Sak 57
A Zezi zoee sẽn namsd-ba nimbãanega
A ZEZI ninga Fariziẽ rãmbã taal b sẽn tũud rog-m-migs sẽn be bãmb mens nafr yĩngã balã, la a loog ne a karen-biisã. Tẽeg-y tɩ sẽn pa kaoose, a Zezi ra makame n na n bao zĩig n vʋʋs ne a karen-biisã bilfu. La kʋʋngã sẽn da bʋʋg-ba yĩnga, rẽ ka tõog ye. Masã yẽ ne a karen-biisã zãaga zĩig n kẽng rɩtg babgo, Tɩɩr la Sɩdõ soolmẽ. Wõnda yaa so-kãngã bal la a Zezi ne a karen-biisã long Israɛll toadgã.
B paama zak n sigi. Rẽ poore, a Zezi yeelame tɩ b ra maan tɩ ned bãng bãmb sẽn beẽ wã ye. Baasg zãnga, baa tẽn-kãngã sẽn ka Israɛll tẽngã, a ka tõog tɩ ned ka bãng t’a waa be ye. Gɛrk poak sẽn dog Fenisi sẽn be Siiri soolmẽ n yã-a n sɩng-a bõosgo: “Zusoaba, a Davɩɩd Biiga, zoe-y mam nimbãanega! Zĩna namsda m bipugla wʋsgo.” La a Zezi ka leok ye.
A Zezi karen-biisã wa n baas n yeel-a lame: “Bɩ y rig yẽ t’a looge, tɩ bõe, a pʋgda tõnd n kelemdẽ.” A Zezi wilga a sẽn pa kelgd pagã võore, n yeele: “B ka tʋm maam ned a to nengẽ ye. Yaa Israɛll buuda sẽn wẽnd piis sẽn menema bal nengẽ la b tʋm maam.”
La pagã talla pẽdgr bala. A kolgame n wõgemd a Zezi taoore, n bõos-a: “Zusoaba, sõng-y maam.”
Ad pagã sẽn tall bõosg ne pʋ-peelem woto wã, a nimbãaneg sɩd yõka a Zezi! Baasg zãnga, a wilgame tɩ sẽn pak yẽ pipi yaa tʋm n sõng Israɛll sẽn yaa Wẽnnaam nin-buiidã. Wakat kãng me, a Zezi yeela bũmbu, tɩ wõnd yaa sẽn na yɩl n mak pagã tẽeb n gese. A goma wa Zʋɩf rãmbã sẽn mi n sãbsd buud a taabã, n yeele: “A ka zems tɩ b rɩk kamb dɩɩb n lob ba-bi ye.”
Sãmbg sẽn ka be, a Zezi wilga ne a koɛɛgã la a nen-wamdã t’a sɩd nonga sẽn ka-b Zʋɩf rãmbã. Zʋɩf rãmbã ra getame tɩ bu-zẽmsã neb yaa wa baas bala. Ba a Zezi sẽn tik tags-kãngã zugã, sɩd-sɩda a tũnuga ne gom-bil ning b sẽn lebg tɩ baag Biiblã gʋlsg buud-gomd pʋgẽ wã ne manesem sẽn kɩt tɩ Zʋɩf rãmbã sẽn mak bu-zẽmsã neb ne baasã sakd kelgr n yɩɩda. Paga sũur pa yik ye, a tika a Zezi sẽn gom wa Zʋɩf rãmbã sẽn mi n sãbs buud a taabã zugu, n yeel ne sik-m-menga: ‘N-ye, Zusoaba, la ba-bi rɩta rɩ-zers sẽn lʋɩt bãmb zu-soaba taabl tẽngre.’
Dẽ a Zezi leokame: “Paga, fo tẽeb yaa kãsenga. Bɩ a yɩ wa fo sẽn datã.” La sɩd yɩɩ woto me! Pagã sẽn leb a yirã, a tɩ yãame t’a bi-puglã sãooga zãng fasɩ, n gãe gãagã zugu.
A Zezi ne a karen-biisã yii Sɩdõ mogrã noor babg n pɩʋʋg tẽngã pʋgẽ n tees Zʋrdẽ Kʋɩlgã ko-bundem zĩigẽ. Wõnda b tɩ rʋʋga Zʋrdẽ Kʋɩlgã zĩig ning Galile Mogrã zugẽ, n kẽ Dekapoll sẽn be mogrã yaangã babgo. B rʋʋ tãngã, la kʋʋngã yã-b lame, n tall wobse, põeyã, zoense, mugsi, koms rãmb la bãad dãmb a taab n wa a Zezi nengẽ. B rʋʋg-b-la a Zezi taoor t’a sãoog-ba. Kʋʋngã sẽn yã tɩ mugsã gomda, tɩ wobsã kẽndã, tɩ zoensã paama b nina, yɛɛs-b lame, tɩ b sɩng n pẽgd Israɛll Wẽnnaamã.
Rao a yembr n da be n yaa wʋng n ka tõe n gom sõma ye, t’a Zezi ges a yell ne manesem sẽn pa wõnd a taaba. Naoor wʋsgo, wʋng pa mi a sẽn na n ning a meng zĩig ning kʋʋng sʋk ye. Tõeeme t’a Zezi yãame tɩ rao wã sɩd bee yɩɩr pʋgẽ. Dẽ n so t’a Zezi zoe a nimbãanega, n peeg-a n yi kɛɛnga, bãmb b yiibu, n wilg-a a sẽn na n maan bũmb ning n kõ-a. A Zezi rɩka a nus-bi wã n ning raoa tʋbẽ, n tʋbse, la a sɩɩs rao wã zɩlemde, n yaool n nak yĩngri, n wẽ sir sõma, la a yeele: “Yoke.” Zĩig pʋgẽ rao wã tʋb yokame, t’a zɩlemdã lak t’a tõe n gom wa neb a taabã.
A Zezi sẽn sãoog neb wʋsg woto wã, kʋʋngã wilga b sũ-noog n yeele: “Bãmb maanda tʋʋma fãa neere, bãmb kɩtdame tɩ baa wʋms wʋm tɩ mugsa gom.” Matɩe 15:21-31; Mark 7:24-37.
▪ Bõe yĩng t’a Zezi pa sãoog Gɛrk poakã biig zĩig pʋgẽ?
▪ A sẽn sãoog bipuglã poore, yɛ la a Zezi tall a karen-biisã n kẽnge?
▪ Wãn to la a Zezi wilg nimbãan-zoeer ne wʋngã sẽn da ka tõe n gom sõma wã?