Sak 28

B wa n soka a Zezi no-loeerã wɛɛngẽ

MAANA yʋʋmd la bal a Zezi sẽn zĩnd yʋʋmd 30 Pakẽ wã, la kiis a wãn Lisd a Zã me sẽn be bãens-roogẽ. A Zã ra ratame t’a karen-biisã tũ a Zezi, la ka b fãa n maan dẽ ye.

Masã a Zã karen-biis kẽer waa a Zezi nengẽ, n sok-a: “Yaa bõe tɩ tõnd ne Fariziẽ rãmba loet noore, tɩ yãmb karen-biisa yaool n ka loet noore?” Rasem a yopoe fãa Fariziẽ rãmbã ra minim n loeta noor naoor a yiibu, tɩ rẽ yaa b tũudmã minung a yembre. La tõe t’a Zã karen-biisã me ra maanda woto. Leb n tõeeme me tɩ yaa b sẽn kẽes a Zã roogã yĩng la b sẽn loet noorã. Rẽ n so tɩ b ra sokd b mens a Zezi karen-biisã sẽn ka naagd bãmb n wilgd b sũ-sãang woto wã võore.

A Zezi leok-b-la woto: “Pʋg-paal sɩda tũud-n-taas tõe n maana sũ-sãoongo pʋg-paala sɩd sẽn ket n be bãmb sʋk bɩ? Daar na wa b sẽn na [n] yiis pʋg-paala sɩd bãmb sʋka. Dẽ, b na loe noore.”

A Zã karen-biisã ra segd n tẽrame t’a Zã meng ra yeelame t’a Zezi la pʋg-paal sɩdã. Dẽ a Zezi sã n ket n beẽ fãa, a Zã ka na n ges tɩ zemsame t’a loe noor ye. Yaa woto me ne a Zezi karen-biisã. Kaoosg zugẽ, a Zezi sã n wa ki, a karen-biisã ra na n maana sũ-sãang la b loe noore. La a Zezi sã n wa vʋʋg n dʋ saasẽ, b ka na n le tall bʋʋm n loe noor n wilg b sũ-sãang ye.

Rẽ poore, a Zezi kõo mak-kãensã: “Ned ka be sẽn na n dɩk peen-paalga n lisg fu-kʋdg ye, tɩ bõe, peen-paalga na n kɩtame tɩ fu-kʋdga kẽege n yɩɩg pĩnda. La ned ka be sẽn na n sui rã-paalga ko-wao-kʋdẽ ye. B sã n sui-a, a na n pusa ko-waoosa tɩ rãamã raage, la ko-waoosa na n sãamame. La rã-paalg tog n suii ko-wao-paalse.” Bõe loees la mak-kãensã b yiibã tar ne no-loeerã?

A Zezi ra rat n sõnga Lisd a Zã karen-biisã tɩ b bãng tɩ ka tɩlae tɩ yẽ karen-biisã tũ Zʋɩf rãmbã tũudum minim kʋd wala no-loeerã ye. A ka wa n na n dems la a wogl tũudum sẽn ka leb n tar yõod la sẽn lʋɩ n sa ye. Kiris-neb tũudma ra pa na n wõneg Zʋɩf rãmbã tũudmã sẽn pid ne ninsaalb minimdã ye. Ayo, sã n yɩ woto, yaa wala b sẽn dɩk peen-paalg n lisg fu-kʋdre, bɩ rã-paalg n ning ko-waoog sẽn kʋdg pʋgẽ. Matɩe 9:14-17; Mark 2:18-22; Luk 5:33-39; Zã 3:27-29.

▪ Ãnd dãmb n loet noore, la bõe yĩnga?

▪ Bõe yĩng t’a Zezi karen-biisã ka loet noor a sẽn be ne-bã wakate, la wãn to la bũmb ning sẽn kɩt tɩ b loet noorã ka na n le zĩndi?

▪ Mak-bʋs la a Zezi kõ-yã, la b võy yaa bõe?