Sak 45

Ra ka wõnd a na n yɩɩ a Zezi karen-biig ye

AZEZI sẽn ta mogrã rʋʋndã, ad a sɩd yãa yel-yɛɛsdga! Neb a yiib sẽn yaa nin-toos hal wʋsg n yi yaadã sẽn pẽ be wã pʋgẽ n zoet n segd a Zezi. Zĩn dãmb n da tar-ba. La Biiblã goma a yembr yell n yɩɩda. Tõeeme tɩ yaa yẽ sẽn yaa toaag n yɩɩd a to wã, tɩ zĩn dãmbã leb n kaoos ne-a n yɩɩgã yĩnga.

Ra-kãngã sɩng n vɩɩ yaadẽ wã hal sẽn kaoose, n yaa zaala. Wĩntoog ne yʋngo, wakat fãa a ra kaasdame la a bõot a mengã ne kuga. A ra yaa toaag wʋsg hal tɩ ned ba a yembr da ka tar daood n na n tũ sorã zĩ-kãng ye. B maka naoor wʋsg n na n sẽb-a, la a ra tõsda bãensã la a kaood kutã b sẽn balg a nao wã. Ned ba a ye ra ka tõe-a ye.

Raoã kolga a Zezi n wõgemd a taoore, tɩ zĩn dãmbã sẽn da tar-a wã kɩt t’a kaas woto: “Zezi, Wẽnnaam Sẽn-ka-to Biiga, yãmb data bõe ne maam? Mam kota yãmb ne Wẽnnaam yʋʋre tɩ y ra nams maam ye.”

A Zezi ra yeta zĩna woto: “Zĩn dẽgdo yi n bas rao wã.” Rẽ poore, a Zezi sokame: “Fo yʋʋr la a bõe?”

T’a leoke: “Mam yʋʋr la a Leziõ tõnd sẽn yaa wʋsga yĩnga.” Zĩn dãmbã sã n yã tɩ neb nins b sẽn so wã namsdẽ, noom-b lame. Wõnda b nongame n sũud taab nin-kãens zutu. La a Zezi taoore, b kosame t’a ra rig-b n kẽes bog-zulungẽ wã ye. Ka yɛsa, d le neeme t’a Zezi tõogã yaa kãsenga, bala a ra tõee zĩn-wẽnsã menga. Woto leb n wilgdame tɩ zĩn dãmbã miime tɩ Wẽnnaam na n wa baas n kaoo bãmb ne b taoor soab a Sʋɩtãan munaafɩɩk bʋʋdo, n ning-b bog-zulung pʋgẽ.

Kurkui 2 000 n da wãbd yamd tãngã sẽn pẽ be wã zugu. Dẽ zĩn dãmbã yeelame: “Bɩ y tʋm tõnd tɩ d tɩ kẽ kurkuyã.” Wõnda zĩn dãmbã sã n kẽ bõn-naandsã yĩnsẽ tɩ b namsdẽ, noom-b lame. A Zezi sẽn kõ-b noor tɩ b kẽ kurkuyã, bãmb 2 000 wã fãa zoe n tuum n tɩ yii tãngã geemd zug n dʋʋg mogrã pʋgẽ tɩ koomã rɩ-ba.

Neb nins sẽn da kɩɩmd kurkuyã sẽn yã rẽ, b yɩɩ tao-tao n tɩ togs kɩbarã galʋ-tẽngã pʋgẽ la tẽn-kɩremsã. Rẽ kɩtame tɩ neba yi n wa ges bũmb ning sẽn maanã. B taame n yã rao wã zĩn dãmb sẽn yi n basã. Ges-y koe, rao wã ra yera fut masã n zĩ a Zezi taoore, la a mi a nenga!

Neb sẽn maan kaset ne yellã togsa rao wã sãoogr sẽn yɩ to-to. B leb n togsa nebã kurkuyã kũum sẽn yɩ yel-solemdã. Nebã sẽn wʋm dẽ wã, rabeem kãseng n yõk-b tɩ b bõos a Zezi t’a maan sugr la a yi b tẽngẽ. Dẽ a Zezi sakame n leb n kẽ koom koglgã pʋgẽ. Raoã zĩna sẽn da tarã bõosame t’a Zezi bas t’a tũ-a. La a Zezi yeel-a lame: “Kuil f meng nebẽ n togs bãmb bũmb ninga fãa Zusoaba sẽn maan foomã, la bãmb sẽn yɩ wãn n zoe fo nimbãanegã.”

A Zezi ra mi n yeta neb nins a sẽn sãoogda tɩ b ra maan tɩ ned bãng ye. Bala a ra ka rat tɩ nebã tagsg yẽ zug tik kɩbay goalem zut ye. La a sẽn ka maan woto so-kãngã wã zemsame, bala rao ning zĩna sẽn da tarã na n kõo neb nins a Zezi sẽn ka na n le tõog n segã kaseto. Sẽn paase, raoã meng belem na n yɩɩ kaset sẽn wilgd t’a Zezi tõe n maana yel-sõmde. La woto na n kɩɩsa ziri buud fãa b sẽn tõe n wa yelg kurkuyã meneng wɛɛngẽ.

Rao wã zĩna sẽn da tarã reega a Zezi noore, n lebg n looge. A sɩngame n moond Dekapoll fãa pʋgẽ bũmb nins a Zezi sẽn maan n kõ yẽ wã, la woto linga neba wʋsgo. Matɩe 8:28-34; Mark 5:1-20; Luk 8:26-39; Wilgri 20:1-3.

▪ Sẽn mik tɩ yaa neb a yiib la zĩn dãmb tarã, bõe yĩng tɩ b gomd a yembr yell n yɩɩda?

▪ Bõe n wilgd tɩ zĩn dãmbã miimi tɩ beoog-daare b na n ning-b-la bog-zulungẽ?

▪ Wõnda yaa bõe yĩng la zĩn dãmbã sẽn nong n kẽed ninsaalbã la rũmsã?

▪ Bõe yĩng tɩ so-kãngã a Zezi pa maan wa a sẽn da minim n maandẽ wã, n kõ rao wã noor t’a tɩ togs neb a taabã bũmb nins yẽ sẽn maan n kõ-a wã?