Sak 19

A Zezi zãmsa Samari poaka

A ZEZI ne a karen-biisã sẽn da wa n yi Zide n debd Galile wã, b yii Samari babgã. B kẽn n yaame n tek n yals bulg noor Sɩkaar tẽngã noor n na n vʋʋse. Yaa yʋʋm kobs sẽn loog la a Zakoob tu bul-kãngã. La hal tɩ ta rũndã bulgã ket n bee be, n pẽ ne Napluuz tẽngã.

A Zezi paa bulgẽ wã n na n vʋʋse, t’a karen-biisã kẽ tẽngã pʋgẽ n na n da rɩɩbo. Samari poak n wa n na n toog koom t’a Zezi yeel-a: “M kota koom n yũ wɛ.”

Zʋɩf rãmbã ne Samari nebã ra ka rat taab zĩig ye, b sẽn da kis taab keelem. Dẽ, a Zezi sẽn gom ne-a wã linga pagã, t’a soke: “Yaa wãn tɩ yãmb yaa Zʋɩf n kot maam koom n na n yũ, tɩ mam yaool n yaa Samari neda?”

Dẽ a Zezi leoka woto: “Fo sã n da bãng . . . ned ninga sẽn yeel foo tɩ f kõ-a koom t’a yũ wã, fo ra na n kosa bãmba tɩ b kõ foom koom sẽn vɩ.”

Tɩ pagã yeele: “M kẽema, yãmb ka tar bũmb sẽn na n toog koom ye, la bulga yaa zulunga. Dẽ, zĩ-bʋg la yãmb na n paam ko-kãng sẽn vɩyã? Yãmb yɩɩda tõnd ba a Zakoob sẽn da kõ tõnd bul-kãngã, la b mengã ne b kambã la b rũmsã sẽn da yũ a koomã bɩ?”

A Zezi yeel-a lame: “Ned sã n yũ ko-kãngã, ko-yũud na n le yõka yẽnda. La ned sã n yũ koom ninga mam sẽn na n kõ yẽ wã, ko-yũud kõn le yõk yẽnda abada ye. La koom ninga mam sẽn na n kõ yẽnda wã na n yɩɩ wa bulg sẽn bund yẽ pʋgẽ n kõt vɩɩm sẽn ka sɛta.”

Tɩ paga yeele: “M kẽema, bɩ y kõ maam ko-kãng tɩ ko-yũud ra le yõk maam ye, la tɩ m da le wa toog koom ka ye.”

T’a Zezi yeel-a masã: “Kẽng n tɩ bool f sɩda t’a wa ka.”

La pagã leokame: “Mam ka tar sɩd ye.”

A Zezi wilgame tɩ pagã goam yaa sɩda, n yeele: “Fo tara bʋʋm tɩ yeel tɩ fo ka tar sɩd ye. Tɩ bõe, fo talla sɩdb a nu, la fo sẽn be ne a soab masã wã ka fo sɩd ye.”

Woto linga pagã t’a yeele: “M kẽema, mam yãame tɩ yãmb yaa Wẽnnaam no-rɛɛsa.” Pagã wilgame t’a nonga tẽebã yɛla, n togs tɩ Samari nebã “waoogda Wẽnnaam tãng kãngã zugu [Gerizim sẽn pẽ be wã], la yãmb [Zʋɩf rãmbã] yetame tɩ yaa Zerizalɛm bal la ned tog n waoog Wẽnnaam.”

La a Zezi wilgame tɩ ka pʋʋsgã sẽn maandẽ wã la sard ye. A yeelame tɩ wakat watame tɩ “sẽn waoogd-b Wẽnd sɩdem-sɩdem, na n waooga Ba b yamẽ la ne pʋ-peelem, tɩ yaa waoogr a woto buudu la Ba rata. Wẽnnaam yaa yam bala, dẽnd yĩnga sẽn waoogd-b bãmbã, bɩ b waoog-ba b yamẽ, ne pʋ-peelem.”—Sebr Sõngo.

Gom-kãngã linga pagã wʋsgo. Dẽ, a yeelame: “Mam mii tɩ Mesi sẽn boond tɩ Kirist watame. La bãmb sã n wa, bãmb na togs tõnd bũmb fãa.”

T’a Zezi togs-a woto: “Mam yaa yẽ soab la sẽn gomd ne foomã.” Yãmb wee n tagse! Pʋg-kãngã waa wĩnto-sʋk n na n toog koom. La tõe t’a sẽn wa sasa kãngã wã, yaa sẽn na yɩl n da seg tẽngã pagb a taabã sẽn pa nand-a wã, a vɩɩmã sẽn yaa to-to wã yĩngã. Yaa pag a woto la a Zezi waoog wʋsgo, n togs vẽeneg tɩ yẽ la Kiristã, bũmb a sẽn da zɩ n vẽneg n togs ned a to ye. A sẽn maan woto wã, baasa ne bõe?

