Sak 67

B ka yõk a Zezi ye

ZÃN kibsã ra ket n nan ka sa ye. Tũudmã taoor dãmb tʋma sodaas tɩ b tɩ yõk a Zezi. A Zezi ka bao n na n solg ye. A kell n talla neba zãmsgo, n yeele: “Mam na n zĩnda ne yãmb wakat bilf bala. La mam na n yaool n kẽnga sẽn tʋm-a maama nengẽ. Yãmb na n baoo maam la yãmb kõn yã maam ye. La mam sẽn be zĩig ninga, yãmb ka tõe n wa beenẽ ye.”

Zʋɩf rãmbã ka wʋm gomdã võor ye, rẽ la b ra sogsd taab yaa: “Bãmb na n kẽnga yɛ tɩ tõnd ka yã bãmba? Bãmb na n kẽnga neb nins sẽn sãeeg Gɛrk rãmba sʋka nengẽ n tɩ zãms Gɛrk rãmba bɩ? Gom-kãng võor yaa bõe tɩ bãmb yeele: Yãmb na n baoo maam la yãmb kõn yã maam, la mam sẽn be zĩig ninga yãmb ka tõe n wa beenẽ ye?” Yaa vẽeneg t’a Zezi ra gomda a kũuma sẽn kolgã, la a sẽn na n vʋʋg n tɩ vɩɩmd saasẽ wã yelle. A bɛɛbã ka tõe n pʋg-a n kẽng saasẽ ye.

Rasem a yopoe raarã sẽn yaa kibsã yaoolem daarã ra taame. Kibsã wakate, yibeoog fãa maan-kʋʋd da yãkda koom Siloe bãkã pʋgẽ n daag tɩ sedg n sig tẽn-kugrã sɛɛga. Tõe tɩ yaa yel-kãngã la a Zezi sẽn da tẽegd nebã, a sẽn zẽk a koɛɛg n yeel woto wã: “Ko-yũud sẽn tar a soab bɩ a wa mam nengẽ n wa reeg n yũ. Ned ninga sẽn tẽed maam, ko-vɩɩs kʋɩls na n yii a pʋgẽ wa Gʋlsg Sõng sẽn yetã.”

La sɩd-sɩda ka wã a Zezi ra togsda bõn-kãsems nins sẽn da na n maane, a sã n wa pʋdg vʋʋsem sõngã a karen-biisã zutu. Sɩd yɩɩ woto vẽk-n-yʋʋmdã, Pãntekotã wakate. Beenẽ, vɩɩm koom kʋɩls n sɩd zoe, wakat ning karen-biis 120 wã sẽn sɩng n moond neba koɛɛgã. La hal tɩ wakat kãng ta, vʋʋsem sõng ra ka be ye, sẽn dat n yeele, tɩ b ra nan ka zae Kirist karen-biig ba a yembr ne vʋʋsem sõngo, n bool-a t’a wa vɩɩmd saasẽ ye.

A Zezi zãmsgã kɩtame tɩ neb kẽer yet masã tɩ: ‘Dao kãngã sɩd yaa Wẽnnaam no-rɛɛsã,’ tɩ yaa vẽeneg tɩ b ra gomda no-rɛɛs sẽn yɩɩd a Moiizã b sẽn da kãab t’a na n waame wã yelle. Neb a taab ra yetame: “Bãmb yaa Kirist.” Tɩ neb a taab me kɩɩsd n yetẽ: “Rẽ yĩnga Kirist na n yii Galile soolem la? Gʋlsg Sõng ka yeel tɩ Kirist na n yɩɩ a Davɩɩd yagenga, la tɩ b na n yii tẽng sẽn boond tɩ Betlehɛm, a Davɩɩd sẽn da be zĩig ninga la?”

Dẽ me waa ne welgr neba sʋka. Neb kẽer ra ratame tɩ b yõk a Zezi, la ned ba a yembr ka sɩɩs-a ye. Sodaasã sẽn leb maan-kʋʋdbã kãsem dãmb la Fariziẽ rãmbã nengẽ n ka wa ne a Zezi wã, b sokame: “Yaa bõe tɩ yãmb ka tall bãmb n wa?”

Tɩ sodaasã leoke: “Ned nan ka gom wa rao kãngã abada ye.”

Tũudmã taoor dãmb sũy puugame tɩ b yik yaalgo, tẽn-kãnebo, la tʋya. B gom n paoog-b-la woto: “A tõog n belga yãmb me n tõog la? Dẽ yĩnga, naab bɩ Fariziẽ baa a yen tãa beeme n tẽ bãmb sɩda? La neb kʋʋngã sẽn ka mi tõogã, b yaa neba, kãab-wẽng sẽn be b zutu.”—Kãab-paalgã Koe-noogo.

Dẽ a Nikodɛm sẽn yaa Fariziẽ la Zʋɩf rãmbã naab a yembre (sẽn dat n yeel tɩ Sãnedrẽ wã neda), talla raood n gom n sõng a Zezi. Y tẽrame tɩ yʋʋm a yiib la pʋɩ-sʋk la woto, a Nikodɛm waa a Zezi nengẽ ne yʋngo, n wilg t’a tẽed-a lame. A Nikodɛm yeelame masã: “Tõnd tõogã kaooda ned bʋʋd tɩ d ka reng n kelg a yelle n bãng a sẽn maan bũmb ninga la?”

Ned a yembr bãmb sʋkã sẽn gom n teel a Zezi wã puuga Fariziẽ rãmbã sũy n paas menga. B yeela ne wẽnem: “Yãmb me yaa Galile ned la? Bɩ y bao n gese, la yãmb na bãng tɩ Wẽnnaam no-rɛɛs ka yit Galile ye.”

Baa Gʋlsg Sõamyã sẽn da ka yeel vẽeneg tɩ no-rɛɛs n na n yi Galile wã, b sẽn yeel tɩ bab-kãng neb na n yãa ‘vẽenem kãsengã,’ wilgdame tɩ Kirista na n yii be. Sẽn paase, a Zezi roga Betlehɛm, la a ra leb n ya a Davɩɩd yageng me. Fariziẽ rãmbã ra mii rẽ, la wõnda yaa bãmb n yelg ziri tagsa nins neba sẽn tar a Zezi wɛɛngẽ wã. Zã 7:32-52; Ezai 8:⁠23; 9:⁠1; Matɩe 4:13-17.

▪ Bõe la b maand yibeoog fãa kibsã wakate, la wãn-wãn to la a Zezi tak neba yam n sik rẽ zugu?

▪ Bõe yĩng tɩ sodaasã ka yõk a Zezi, la tũudmã taoor dãmb manesem yɩɩ wãn-wãna?

▪ Ãnda la a Nikodɛm, manesem bʋg la a tall ne a Zezi, la a Fariziẽ taasã talla manesem bʋg ne-a?

▪ Kaset bʋg la d tara, sẽn wilgd tɩ Kiristã ra na n yii Galile?