Sak 48

A Zezi yii a Zairus yirã n leb n debd Nazarɛt

A ZEZI sɩd tʋma wʋsg baraare. A yii Dekapoll n tũ mogrã n wa, n sãoog pag sẽn da tar bãag t’a zɩɩm yita, la a vʋʋg a Zairus bipugla. La wĩndgã nan pa kẽ ye. A Zezi sẽn da wa n yit a Zairus yirã, zoens a yiib n da pʋgd-a n kaasd woto: “A Davɩɩd Biiga, zoe-y tõnd nimbãanega!”

Nin-kãensã sẽn bool a Zezi t’a “Davɩɩd biigã,” wilgdame tɩ b tẽedame t’a Zezi ya a Davɩɩd naamã rogem-pʋɩɩr dɩta, tɩ rẽ kɩt t’a yaa Mesi ning b sẽn kãabã. La a Zezi maana wa a ka wʋmd b bõosgã ye, tõe tɩ yaa sẽn na yɩl n ges b pẽdgrã sẽn na n ta zĩig ninga. La b ka bas b kaasgã ye. B tũu a Zezi n kẽng a sẽn da beẽ wã. A Zezi sẽn kẽ zakẽ wã, bãmb me tũume n kẽ.

Beenẽ a Zezi sokame: “Yãmb tẽedame tɩ mam tõe n maana bõn-kãng bɩ?”

Tɩ b leok ne bas-yard tɩ: “N-ye, Zusoaba.”

Woto a Zezi tika b ninã, n yeele: “Bɩ yɩ wa y sẽn tẽede.” (Sebr Sõngo) Zĩig pʋgẽ bala b nina pukame! Rẽ poore, a Zezi kõ-b-la no-kãngã: “Gũus-y la y ra sak tɩ ned bãng ye.” La b sũ-noogã sẽn yaa kãsengã yĩnga, b pa kelg a Zezi noorã ye. B tɩ yelga a yʋʋrã tẽn-kɩremsã fãa pʋsẽ.

Nin-kãensã sẽn da loogda bal la neb a taab wa ne ned zĩn sẽn tara. Zĩna ra maaname tɩ rao wã lebg muka. A Zezi riga zĩna n yiisi, tɩ rao wã sɩng goam zĩig pʋgẽ. Yel-solem kãensã yɛɛsa kʋʋngã, tɩ b yeele: “Ned nan ka yã woto Israɛll [neba] sʋk ye.”

Fariziẽ rãmb me n da be be. B ra ka tõe n kɩɩs t’a Zezi n maan yel-soalmã ye. La b wẽnema yĩnga, b leb n ninga a Zezi taale, n yeel tɩ ka ne Wẽnnaam pãng la a maand yel-soalmã ye, n yeele: “Bãmb digda zĩn dãmba ne zĩn dãmba naab pãnga.”

Yel-kãensã poor bilfu, a Zezi lebg n kẽnga a tẽngẽ wã Nazarɛte. La so-kãngã a karen-biisã ra tũud-a lame. Sẽn zems yʋʋmd la woto, a ra kẽnga karen-doogẽ wã n tɩ zãms neba be. Pipi wã neba sũy yɩɩ noog ne a goamã, la rẽ poore, b sũyã yika ne a zãmsgã tɩ b mak n na n kʋ-a. La masã a Zezi wilga nimbãan-zoeere, n leb n bao n na n sõng a ba-yirã neba.

Zĩis wʋsgo neba kaoogdame n debd a Zezi nengẽ, la wõnda kaanẽ pa woto ye. Dẽ, vʋʋsgã raare, a Zezi kẽnga karen-doogẽ wã n na n tɩ zãms nebã. A goama linga a kɛlgdba wʋsgo. Tɩ b soke: “Bãmb paama yam kãngã ne bõn-bãn-kãensã yɛ? Ka bãmb la ra-wãada biig wɛ? Ka b ma la a Maari la? Ka bãmb yaop la a Zak ne a Zozɛf la a Sɩmo ne a Ziid la? B tãopa fãa ka be tõnd sʋk ka sɩda? Bãmb paama bõn-kãens fãa yɛ?”

B tagsgã ra yaa woto: ‘A Zezi me yaa tẽngã ned bal wa tõndo. A bɩɩ tõnd nifẽ, d mi a neba. Yẽ na n yɩɩ wãn n wa yɩ Mesi wã?’ Dẽ, baa ne a yam kãsengã la a yel-soalmã sẽn kõt kaset ne rẽ wã, b pa sak n tẽ-a ye. Ba a Zezi mengã zak neba, b sẽn minim-a wã yĩngã, b ka rat n tẽ-a ye. Rẽ kɩtame t’a Zezi yeel woto: “Bãngd ka kongd waoogre sã n ka a meng tẽngẽ la a meng zaka pʋgẽ ye.”

Sɩda, b tẽeb kaalma linga a Zezi. Woto yĩnga, sã n ka a sẽn tik a nug bãad dãmb a wãn zut n sãoog-bã, a ka maan yel-soalem be ye. Matɩe 9:27-34; 13:54-58; Mark 6:1-6; Ezai 9:6.

▪ B sẽn bool a Zezi t’a “Davɩɩd biiga,” bõe la zoens a yiibã wilg tɩ b tẽedame?

▪ Sã n yaa ne Fariziẽ rãmbã, a Zezi yel-soalmã yita yɛɛnẽ?

▪ Bõe yĩng t’a Zezi sẽn lebg n na n tɩ sõng Nazarɛt nebã sɩd yaa nimbãan-zoeere?

▪ Wãn-wãn la Nazarɛt nebã reeg a Zezi, la bõe yĩnga?