Sak 31

B yãgsa ka-zut vʋʋsg daare

PA KAOOS la a Zezi ne a karen-biisã yi Zerizalɛm n leb Galile ye. Ra yaa yʋʋmdã wakat ning koodã sẽn da bɩ pʋtẽ wã. Kom n da tar karen-biisã, tɩ b ra yãgsd ka-zutã n tẽgd n wãbdẽ. La sẽn yaa vʋʋsg daarã, nebã yãa b sẽn maanã.

Sẽn nan pa kaoose, tũudmã taoor dãmb sẽn be Zerizalɛmã ra makame n na n kʋ a Zezi, bala b ra tagsdame t’a kɩɩsa vʋʋsg daarã tõogo. Masã Fariziẽ rãmbã waame n na n ning-a taal n yeele: “Gese, yãmb karen-biisa maanda bũmb sẽn ka zems tɩ maan vʋʋsg raar ye.”

Sã n yaa ne Fariziẽ rãmbã, yãk ka-zut n tẽg n wãb ne kood tigisg la zɛɛg pãbr yaa yembre. Bãmb sẽn da tagsd tɩ tʋʋmd ya a soabã yĩng kɩtame tɩ vʋʋsg daarã tõog tũub lebg toog ne nebã. La a yaool n da segd n yɩɩ sũ-noog la tẽeb kengr wakate. Dẽ, a Zezi rɩka makr a yiib n wilg tɩ Wẽnnaam a Zeova zɩ n tʋlg tɩ b tũ vʋʋsg daarã tõog ne manesem sẽn yaa dem-dem woto ye.

A Zezi yeelame tɩ kom sẽn da wa n tar a Davɩɩd ne a neba, b tek n yalsa sɛk roogẽ wã n dɩ wẽnd-doogã buri. Bur kãng yaa b sẽn da rɩk n kõ Wẽnnaam, n yiis n ledg ne bur a taaba. La yaa maan-kʋʋdbã bal n da segd n wãb-a. Baasg zãnga, a Davɩɩd ne a nebã sẽn wãb bur kãngã b ka ning-b taal ye.

A Zezi leb n dɩka makr a to, n yeele: “Yãmb nan ka karem tõog pʋgẽ tɩ maan-kʋʋdba sãamda vʋʋsg raar Wẽnnaam doogẽ tɩ yell kaẽ?” Sɩda, vʋʋsg daar menga maan-kʋʋdbã kʋʋda rũms la b maand tʋʋm a taab n segend rũmsã maando! Dẽ a Zezi yeelame: “Mam yeta yãmba tɩ sẽn yɩɩd Wẽnnaam doog bee ka.”

A Zezi leb n sagla Fariziẽ rãmbã woto: “Yãmb sã n da bãng koe-kãng võore sẽn yeta: Mam sũur nooma ne nimbãan-zoeere n yɩɩd maando, yãmb da kõn kao nin-tɩrs bʋʋd ye.” La a yeel woto n baase: “Tɩ bõe, Ninsaal Biiga yaa vʋʋsg raar Zusoaba.” Bõe la a Zezi ra rat n yeele? Ka wã, a Zezi ra gomda Rĩungã yʋʋm tusr naamã sẽn na n yɩ laafɩ wakatã yelle.

Yʋʋm 6 000 sẽn loogã pʋgẽ, a Sʋɩtãan kɩtame tɩ ãdem-biisã nams yembd pʋgẽ, tɩ nen-kɛglem tʋʋm la zabr lebg daar fãa yelle. La Kirist naamã sẽn yaa vʋʋsg ra-kãsengã na n yɩɩ vʋʋsg wakat n kõ neba fãa. B na n paama yolsg ne namsg la weoogr a woto. Matɩe 12:1-8; Maankʋʋre 24:5-9; 1 Sãmwɛll 21:1-6; Sõdbo 28:9; Oze 6:6.

▪ Bõe yĩng tɩ b ning a Zezi karen-biisã taale, la a Zezi leokame tɩ bõe?

▪ Fariziẽ rãmbã tudg-bʋg la a Zezi vẽneg n wilgi?

▪ Wãn-wãn to la a Zezi yaa “vʋʋsg raar Zusoaba”?