Sak 54

A Zezi yaa ‘bur meng-meng sẽn yit yĩngri’

A ZEZI ra nan maana yel-solemd n dɩlg neb tusa, tɩ neba ra rat n kõ-a naam, la a zoe n loogame. Baraar yʋngo, a kẽna Galile Mogrã zugu, seb-kãsengã sẽn da rãmbdã. A fãaga a Pɩɛɛr sẽn kẽn koomã sẽn gudgã zug n sɩng bõrbã. Rẽ poore, a sigsa ko-wiisã sẽn da vũud ne pãngã, n fãag a karen-biisã tɩ b koglgã pa bõr ye.

Vẽk-n-beoogo, neb nins a Zezi sẽn da maan yel-solemd n dɩlg zĩig sẽn ka zãr ne Galile Mogrã bao-a lame n yã-a Kapɛrnawom sɛɛgẽ, n sok-a: “Karen-saamba, yãmb waa ka rabʋre?” Dẽ a Zezi zab-b lame n yeel tɩ b sẽn da gẽesd-a wã, yaa sẽn na yɩl n le paam dɩɩb n dɩ zaalem bala. Rẽ n so t’a sagl-b tɩ b ra tʋm rɩɩb ning sẽn sãamdã yĩng ye, la tɩ b tʋm rɩɩb ning sẽn paad wakat sẽn ka sɛtã yĩngã. Rẽ, neba sokame: “Tõnd na n maana wãn n maan Wẽnnaam tʋʋmde?”

A Zezi togsa tʋʋmd a yembr yõod sẽn yaa kãseng n yɩɩd n wilgi: “Wẽnnaam tʋʋmd yaa tɩ yãmb tẽ bãmb sẽn tʋm a soabã.”

Baasg zãnga, baa ne yel-soalma fãa a Zezi sẽn maanã, nebã ka tar tẽeb ne-a ye. Bãng-y tɩ ne yel-solem kãensã fãa a sẽn maanã, b sokame: “Woto yĩnga yãmb wilgda tõnd bõe bãnde tɩ d yã n tẽ yãmba? Yãmb maanda bõe? Tõnd ba rãmba ra rɩɩ mann weoog pʋgẽ, wa sẽn gʋlsã: ‘Bãmb kõo bãmb bur sẽn yi [saasẽ] tɩ b rɩ.’ ”

B sẽn kos bãndã, a Zezi wilg-b-la rɩɩb b sẽn kõ ne yel-solemd sẽn yitẽ wã vẽenega, n leoke: ‘Ka a Moiiz n kõ yãmb bur sẽn yi yĩngr ye, la m Ba kõta yãmb bur meng-meng sẽn yi yĩngri. Tɩ bõe, bur ninga Wẽnnaam sẽn kõta yaa ned ning sẽn yit yĩngr n kõt dũniyã vɩɩmã.’

Dẽ neba yeelame: “Zusoaba, bɩ y kõ tõnd bur kãng daar fãa.”

T’a Zezi yeel-ba: “Mam yaa bur sẽn kõt vɩɩm. Ned ninga sẽn wat mam nengẽ, kom kõn yõk-a abada ye. La ned ninga sẽn tẽed maam, ko-yũud kõn yõk yẽnda abada ye. La mam yeta yãmba tɩ yãmb yãa maam, la yãmb ka tẽ ye. M ba sẽn kõ maam neb ninsa fãa na n waa mam nengẽ. La ned ninga sẽn wat mam nengẽ mam ka na n dig yẽnda abada ye. Tɩ bõe, mam ka yi [saasẽ] n na n wa maan m meng ratem ye, la yaa tɩ maan sẽn tʋm-a maama ratem. La sẽn tʋm-a maama ratem yaa tɩ m da bas ba a yembr bãmb sẽn kõ maama tɩ menem ye. La m na n vʋʋga bãmb yaoolem daare. M ba ratem yaa tɩ ned ninga fãa sẽn get b Biiga la a tẽed bãmba, a na paam vɩɩm sẽn ka sɛta.”

Dẽ Zʋɩf rãmbã sɩnga yẽgeng ne a Zezi, a sẽn yeel tɩ ‘yẽ yaa bur sẽn yi yĩngrã’ yĩnga. Sã n yaa ne bãmba a Zezi yaa ninsaal wa a taabã bala. Wa Nazarɛt neba sẽn maanã, bãmb me yeela woto: “Yõ wã ka a Zezi ninga sẽn ya a Zozɛf biiga tõnd sẽn mi b ba ne b ma wã wɛ? La yaa bõe tɩ b yetẽ tɩ b yii [saasẽ]?”

Dẽ a Zezi leok-b-la woto: “Da yẽgem-y ye. Ned ka tõe n wa mam nengẽ tɩ ka m Ba sẽn tʋm-a maama n bool-a ye. La mam na n vʋʋga yẽnda yaoolem daare. A gʋlsa no-rɛɛsdba sɛba pʋsẽ yaa: ‘Bãmb fãa na n paama zãmsg Wẽnnaam [a Zeova] nengẽ.’ Woto yĩnga, ned ninga fãa sẽn wʋm m Ba koɛɛgã n deeg bãmb zãmsgã, a wata mam nengẽ. A ka tɩ ned da yãa m Ba ye, yaa ned ninga sẽn yi Wẽnnaam nengẽ wã bal n da yã bãmba. Mam yeta yãmb sɩd-sɩda tɩ ned ninga sẽn tẽed maam tara vɩɩm sẽn ka sɛta.”

A Zezi leb n yeela woto n paase: “Mam yaa bur sẽn kõt vɩɩm. Yãmb ba rãmb ra rɩɩ mann weoogã pʋgẽ, la b kiime. Bur sẽn yit [yĩngr] yaa woto, ned ninga sẽn dɩt-a kõn ki ye. Mam yaa bur sẽn vɩ sẽn yi [yĩngri]. Ned sã n dɩ bur kãnga, a na n vɩɩ wakat sẽn ka sɛta.” Sɩda, yaa neba sẽn na n tẽe a Zezi, sẽn ya a soab ning Wẽnnaam sẽn tʋmã bal la b tõe n paam vɩɩm sẽn ka sɛta. Mann bɩ rɩɩb buud a to ka tõe n kɩt tɩ d paam dẽ ye!

Neba sẽn da yã a Zezi Kapɛrnawom sɛɛgẽ wã, wõnda yaa rẽ poor bilf la sõasgã sẽn tɩ loe ne bur sẽn yi yĩngrã sɩng-yã. La sõasgã kẽnga taoor hali n ta a zug tẽn-sʋk rẽ poore, a Zezi sẽn da wa n zãmsd karen-doog a yembr pʋgẽ Kapɛrnawom. Zã 6:25-51, 59; Yɩɩl Sõamyã 78:24; Ezai 54:13; Matɩe 13:55-57.

▪ Bõe n deng n maan t’a Zezi yaool n na n gom bur sẽn yit saasẽ wã yelle?

▪ A Zezi sẽn maan bũmb ning paalmã yĩngã, bõe yĩng tɩ neba sẽn kos a Zezi bãndã ka zems lɛ-lɛ?

▪ Bõe yĩng tɩ Zʋɩf rãmbã yẽgem ne a Zezi, a sẽn yeel t’a yaa bur meng-meng sẽn yit yĩngrã?

▪ Yɛ la sõasgã sẽn tɩ loe ne bur sẽn yit yĩngrã zĩnd-yã?