Sak 50

A segla a karen-biisã tɩ b yals kãn-kãe b bɛɛbã namsg taoore

AZEZI sẽn wilg a tʋm-tʋmdbã moonegã tʋʋmd sẽn segd n maan to-to n sa poore, a yeel-b-la woto n keoog-b bɛɛbã wɛɛngẽ: “Gese, mam tʋmda yãmb wa piis digd-n-yĩids sʋka. . . . Gũus-y yãmb mens ne nebã, tɩ bõe, bãmb na n talla yãmb n kẽng bʋʋd zĩisi, la b na n pãba yãmb ne kal-waas b karen-dotẽ. B na n talla yãmb n kẽng guvɛrneer dãmb ne rĩm dãmb taoor mam yĩnga.”

Baa ne nams-toaagã a Zezi karen-biisã sẽn da na n paamã, a kõ-b-la bas-m-yam n kãab n yeele: “B sã n tall yãmb n kẽnge, bɩ y ra maan yɩɩr ne yãmb sẽn na n yɩ wãn n gom walla yãmb sẽn na n togs bũmb ninga ye. Wakat kãng bala, b na n wilga yãmb y sẽn na n gom bũmb ninga. Tɩ bõe, ka yãmb n na n gom ye, yaa yãmb Ba [vʋʋsem sõng] sẽn be yãmb pʋsẽ wã n na n gom.”

A Zezi paasame: “Neb kẽer na n kɩtame tɩ b kʋ b ba-biisi, la ba rãmb na n maana b kamb woto, la kamb me na n kɩɩsa b ba rãmb ne b ma rãmb n kɩt tɩ b kʋ-ba.” La a paase: “Neba fãa na n kisga yãmb mam yʋʋrã yĩnga, la ned ninga sẽn na n tall a tẽeb makr pʋgẽ hal tɩ wakat ta, a na paam fãagre.”

Moonegã yõod n yɩɩd bũmb fãa. Rẽ n so t’a Zezi wilg vẽeneg tɩ b segdame n gũusi, sẽn na yɩl n ket n maand tʋʋmdã tɩ gɩdgr kaẽ ye. A yeelame: “B sã n nams yãmb tẽng a yembre, bɩ y zoe n kẽng tẽng a to. Mam yeta yãmb sɩda, yãmb ka na n tõog n saag Israɛll tẽnsa fãa n sɛ tɩ Ninsaal Biiga wa ye.”

Yaa sɩd tɩ ra ya a tʋm-tʋmdb 12 wã la a Zezi kõ no-kãensã, n keoog-ba, la a keng-b pelse. La bõn-kãensã paka b rãmb nins sẽn da na n moon koɛɛgã dũniyã gill zugã a kũumã la a vʋʋgrã poorã me. Sẽn wilgd rẽ ya a sẽn yeel tɩ ‘neba fãa na n kisga’ a karen-biisã, la pa Israɛll neba a sẽn tʋm a tʋm-tʋmdbã tɩ b tɩ moonã balã. Sẽn paase, yɩɩ vẽeneg t’a Zezi sẽn tʋm-b tɩ b tɩ moon wakat bilfã wakatã, b pa tall tʋm-tʋmdbã n kẽng guvɛrneer dãmb la nanambs taoor ye. Sẽn leb n paase, tẽedb zags neb pa kɩt tɩ b kʋ-b rẽ wẽnd me ye.

A Zezi yeelame t’a karen-biisã ra ka na n saag n moon Israɛll tẽnsa fãa n sa tɩ “Ninsaal Biiga [ka] wa” ye. Woto ra yaa bãngr gomd la a Zezi togs-do, n wilgdẽ t’a karen-biisã ka na n saag dũniyã fãa n moon Rĩungã Wẽnnaam sẽn luglã tɩ Rĩm a Zezi Kirist a sẽn kõ ziirã nan ka wa ye. La waoong kãng ya a Zeova sẽn na n tʋm-a t’a wa sãam nin-wẽnsã Armagedõ wã.

A Zezi kẽnga taoor ne a saglsã koe-noogã mooneg wɛɛngẽ n yeele: “Karen-biig ka yɩɩd a karen-saamb ye, la tʋm-tʋmd ka yɩɩd a zu-soab ye.” Dẽ a Zezi karen-biisã tog n ninga b yamẽ tɩ namsg buud ning a sẽn paam, a sẽn moon Wẽnnaam Rĩungã yĩngã, na n waa bãmb zut me. Baasg zãnga, a sagl-b-la woto: “Bɩ y ra zoe neb nins sẽn kʋʋd yĩngã, la b ka tõe n kʋ sɩɩga ye. Sẽn yɩɩda bɩ y zoe sẽn tõe n sãam-a sɩɩga ne yĩng a yiib fãa [Zeyɛnnã].”

A Zezi mengã ra na n kõo makr zĩ-kãng wɛɛngẽ. Ne raoodo, a ra na n saka kũum, sẽn na yɩl n da bas Pãng Sẽn-tõeyã-fãa soabã sakre, sẽn yaa Wẽnnaam a Zeova wã ye. N-ye, ya a Zeova n tõe n kʋ ned “sɩɩga,” (sẽn dat n yeel ka, tɩ saagr ning a soabã sẽn tar n na n vɩɩmd beoog-daarã), bɩ n vʋʋg n wa paam n vɩɩmd wakat sẽn ka sɛtã. Ad tõnd saasẽ Ba a Zeova sɩd yaa Wẽnnaam sẽn tar nonglem la nimbãan-zoeere!

Rẽ poore a Zezi kenga a karen-biisã pelse, n dɩk makr sẽn wilgd t’a Zeova geta b yell ne nonglem. A sokame: “Yirs a yiib yɩɩda tãma sɩda?” (Sebr Sõngo) La a paase: “La baasgo, a yembr ka lʋɩt tẽng tɩ yãmb Ba ka yã ye. La baa yãmb zoobda fãa sõdame. Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo.”

Rĩungã koɛɛg a Zezi sẽn tʋm a karen-biisã tɩ b tɩ moonã na n welga zags neb ne taaba. Bala zak a yembr pʋgẽ, neb kẽer na n saka koɛɛgã t’a taab zãgse. A wilgame: “Bɩ y ra tags tɩ mam waame tɩ laafɩ zĩnd ye, mam waame tɩ sʋʋg zĩndi.” Woto zak pʋgẽ, dɩlla ned tall daood n tõog n sak Biiblã sɩda. Dẽ a Zezi yeelame: “Ned ninga sẽn nong a ba bɩ a ma n yɩɩd maam, a ka zems ne maam ye. La ned ninga sẽn nong a biribla bɩ a bipugla n yɩɩd maam, a ka zems ne maam ye.”

Sẽn na n baas a saglsã, a Zezi wilgame tɩ ned ning sẽn na n deeg a karen-biisã reegda yẽ me. “La ned sã n kõ kom-bõoneg kãensa ned a yembr ko-maasg t’a yũ, a sẽn yaa mam karen-biiga yĩnga, mam yeta yãmb sɩda t’a kõn kong keoor ye.” Matɩe 10:16-42.

▪ A Zezi keooga a karen-biisã tɩ bõe n gũud-ba?

▪ Bõe la a Zezi yeel n keng b raood la a bels-ba?

▪ Bõe yĩng tɩ noy nins a Zezi sẽn kõ wã pak rũndã-rũndã kiris-nebã me?

▪ Wãn to la a Zezi karen-biig ka yɩɩd a karen-saamba?