Sak 33

A Zezi pidsa a Ezai bãngr-gomde

A ZEZI sẽn bãng tɩ Fariziẽ rãmbã la a Herood poorẽ dãmbã ra geenda a kʋʋbã, a yii be ne a karen-biisã n kẽng Galile Mogrẽ wã. Neb kʋʋng sẽn yi Palɛstin fãa pʋgẽ la tẽns a taab meng n kaoog n wa a nengẽ. A sãooga neb wʋsgo. Rẽ kɩtame tɩ bã-kɛgems sẽn tar neb ninsã fãa ra rɩdgd taab n dat n sɩɩs-a.

A Zezi yeela a karen-biisã tɩ b wa ne koom-koglg n kõ-a, tɩ bala neba ra yaa wʋsg tɩ looge. Woto a sã n da zãag ne kʋɩlga noore, kʋʋnga ka tõe n dɩdg-a ye. A ra tõe n zĩnda koglgẽ wã n zãms nebã, bɩ n tũ mogrã n tɩ sõng neb a taab zĩig a to.

A Matɩe yãame t’a Zezi tʋʋmdã pidsa ‘no-rɛɛs a Ezai sẽn da togsã.’ Rẽ poore a Matɩe togsa bãngr-gomd ning a Zezi sẽn pidsã, n gʋls woto:

“Ad mam tʋm-tʋmd mam sẽn yãke, mam nin-nongr sẽn ta m yam. Mam na n ninga m Sɩɩga yẽ zugu, la yẽ na n moona tɩrlem koɛɛg buudã fãa sʋka. Yẽ kõn wẽ no-koeemde wall a zẽk a koɛɛg ye, la ned kõn wʋm yẽ koɛɛg soay zut ye. Yẽ kõn kaoog tãnwĩ-kaoong n baas ye, la yẽ kõn kiis fɩtl peend sẽn ket n [wusdẽ] ye, hal t’a kɩt tɩ tɩrlem paam tõogre. La buud toay-toayã na n teega yẽ yʋʋrã.”—Kãab-paalgã Koe-noogo.

Yaa vẽeneg tɩ ya a Zezi la tʋm-tʋmd nongr ning sẽn ta Wẽnnaam yamã. Ziri tũudmã rog-n-migs kɩtame tɩ tɩrlmã võor ra pa vẽeneg ye. La a Zezi wilga tɩrlem hakɩkã sẽn ya a soabã vẽenega. Fariziẽ rãmbã ra tũuda Wẽnnaam tõogã kɛgre. Rẽ kɩtame tɩ b ra ka na n sak meng n sõng bãad vʋʋsg daar ye! A Zezi wilga Wẽnnaam tɩrlmã sẽn ya a soab vẽenega, n yols neba ne rog-m-mig-yoodã sẽn yaa zɩɩbã. Yaa rẽ yĩng la tũudmã taoor dãmb sẽn da baood-a n dat n kʋ wã.

La b sẽn yeel tɩ ‘yẽ kõn wẽ no-koeemd walla a zẽk a koɛɛgã, la b kõn wʋm yẽ koɛɛg soɛy zutã’ rat n yeelame tɩ bõe? A Zezi sã n da sãoog neda, a ‘sagend-a-la neer t’a ra gom tɩ ned wʋm ye.’ A rag n ka rat tɩ nebã moon a yʋʋrã soayã zutu, bɩ n togs kɩba-goalem a zug ye.

Sẽn paase, a Zezi taasda a belsg koɛɛgã neb nins sẽn yaa wala tãn-wĩig sẽn zelg n kaoog tɩ neb tabdã. Nin-kãens yaa wala fɩtl peend sẽn wisd n dat n ki. A Zezi ka na n beds tãn-wĩigã sẽn zẽgemdã, bɩ n kiis fɩtl peendã sẽn wit kɩɩ-kɩɩ wã ye. La ne bʋgsem la nonglem, a maagda a yĩng n zẽkd sik-m-mens rãmbã. Sɩd-sɩda, a Zezi la a soab ning buudã fãa neb sẽn tõe n tall saagr ne wã! Matɩe 12:15-21; Mark 3:7-12; Ezai 42:1-4.

▪ Wãn to la a Zezi wilgd tɩrlem hakɩkã sẽn ya a soabã vẽenega, n ka wẽed no-koeemd walla a zẽkd a koɛɛg soay zutu?

▪ Ãnda rãmb n yaa wala tãn-wĩig sẽn zẽgemd la fɩtl peende, la a Zezi manesmã ne-b yɩɩ wãn-wãna?