Sak 29
Tʋʋm-sõma maaneg vʋʋsg daare
RA YAA yʋʋmd 31 tʋʋlg bɩ tʋʋl-nif kiuugã wakate. A Zezi sẽn wa n yi Zide n debd Galile n tek n gom ne Samari poak bulgẽ wã maana kiisi.
Rẽ poore a Zezi moona wʋsg Galile. Masã a lebg n kẽnga Zide, n tɩ moond be karen-dotẽ wã. Biiblã goma a Zezi moonegã Galile wã yell wʋsg n yɩɩd tʋʋmdã a Zezi sẽn maan so-kãngã la pĩnd Pakã loogr poorã Zide wã yelle. Wõnda Zide neb wʋsg pa sak n kelg a Zezi wa b sẽn kelg-a Galile wã ye.
Pa kaoos la a Zezi leb n dɩk sor n debd Zerizalɛm sẽn yaa Zide galʋ-tẽn-kãsengã ye. Rẽ yaa sẽn na yɩl n maan yʋʋmd 31 Pakã. Bãk b sẽn boond tɩ Bɛtzata n da be galʋ-tẽngã noor b sẽn boond tɩ Piis Noorã sɛɛga. Bãad dãmb wʋsgo, zoens la wobs ra wata be. B ra tẽedame tɩ b sã n kẽ bãkẽ wã koomã rãmbg wakate, b bãasã na n sãoogame.
Ra yaa vʋʋsg daare. La a Zezi yãa rao sẽn be bãkã noor n pa keem hal yʋʋm 38. A Zezi sẽn bãng t’a pa keem hal sẽn kaoosã, a sok-a lame: “Fo rat n paama f meng bɩ?”
T’a leok a Zezi yaa: “Zusoaba, mam ka tar ned sẽn na n kẽes maam bãka pʋgẽ koomã rãmbg wakat ye. La mam sã n dat n kẽ ned a to n dengd maam n kẽ.”
Dẽ a Zezi yeel-a lame: “Yik n dɩk f pĩir n kẽne.” Dẽ, zĩig pʋgẽ rao wã yĩns sãoogame t’a yik n dɩk a gãag n sɩng kẽnde!
La Zʋɩf rãmbã sẽn yã rao wã, b yeel-a lame: “Yaa vʋʋsg daare. A ka zems ne tõog tɩ f tʋk f pĩir ye.”
Tɩ rao wã leok-ba: “Ned ninga sẽn maag maama yeela maam: Dɩk f pĩir n kẽne.”
Dẽ b soka rao wã: “Yaa yɛ ned n yeel foom tɩ f rɩk f pĩir n kẽna?” Kʋʋngã yĩnga, a Zezi ra baoo zĩiga, la rao ning me sẽn paam sãoogrã ra ka mi a Zezi yʋʋr ye. La a Zezi wa n sega rao wã wẽn-doogã pʋgẽ, t’a yaool n na n bãng tɩ yaa yẽ n da sãoog-a.
Woto, rao wã tɩ yãa Zʋɩf rãmbã n togs-b tɩ ya a Zezi n da sãoog-a. Zʋɩf rãmbã sẽn bãng rẽ b kẽnga a Zezi nengẽ. Bõe yĩnga? Yaa sẽn na yɩl n bãng a sẽn maan to-to n tõog n maan yel-solem kãensã bɩ? Ayo. Yaa sẽn na yɩl n sãbg-a a sẽn maan bõn-sõma vʋʋsg daarã yĩnga. B tol n sɩngame meng n namsd-a. Luk 4:44; Zã 5:1-16.
▪ A Zezi sẽn kẽng Zide yaoolmã kaoosa wakat a wãn masã?
▪ Bõe yĩng tɩ neb wʋsg ra nong n debd Bɛtzata bãkẽ wã?
▪ Yel-solem bʋg la a Zezi maan bãkẽ wã, la bõe la Zʋɩf rãmb maan-yã?