Sak 30

A Zezi leoka a rõatbã

ZƲƖF rãmbã tũudum taoor dãmb sẽn dõd a Zezi t’a kɩɩsa vʋʋsg daarã Tõogã, a leok-b lame: “M Ba ket n tʋmda hal ne masã, tɩ mam me tʋmdẽ.”—Sebr Sõngo.

Baa ne Fariziẽ rãmbã sẽn yetã, a Zezi tʋʋmdã buud pa kɩɩsd vʋʋsg daarã tõog ye. Yaa Wẽnnaam n yeel-a t’a moon la a sãoog neba, la a maana wa a Ba wã n tʋmd raar fãa. Baasgo a Zezi leokrã puuga Zʋɩf rãmbã sũur n paas menga, tɩ b ra baood-a n na n kʋ. Bõe yĩnga?

Pipi, yaa b sẽn da tẽed t’a Zezi kɩɩsa vʋʋsg daarã tõogã, la sẽn paase b sẽn da tagsd t’a Zezi sẽn yeel t’a yaa Wẽnnaam Biriblã yaa wẽn-tʋʋsgã. La rẽ ka yɛɛs a Zezi ye. A sõsa ne-b n paas zems-n-taar kãseng ning sẽn be yẽ ne Wẽnnaam sʋkã zugu. A yeela woto: “Ba wã nonga bãmba n wilgd bãmb b sẽn maand bũmb ninsa fãa.”

A Zezi paasame: “Tɩ bõe, a wa b Ba sẽn vʋʋgd kũum n kõt b vɩɩma, Biiga me kõta a sẽn dat b rãmba vɩɩm.” Sɩda, Biriblã zoe n vʋʋgda neb tẽebã wɛɛngẽ! A Zezi yeelame: “Ned ninga sẽn kelgd mam goama n tẽed sẽn tʋm-a maama, . . . yẽ yii kũum pʋgẽ n paam vɩɩm.” N-ye, a leb n yeelame: “Wakat watame la a taame masã tɩ kũum na n wʋm Wẽnnaam Biiga koɛɛga, la neb nins sẽn na n wʋm bãmb koɛɛga na n paama vɩɩm.”

Yaa sɩd tɩ b ra nan ka paam kɩbar sẽn wilgd t’a Zezi vʋʋga ned ye. Baasg zãnga, a Zezi yeela a rõatbã tɩ vʋʋgr a woto na n zĩndame. A yeelame: “Bɩ yãmb da yɛɛs ne yõ wã ye. Tɩ bõe, wakat watame tɩ fãa sẽn be [tẽegr] yaad pʋsẽ na n wʋm bãmb koɛɛg n yi.”

La hal tɩ ta wakat kãngã a Zezi ra zɩ n wilg vẽeneg t’a tʋʋmdã yaa kãseng wʋsg Wẽnnaam daabã pidsg pʋgẽ ye. La yel-kãensã wɛɛngẽ pa a Zezi kasetã bal la rõatbã tar ye. A Zezi tẽeg-b-la woto: “Yãmb tʋma neb a Zã nengẽ, la yẽ kõo kaset sɩda.”—Sebr Sõngo.

Yʋʋm a yiib sẽn deng rẽ, Lisd a Zã ra togsa Zʋɩf rãmbã tũudum taoor dãmb tɩ ned n na n pʋgl yẽ. A tẽeg-b lame tɩ b ra nanda a Zã b sẽn pag roog masã wã hal sõma, n yeele: “La yãmb da rat n maana sũ-noog wakat bilfu ne yẽ vẽenemã.” A Zezi tẽeg-b-la yel-kãngã sẽn na yɩl n sõng-ba, sẽn na yɩl n fãag-b menga. La a Zã kasetã ra ka tɩlae ne a Zezi ye.

“Tʋʋm kãens mam sẽn maanda [tɩ yel-solemd ning a sẽn nan maana be sʋka] kɩta kaset tɩ yaa m Ba n tʋm maam.” Baa ne kaset kãng sẽn be wã, a Zezi paasame: “M Ba sẽn tʋm-a maama, bãmb menga kɩsa kaset mam yĩnga.” Wala makre, Wẽnnaam kɩsa kaset a Zezi wɛɛngẽ a lisgẽ wã n yeele: “Ad-a yaa mam Bi-nongre.”

A Zezi rõatbã sɩd ka tar bʋʋm n na n zãgs-a ye. Gʋlsg Sõamyã nins bãmb mens sẽn vaeesdã kɩta kaset a Zezi wɛɛngẽ! Rẽ n so t’a Zezi baas a goamã n yeele: “Yãmb sã n da tẽ a Moiizi, yãmb da na n tẽe maam me, tɩ bõe, bãmb n gʋls mam yelle. La yãmb sã n ka tẽ bũmb nins bãmb sẽn gʋlsã, yãmb na n maana wãn n tẽ mam goama?” Zã 5:17-47; 1:19-27; Matɩe 3:17.

▪ Bõe yĩng t’a Zezi tʋʋmdã pa kɩɩsd vʋʋsg daarã tõogo?

▪ Wãn to la a Zezi bilg t’a tʋʋmdã yaa kãseng Wẽnnaam daabã pidsg pʋgẽ?

▪ A Zezi togsame tɩ ãnda kaset n wilgd t’a yaa Wẽnnaam Biribla?