Sak 51

B kʋʋ ned rogem daar tẽegr kibsẽ

A ZEZI kõo a karen-biisã noy la a tʋm-b yiib-yiib tɩ b tɩ moone. Tõeeme t’a Pɩɛɛr ne a Ãnder sẽn yaa ba-biisã tũu taaba, tõe tɩ yɩɩ woto me ne a Zak la a Zã, a Filip ne a Bartelemi, a Toma ne a Matɩe, a Zak ne a Tade, n paas a Sɩmo ne a Zida Iskariote. Moondb sul a yoobã tɩ togsa Rĩungã koe-noog la b maan yel-soalem zĩig ning fãa b sẽn kẽngẽ.

Wakat kãng t’a Zã ra ket n bee bãens-roogẽ. Yaa yʋʋm a yiib la bal b sẽn kẽes a Zã roogo. Tẽeg-y t’a Zã rag n togsa zãma sʋk t’a Herood Ãntipas sẽn dɩk a ba-biig a Filip pag a Herodiaad n maan a pagã ka zems ye. A Herood Ãntipas ra yetame t’a tũuda a Moiiz Tõogã. Woto yĩnga, a Zã sẽn puk a bãong n wilg tɩ kãadem a woto yaa yoobã zemsame. Rẽ n so t’a Herood ra kẽes a Zã bãens roogo, la wõnda ya a pag a Herodiaad n tus-a t’a maan woto.

A Herood Ãntipas bãngame t’a Zã yaa nin-tɩrga, hal meng n da kelgd-a ne sũ-noogo. Woto yĩnga, a ra ka mi a sẽn na n maaneg ne-a ye. La a Herodiaad yẽ ra kisa a Zã, n da baood wakat fãa n na n kɩt tɩ b kʋ-a. A sẽn da gũud tɩ bũmb ning yɩ sabab t’a tõog n maan dẽ wã baas n waame.

Bilf bal sẽn deng tɩ yʋʋmd 32 Pakã ta, a Herood maana a rogem daar tẽegr kibs kãsenga. A Herood kug-zĩidbã la a sodaas nanambsã, n paas Galile tẽngã taoor dãmb da tigma taab kibsẽ wã. Kibsã wakate, b boola a Salome, sẽn ya a Herodiaad bipugl a sẽn paam ne a pĩnd sɩd a Filipã, t’a wa sao tɩ neba gese. A saoogã yɩɩ rapã noog hal wʋsgo.

A Herood sũurã yɩɩ noog hal wʋsg ne a Salome t’a yeel woto: “Kos maam f sẽn dat tɩ m na kõ-fo.” A tol n wẽename menga: “Fo sẽn kos maam bũmb ninga mam na kõ foom, ba a sã n yaa mam soolmã pʋɩ-sʋka.”

A Salome yiime n tɩ bao saglg a ma wã nengẽ la a yaool n wa leoke. A soka a ma: “M kos bõe?”

Bũmb ning a Herodiaad sẽn da gũudã yaa n wa! A leoka zĩig pʋgẽ t’a kos “a Zãmbatiis zugã.”

Tao-tao bala a Salome lebgame n tɩ kos woto: “Mam datame tɩ y kõ maam a Zãmbatiis zugã ne lengr masã bala.”

A Herood sũurã sãama wʋsgo. La sãambã sẽn wʋm a wẽenegã yĩnga, a sã n pa sake, na n yɩɩ yãnd ne-a, baa rẽ sã n na n tũu ne ned sẽn ka tar taal kʋʋbo. Zĩig pʋgẽ, a tʋma sodaag bãensã roogẽ t’a tɩ fiuug a Zã zugã. Sodaagã lebga tao-tao n tall a Zã zugã ne laag n wa kɩs a Salome, tɩ yẽ me tɩ kɩs a ma. A Zã karen-biisã sẽn wʋm kɩbarã, b wa n dɩka a Zã kũumã n tɩ solge, la b tɩ togs a Zezi.

Kaoosg zugẽ, a Herood wʋmame t’a Zezi sãoogda neb la a rigd zĩn dãmba. Woto kẽes-a-la rabeem, bala a ra yɛɛsda a Zezi na n wa sɩd ya a Zã b sẽn vʋʋg kũum sʋka. Rẽ poore, a ra tʋlla wʋsg n yã a Zezi. La ka sẽn na yɩl n kelg a moonegã ye, yaa sẽn na yɩl n bãng a sẽn tagsdã sã n sɩd yaa sɩda. Matɩe 10:1-5; 11:1; 14:1-12; Mark 6:14-29; Luk 9:7-9.

▪ Bõe yĩng tɩ b kẽes a Zã roogo, la bõe yĩng t’a Herood ra ka rat n kʋ-a?

▪ Wãn-wãn la a Herodiaad baas n tõog n kɩt tɩ b kʋ a Zã?

▪ A Zã kũumã poore, bõe yĩng t’a Herood ra rat n yã a Zezi?