng tɩ fo yʋʋrã, tɩ foo f yembre, a ZEOVA, fo yaa Zãntlem Sẽn-Ka-To soab tẽngã fãa zugu!” (Yɩɩl Sõamyã 83:19, La Sainte Bible [1905], A. Crampon). A sẽn maan tɩ zems togs-kãnga wã yĩnga, a Zezi goma Wẽnnaam yʋʋrã zug wʋsgo, n zãms a karem-biisã tɩ b pʋʋs woto: “Tõnd Ba sẽn be saasẽ, bɩ f yʋʋrã yɩ ne sõmblem!” La yẽ meng pʋʋsa Wẽnnaam n yetẽ: “Mam wilga fo yʋʋrã neb nins fo sẽn kõ maama.”—Matɩe 6:9; Zã 17:6.

A Zeova Kaset rãmbã tẽedame tɩ b segd n maana togs-n-taar ne a Zezi, b sẽn maand tɩ neb a taab bãng Wẽnnaam yʋʋrã ne-a raabã yĩngã. Dẽnd tõnd rɩka yʋʋr ning sẽn boond t’a Zeova Kaset rãmbã, bala tõnd maanda togs-n-taar ne a Zezi sẽn yaa “kɩs-sɩd Kaset soabã”. (Wilgri 1:5; 3:14.) Yaa ne bʋʋm la a Ezai 43:10 yeel nin-buiid nins sẽn na n tʋm Wẽnnaam yʋʋrã yĩng woto: “ ‘Yãmb yaa mam kaset rãmba’, yaa a Zeova sẽn togs la woto, ‘n-yẽe, mam sõgena m sẽn yãke’. ”

Wẽnnaam Rĩungã

A Zezi zãmsa a karem-biisã tɩ b pʋʋs n yetẽ: “Bɩ f rĩungã wa!”, la a maaname tɩ Rĩung kãnga yɩ a zãmsgã gom-zug sẽn tɩ yɩɩda (Matɩe 6:10; Luk 4:43). A Zeova Kaset rãmbã tẽedame tɩ Rĩungã yaa yĩngr soolem sẽn sɩd be, t’a na n dɩɩ naam tẽnga zugu, la t’a Zezi Kirista yaa a Rĩm nifr sẽn pa ne. “A paama tõogã a bãgd zutu, woto la Biblã yeta, sẽn na yɩl n tɩ tõogã yalg laafɩ sẽn ka saab pʋgẽ.”—Ezai 9:6, 7, Zerizalɛm.

La pa a Zezi a yembr bal n na n yɩ Rĩm Wẽnnaam Soolmẽ wã ye. Nanams wʋsg la b na n lagem ne yẽ saasẽ. Tʋmd-tʋmd a Poll gʋlsame: “Tõnd sã n ket n tõogd toogo, tõnd me na n dɩɩ naam ne yẽnda.” (2 Tɩmote 2:12). Sã n yaa ne Biiblã, neb nins sẽn vʋʋgd n na n dɩ naam ne Kirista saasẽ wã yaa bãmb “tus koabga, la tus pis-naase la tus a naas b sẽn da tẽngã zug” bala.—Wilgri 14:1, 3.

Yaa vẽeneg tɩ soolem fãa rata zẽemse. A Zeova Kaset rãmbã tẽedame tɩ sẽn paas ne yĩngr nanams kãensã, neb milyaar dãmb a taab n na n paam vɩɩm sẽn kõn sa. Sẽn na n baase, tẽngã sã n wa lebg arzãna, yaa zẽems kãensa sẽn zems ne Wẽnnaam Rĩungã paoongã n na n zĩnd-a zugu, la b fãa na n saka Kirista la neb nins sẽn lagem yẽnda wã soolem. Woto, a Zeova Kaset rãmbã tara tẽeb kãe-kãe tɩ tẽngã pa na n sãam a bada ye, la tɩ Biiblã kãab kãngã na n pidsame: “Nin-tɩrsã na n sooga tẽngã, la b na n zĩnda a zug wakat fãa.”—Yɩɩl Sõamyã 37:29; 104:5.

La wãn-wãn la Wẽnnaam Rĩungã na n wa? Yaa neba fãa sẽn na n sak n tũ Wẽnnaam Soolmã ne yamleoog bɩ? Sẽn yaa lebend ne rẽnda, Biiblã wilgda ne sɩd tɩ Rĩungã waoong na n kɩtame tɩ Wẽnnaam kẽes a meng tẽngã zug yɛl pʋgẽ. A yetame: “Yĩngr Wẽnnaamã na n lugla rĩung sẽn pa sãam a bada ye. La rĩung kãnga (...) na n wãa rĩung kãensa la a menems-ba, la yẽnda meng na n zĩnd wakat sẽn pa yãk tɛka.”—Daniɛll 2:44.

Wakat bʋg la Wẽnnaam Rĩungã na n wa? Bãmb sẽn tik Biiblã bãngr-goam nins sẽn paamd pidsg rũndã-rũnda wã zug yĩnga, a Zeova Kaset rãmbã tẽedame t’a waoongã kolga wʋsgo. Tõnd kota yãmb tɩ y ges bãngr-goam kẽer sẽn wilgd masã dũni wã “yaoolem daar” nens kẽere. B gʋls-b-la a Matɩe 24:3-14; Luk 21:7-13, 25-31; 2 Tɩmote 3:1-5.

