Sak 59

A Zezi sɩd yaa ãnda?

AZEZI ne a karen-biisã sẽn da be koom koglg ning pʋgẽ wã sẽn ta Betsayida, neba talla zoang n wa bõos-a t’a tik-a n sãoog-a. A Zezi peega rao wã n yi tẽngã n tʋbs kolkood a ninẽ wã, n sok-a: ‘Fo nee bũmb bɩ?’

Rao wã leokame: “Mam yãta neb sẽn kẽnda, la b wẽnda wa tɩɩse.” A Zezi tika a nus rao wã ninẽ, n sãoog a zondã t’a ne sõma masã. A Zezi kuilsa rao wã n kõ-a noor t’a ra kẽ tẽngã pʋgẽ ye.

Masã a Zezi ne a karen-biisã loogame n digd Filip Sezaare tẽn-bõonegẽ wã, sẽn be Palɛstin rɩtgã. B ra segd n tũu tãng so-woko, n maan kɩlometr 50 n yaool n ta Filip Sezare wã, sẽn yaa zĩig sẽn be rasãnd n be kunkubr zugã. Ra yaa rasem a wãn kẽnde.

A Zezi teka sorẽ n bao zĩig n na n tɩ pʋʋs a yembre. A kũuma keta kiis a wɛ bɩ piig bala, t’a karen-biisã yell da pak-a. Karen-biis wʋsg ra zoe n basame n ka le tũud-a ye. Kẽer ra bee yam-yuusg la sũ-sãang pʋgẽ, bala b sẽn mak n na n maan-a rĩma a zãgsame. Sẽn paase, a bɛɛbã sẽn yeel-a t’a kõ bãnd sẽn yit saasẽ n wilg t’a yaa rĩma, a ka sak ye. Tʋm-tʋmdbã tẽedame t’a Zezi yaa ãnda? B sẽn wa n wa zĩig ning a Zezi sẽn da pʋʋsdã, a sok-b-la woto: “Neba yetame tɩ mam yaa ãnda?”

Tɩ b leoke: “Kẽer yetame tɩ yãmb ya a Zãmbatiisi, kẽer t’a Eli, kẽer t’a Zeremi, walla no-rɛɛs a yembr Wẽnnaam no-rɛɛsdba sʋka.” N-ye, neba tagsdame t’a Zezi yaa nin-kãensã sẽn ki wã sʋk ned a yembr n vʋʋge!

A Zezi leb n sokame: “La yãmb yetame tɩ mam yaa ãnda?”

T’a Pɩɛɛr leok tao-tao n yeele: “Yãmb yaa Kirist, Wẽnnaam sẽn vɩ Biiga.”

A Zezi sakame t’a Pɩɛɛr sẽn yeelã yaa sɩda, n yeele: “Mam yeta foo tɩ fo ya a Pɩɛɛre, la yaa kug-kãng zugu la mam na n vigl m [tigingã]. La kɩɩm-kulg ka na n tõog-a ye.” Yaa ka la a Zezi reng n wilg pipi t’a na n mee tigingu, la t’a nebã ka na n pa kũum pʋgẽ, b sã n kell n yɩ wẽn-sakdb tẽng zug n tɩ tãag b kũum ye. Rẽ poore a yeela a Pɩɛɛr woto: “Mam na n kõo foo [saasẽ Rĩungã] kʋɩlen-biisi.”

Woto a Zezi ra wilgdame t’a Pɩɛɛr na n paama zu-noog tʋʋm-kãsemse. La a Zezi ra ka yet tɩ tʋm-tʋmdbã sʋka a Pɩɛɛr la kãseng n yɩɩda, bɩ tɩ tigingã yẽbga yẽ zug ye. A Zezi mengã la kugr ning zug b sẽn da na n me a tigingã. La makr wɛɛngẽ, b ra na n kõo a Pɩɛɛr kʋɩlen-biis a tãab t’a pak sor n kõ neb sul tɩ b paam n kẽ saasẽ Rĩungã pʋgẽ.

Pipi, yʋʋmd 33 Pãntekotẽ wã, a Pɩɛɛr tũnuga ne pipi kʋɩlen-biigã n wilg Zʋɩf rãmb nins sẽn tek yam n kos sugrã bũmb nins b sẽn da tog n maan n paam fãagrã. Rẽ poor bilf bala, a tũnuga ne kʋɩlen-biig a yiib soabã n pak sor tɩ Samari neb sẽn yaa tẽedbã paam n kẽ Wẽnnaam Rĩungã pʋgẽ. Rẽ poore, yʋʋmd 36 pʋgẽ, a tũnuga ne kʋɩlen-biig a tãab soabã n pak Wẽnnaam Rĩungã sor n kõ a Korney ne a zo-rãmbã, sẽn yaa bu-zẽms neb sẽn pa kẽ bãongã.

A Zezi kell n talla sõasg ne a tʋm-tʋmdbã. A sẽn gom ne-b a namsgã la a kũumã sẽn na n zĩnd Zerizalɛm ka la bilfã yellã, b sũyã sãamame. A Pɩɛɛr rag n ka bãng t’a Zezi na n vʋʋgame n tɩ vɩɩmd saasẽ ye. Dẽ n so t’a peeg a Zezi kɛɛng n yeel-a: “Zusoaba, Wẽnnaam ka na n sak t’a yɩ woto ye! Bõn-kãng ka na n paam yãmb ye.” Dẽ a Zezi wẽnemdame, n leok a Pɩɛɛre: “Leb mam poorẽ Sʋɩtãana. Fo dat n gɩdga mam sore, tɩ bõe, fo tagsg ka Wẽnnaam dẽnd ye, yaa ninsaal dẽnda.”

Wõnda neb a taab n da tũud tʋm-tʋmdbã n togd sor ne a Zezi. Dẽ a Zezi bool-b lame n wilg tɩ ka na n yɩ nana tɩ ned yɩ a karen-biig ye. A yeelame: “Ned sã n dat n tũ maam, bɩ a kɩɩs a meng raabo n dɩk a kũum [da-luk] n tũ maam. Tɩ bõe ned ninga sẽn dat n gũ a vɩɩm, a vɩɩm na sãam. La ned ning sẽn na n bas a vɩɩm mam yĩnga la Koe-nooga yĩnga, a na paam vɩɩm.”

N-ye, a Zezi karen-biisã sã n dat n zems ne a lohormã, b tog n talla raoodo, n kɩɩs b meng raabo. A yeela woto: “Tɩ bõe, ned sã n zoe yãnd mam yĩnga la mam goama yĩng zãmaan kãngã neba sẽn yaa yoaadba la nin-wẽnsa sʋka, mam sẽn yaa Ninsaal Biiga me na zoe yãnd yẽ yĩng wakat ninga mam sẽn na n wa ne m Ba naam la ne malɛg-sõma wã.” Mark 8:22-38; Matɩe 16:13-28; Luk 9:18-27.

▪ Bõe yĩng t’a Zezi karen-biisã yell da pak-a?

▪ Neba ra tagsdame t’a Zezi yaa ãnda?

▪ Kʋɩlen-bi-bʋs la b kõ a Pɩɛɛre, la wãn-wãn to la a tʋm ne-ba?

▪ Rems bʋg la a Pɩɛɛr paam-yã, la bõe yĩnga?