Samari neb wʋsg tẽeme

A Zezi karen-biisã yii Sɩkaar ne rɩɩbã n lebg n wa yã t’a ket n be a Zakoob bulgẽ wã, n gomd ne Samari poak masã. Karen-biisã sẽn ta wã la pagã sẽn bas a yʋʋrã, la a rabd tẽngã pʋgẽ.

Pagã sũur yɩɩ noog wʋsg ne a Zezi sẽn togs-a bũmb ningã. A togsa tẽngã neb woto: “Wa n ges-y rao sẽn togs maam bũmb fãa mam sẽn da maane.” La sẽn na yɩl tɩ neba tʋlg n bãng n paase, a sokame: “Bãmb ka Kirist sɩda?” Sokrã sɩd kɩtame tɩ nebã kẽng n na n tɩ ges b toore.

Wakat kãnga, a Zezi karen-biisã rag n pẽdgd-a lame t’a rɩ rɩɩbã b sẽn wa ne wã. La a yeel-b lame: “Mam tara rɩɩb yãmb sẽn ka mi ye.”

Dẽ a karen-biisã soka taab woto: “Ned n wa n kõ bãmb dɩɩb bɩ?” T’a Zezi wilg-ba: “Mam dɩɩb yaa tɩ maan sẽn tʋm-a maama ratem, la tɩ maan bãmb tʋʋma n sɛ. Yãmb ka yet t’a keta kiis a naas tɩ tigisg ta bɩ?” La a Zezi goma tẽeb tigisgã yell n yeele: “Bɩ y zẽk y nens n ges pʋtã; tɩ bõe, bãmb pelgame n ta tigisg masã. Ned ninga sẽn tigisda, a paamda yaoodo n wʋkd biis n bĩngd vɩɩm sẽn ka sɛta yĩnga, tɩ sẽn bʋt-a wã ne sẽn tigisd-a wã fãa na n lagem n paama sũ-noogo.”

Tõe t’a Zezi ra zoe n neeme t’a sẽn gom ne Samari poakã, womda biis wʋsgo. A ra yãame tɩ pagã kaset kɩtame tɩ neb wʋsg tẽ-a. Pagã ra kõta tẽngã neb kaset n yetẽ: “Bãmb togsa maam bũmb fãa mam sẽn da maane.” Woto yĩnga, Sɩkaar neb wʋsg waa a Zezi nengẽ bulgẽ wã, n kos-a t’a pa n sõs ne-b n paase. A Zezi sakame n zĩnd be rasem a yiibu.

Samari nebã sẽn kelg a Zezi wã, neb wʋsg tẽeme n paase. B yeela pagã woto: “A ka fo sẽn yeela yĩng la tõnd tẽed ye. Tɩ bõe, tõnd mens wʋma bãmb sẽn gom, la tõnd mii hakɩka tɩ bãmb yaa dũniyã fãagda.” Sɩd-sɩda, Samari poakã kõo tõnd mak-sõngo ne d sẽn tõe n kõ kaset to-to Kiristã wɛɛngẽ. D tõe n sɩnga ne goam buud sẽn na n kɩt tɩ neba tʋlg n bao n bãng n paase.

Tẽeg-y tɩ koodã tigisg keta kiis a naase. Palɛstinni, kood ning b sẽn boond tɩ orzã tigisda tʋʋlg bɩ tʋʋl-nif kiuugã wakate, sẽn dat n yeele, tɩ masã ra yaa sɩpaolg bɩ yʋʋm-sar kiisã sasa. Woto rat n yeelame tɩ yʋʋmd 30 Pakã loogr poore, a Zezi ne a karen-biisã maana kiis a nii bɩ sẽn yɩɩd woto Zide n zãmsd nebã la b kõt-b lisgu. Masã b ra kuiisa b yiy Galile babgẽ wã. Bõe n da gũud-b be? Zã 4:3-43.

▪ Bõe yĩng t’a Zezi sẽn gom ne Samari poakã yɩ lingr ne-a?

▪ Bõe la a Zezi zãms Samarie poakã vɩɩm koomã la zĩig ning b sẽn segd n balem Wẽnnaamã wɛɛngẽ?

▪ Wãn-wãn la a Zezi vẽneg n togs pagã a sẽn yaa ned ninga, la bõe yĩng tɩ woto lingd wʋsgo? Kaset bʋg la Samari poakã kõ-yã, la rẽ waa ne bõe?

▪ Wãn to la a Zezi rɩɩbã tɩ loe ne tigisgã?

▪ Wãn-wãn la d tõe n bãng a Zezi tʋʋmdã sẽn kaoos to-to Zide, yʋʋmd 30 Pakã loogr poore?