Sak 41

No-koeemd a Zezi poorẽ

A SƖMO sẽn bool a Zezi t’a wa rɩ a yirã nan pa kaoos ye. Rẽ loogr poor bilfu, a yiimi n na n tɩ gilg n moon Galile naoor a yiib-n-soaba. A pĩnd gilgrã wakate, a Pɩɛɛre, a Ãndere, a Zak, ne a Zã sẽn yɩ a pipi karen-biisã n da yãag-a. La masã tʋm-tʋmdb 12 wã, n paas pagb kẽer n da yãagd-a. A Maari Madelɛne, a Suzan la a Zan sẽn yaa Rĩm a Herood tʋm-tʋmd a yembr pagã ra bee b sʋka.

A Zezi tʋʋmdã pãng sẽn tar paasg la no-koeemdã sẽn tɩ loe ne a tʋʋmdã me sẽn da yãngde. Rao zĩn sẽn tar t’a yaa zoang la muk la b tall n wa a Zezi nengẽ. A Zezi sãooga raoã tɩ zĩna yi n bas-a t’a ninã puki, t’a zɩlemdã me lake. Kʋʋngã sẽn yã rẽ wã, ling-b-la hal wʋsgo. Tɩ b sɩng n yetẽ: “Dao-kãngã ka na n yɩ a Davɩɩd biigã sɩda?”—Kãab-paalgã Koe-noogã.

Neba sẽn da gũbg zak ning a Zezi sẽn beẽ wã ra yaa wʋsg hal tɩ yẽ ne a karen-biisã ra ka tõe n paam n dɩ rɩɩb meng ye. Neb nins sẽn da tagsd t’a Zezi ya “a Davɩɩd biigã” sẽn yãk b toogo, gʋlsdb la Fariziẽ rãmb n yi hal Zerizalɛm n wa n na n sãbg-a. A Zezi roagdbã sẽn wʋm bʋrgã neba sẽn tar a Zezi poorẽ wã, b waame n na n yõk-a. Bõe yĩnga?

A Zezi mengã ma-biis ra nan ka tẽed t’a yaa Wẽnnaam Biribl ye. Sẽn paase, no-koeemd la tak-tɩ-m-tak ning a sẽn wa ne neba sʋkã pa wẽnd Zezi ning b sẽn bãng t’a ra yaa biig Nazarɛtã ye. Woto yĩnga, b ra tẽedame tɩ zu-lɛbg n paam-a. B kʋmb n yeelame: “Ade, a zuga lebgame.” (Sebr Sõngo) Dẽ b ra ratame n yõk-a n tall n looge.

La ra yaa vẽeneg t’a Zezi sãooga raoã zĩna sẽn da tarã. Gʋlsdbã la Fariziẽ rãmbã ra miimi tɩ b ka tõe n kɩɩs yel-kãngã sẽn yaa sɩdã ye. Rẽ n so tɩ b ra yet neba woto sẽn na yɩl n sãbg a Zezi: “Dao kãng ka rigd zĩn dãmba a sã n ka ne a Beelzebub pãnga sẽn yaa zĩn dãmba naab ye.”

A Zezi bãnga gʋlsdbã la Fariziẽ rãmbã tagsgo, n bool-b n yeele: “Welgr sẽn be soolem ninga fãa na sãam, la welgr sẽn kẽed tẽng ninga bɩ yir ninga fãa kõn yals ye. Sʋɩtãana sã n digd Sʋɩtãana a welga ne a menga. Dẽ a soolem na n yɩɩ wãn n yalse?”

Ad wã yaa gomd b sẽn ka tõe n kɩɩse! Fariziẽ rãmbã ra yetame tɩ bãmb sʋkã neb kẽer n da rigd zĩn dãmba. Rẽ n so t’a Zezi sok-ba: “La mam sã n digd zĩn dãmba ne a Beelzebub pãnga, yãmb kamba rigda bãmb ne ãnda pãnga?” A Zezi rat n yeelame tɩ sã n yaa woto, sẽn be ne yẽ wã n be ne bãmb me. Rẽ poore a wilg-b-la woto: “La mam sã n digd zĩn dãmb ne Wẽnnaam [vʋʋsem sõng] pãnga, dẽ, Wẽnnaam [Rĩungã] waa yãmb nengẽ.”

A Zezi rɩka makr sẽn wilgd tɩ yẽ sẽn digd zĩn dãmbã yaa kaset sẽn wilgd t’a tõee a Sʋɩtãanã, n yeele: “La ned na n yɩɩ wãn n kẽ pãng soab roogẽ n wʋk a teedo t’a sã n ka reng n sẽb pãng soab kãnga? A sã n sẽb-a a tõe n yaool n wʋka a teedã. Ned ninga sẽn ka kẽed maam a zãgsda maam, la ned ning sẽn ka tigisd ne maam a sãeegdame.” Yaa vẽeneg tɩ Fariziẽ rãmba ra ya a Zezi bɛɛba, tɩ wilgdẽ tɩ b yaa Sʋɩtãanã tʋm-tʋmdba. B ra sãeegda Israɛll nebã tɩ b ka wat a Zezi nengẽ ye.

Rẽ n so t’a Zezi keoog bɛɛb kãensã sẽn tar wẽnem wʋsgã tɩ ned ‘kõn paam sugr vʋʋsem sõng tʋʋsg yĩng ye.’ A wilgame: “Ned sã n gom Ninsaal Biigã wẽnga, a tõe n paama sugri, la ned sã n gom [vʋʋsem sõngã] wẽnga a ka tõe n paam sugr dũniyã ka la wakat sẽn wata me ye.” Gʋlsdbã la Fariziẽ rãmbã maana yel-wẽn-kãngã buud Wẽnnaam sẽn ka tõe n kõ sugrã. Tɩ bõe, b yeela ne pʋ-toog tɩ Wẽnnaam vʋʋsem sõngã tʋʋmd ya a Sʋɩtãan tʋʋmde. Matɩe 12:22-32; Mark 3:19-30; Luk 8:1-3; Zã 7:5.

▪ Wãn to la a Zezi sẽn gilg n moon Galile naoor a yiib-n-soabã yaa toor ne a pipi soabã?

▪ Bõe yĩng t’a Zezi roagdbã mak n na n yõk-a?

▪ Wãn-wãn la Fariziẽ rãmbã mak n na n sãbs a Zezi yel-soalmã, la wãn to la a Zezi leok-ba?

▪ Fariziẽ rãmbã tara taal ne bõe, la bõe yĩnga?