Tõnd sẽn ‘nong a Zeova tõnd Wẽnnaamã ne d sũur fãa, d sɩɩg fãa, d yam fãa la d pãnga fãa, la d nong d to wala d menga yĩnga’, tõnd pa welg taab ye, yaa tẽnsã, tɩ yaa buud bɩ zĩnd-n-taar wɛɛngẽ me (Mark 12:30, 31). B mii tõnd wʋsgo, nonglem ning tõnd saam-biisã sẽn wilgd taab tẽn-tẽnsã fãa pʋgẽ wã yĩnga (Zã 13:35; 1 Zã 3:10-12). Rẽnda, tõnd pa kẽesd d mens sẽn tɩ yɩɩd ne tẽn-kãensã politikã yɛl wɛɛngẽ ye. Tõnd maoodame n na n maan togs-n-taar ne a Zezi pipi karem-biisã, a sẽn yeel tɩ “bãmb pa dũni wã rẽnd ye, wala mam sẽn pa dũni wã rẽndã.” (Zã 17:16). Tõnd tẽedame tɩ welg f meng ne dũni wã rat n yeelame tɩ d lak d meng ne tʋʋm dẽgd sẽn be wʋsg rũndã-rũndã n yaa ziri yagbã, wagdemã, yoobã, kãad yoobã, roap sẽn gãe ne roapã, zɩɩmã rɩk n tʋm tɩ pa zemsã, bõn-naands pʋʋsgã, la yɛl a taab Biiblã sẽn gɩdgã.—1 Korẽnt dãmb 6:9-11; Efɛɛz rãmb 5:3-5; Tʋʋma 15:28, 29.

Saagr beoog-daar yĩnga

A Zeova Kaset rãmbã tẽedame tɩ bũmba fãa pa sat ne masã vɩɩmã ye. B tẽedame t’a Zeova tʋma Kirista t’a wa tẽngã zug n daag-a zɩɩm tɩ yɩ wala keoor sẽn na yɩl n tɩ ninsaalbã tõog n yɩ tɩrs Wẽnnaam taoore, la b paam vɩɩm sẽn kõn sa dũni paalgã pʋgẽ. Wala a Zezi tʋmd-tʋmd a yembr sẽn yeel ne gom-kãensa wã: “Masã, b togsame tɩ tõnd lebga tɩrs ne-a zɩɩmã yĩnga.” (Rom dãmb 5:9; Matɩe 20:28). A Zeova Kaset rãmbã tara mi-beoog wʋsg ne Wẽnnaam la ne a Biriblã keoor kãnga sẽn pakd beoog-daar vɩɩm sorã yĩnga.

A Zeova Kaset rãmbã tara bas-yard zãng ne beoog-daar vɩɩm ne kũum vʋʋgr tũnugri, Wẽnnaam Rĩungã soolem tẽngre. Wala sẽn zems ne Biiblã sẽn zãmsd bũmb ningã, b tẽedame tɩ ninsaal sã n wa ki, a sɩd pa be ye la tɩ “badaare, a tagsgã satame.” (Yɩɩl Sõamyã 146:3, 4; Ezekɩyɛll 18:4; Koɛɛg Soaba 9:5.) N-yẽe, sẽn kibã beoog-daar vɩɩmã sẽn na n yɩ sɩdã, yaa tɩ Wẽnnaam na n tẽega b yell la a vʋʋg-ba.—Zã 5:28, 29.

La a Zeova Kaset rãmbã tara hakɩk tɩ neb wʋsg sẽn vɩ masã wã na n põsa Wẽnnaam Rĩungã sẽn na n wa kɩt tɩ soolem nins fãa sẽn be masã wã ta-b tɛkã wakate, wala a Nowe la a zakã rãmb sẽn põs sãoong sa-kãsenga pʋgẽ wã. B na n ket n vɩɩ wakat sẽn kõn sa tẽng zug sẽn yɩlge. (Matɩe 24:36-39; 2 Pɩɛɛr 3:5-7, 13). B tẽedame tɩ põs-kãnga bee ne bũmb nins a Zeova sẽn dat tɩ b maana, wala Biiblã sẽn yetã: “Dũni wa loogdame (...), la ned ninga sẽn maand Wẽnnaam daabã paada wakat sẽn pa sɛte.”—1 Zã 2:17; Yɩɩl Sõamyã 37:11; Wilgri 7:9, 13-15; 21:1-5.

Yãmb na n bãnga nana-nana tɩ d pa tõe n sõdg a Zeova Kaset rãmbã tẽeb fãa ka ye, la tõnd kotame tɩ yãmb dɩ-b kɩbarã kaset n paase.

Sã n pa b sẽn wilgi, Biiblã lebg-n-ges yetame tɩ d tɩ ges Les Saintes Écritures — Traduction du monde nouveau.

[Blurb on page 4]

Tõnd rɩka yʋʋr ning sẽn boond t’a Zeova Kaset rãmbã, bala tõnd maanda togs-n-taar ne a Zezi.