Sak 69

Baamdã yelle

KIBSÃ wakate, no-koeemdã sẽn yik a Zezi ne Zʋɩf rãmbã taoor dãmbã sʋkã leb n wɩngame n paase. A Zezi sak n deegame: “Mam miimi tɩ yãmb yaa a Abrahaam yagense. La yãmb baooda maam n na n kʋ, mam goama sẽn ka kẽed yãmb sũyã yĩnga. Mam gomda bũmb nins mam sẽn yã m Ba nengẽ, la yãmb me maanda bũmb nins yãmb sẽn yã y ba nengẽ.”

A Zezi ka wilg b ba wã yʋʋr ye, la a wilga vẽeneg tɩ b ba wã yaa toor ne yẽ ba wã. Zʋɩf rãmbã ra ka mi a Zezi sẽn gomd ba ning yellã ye, tɩ b leoke: “A Abrahaam la tõnd Ba.” B ra tagsdame tɩ b tara a Abrahaam sẽn da yaa Wẽnnaam zoa wã tẽeb buudu.

La a Zezi sẽn leok-b woto wã sãama b sũyã: “Yãmb sã n da yaa a Abrahaam kamba, yãmb da na n maana wa a Abrahaam sẽn da maand to-to wã.” Sɩd me biribl halaal rɩkda a ba togs-n-taare. A Zezi paasame: “La masã, mam sẽn togs yãmb sɩd ninga mam sẽn wʋm Wẽnnaam nengẽ wã, yãmb baooda maam n na n kʋ. A Abrahaam ka maan woto ye.” Rẽ n so t’a paase: “Yãmb maanda y ba tʋʋma.”

B ra ket n baas n ka mi a Zezi sẽn gomd a soab ning yellã ye. B ra ket n tarame bal tɩ bãmb ya a Abrahaam kamb halaale, n yetẽ: “Tõnd ka tãmpĩib ye.” Woto yĩnga, b ra yetame tɩ bãmb yaa Wẽnd balemdb hakɩk wala a Abrahaam, n yeele: “Tõnd tara ba a yembre sẽn yaa Wẽnnaam.”

La rẽ yĩnga Wẽnnaam n sɩd yaa b Ba bɩ? A Zezi leokame: “Wẽnnaam sã n da yaa yãmb ba, yãmb da na n nonga maam, tɩ bõe, mam yii Wẽnnaam nengẽ n wa. Mam ka wa m toor ye, bãmb n tʋm maam. Yaa bõe tɩ yãmb ka bãng mam goama?”

A Zezi ra baoodame n na n wilg tũudum taoor dãmb kãensã tɩ b sẽn zãgs tɩ b kõn tẽ-a wã na n waa ne yɛl n kõ-ba. La masã a yeel-b-la vẽenega: “Sʋɩtãana la yãmb ba, la yãmb dat n maana yãmb ba ratem.” A Sʋɩtãan yaa ba sẽn yaa wãn to buudu? A Zezi wilgame tɩ Sʋɩtãanã yaa nin-kʋʋda, la a leb n yeele: “Yẽ yaa ziri yagda, la ziri ba.” Dẽ a Zezi yeela woto n baase: “Ned ninga sẽn yaa Wẽnnaam dẽnda, a reegda Wẽnnaam goama. Yãmb sẽn ka reegdã, yaa yãmb sẽn ka Wẽnnaam dẽnda yĩnga.”

A Zezi sẽn ning Zʋɩf rãmbã taalã puuga b sũyã, tɩ b leoke: “Tõnd ka tar bʋʋm tõnd sẽn yeel tɩ yãmb yaa Samari neda, la tɩ zĩni n tar yãmba sɩda?” Zʋɩf rãmbã ra kisa Samari nebã. Dẽ, b sẽn bool-a tɩ “Samari neda” yaa paoogr la sãbgre.

A Zezi pa kelg b sẽn tʋʋs-a t’a yaa Samari nedã ye. A leokame: “Zĩn ka tar maam ye. Mam waoogda m Ba, la yãmb paoogda maam.” A leb n togsa kãabg sẽn lingdi: “Ned sã n sak mam goama, a kõn tol n ki abada ye.” Yaa vẽeneg t’a Zezi ra ka rat n yeel tɩ neb nins fãa sẽn na n tũ yẽ wã ka na n sɩd tol n ki ye. Ayo, a ra rat n yeelame tɩ b ka na n tol n paam sãoong wakat sẽn-kõn-sa yĩnga, bɩ “kũum a yiib soaba,” sẽn ka be vʋʋgrã ye.

Baasg zãnga, Zʋɩf rãmbã ra tẽedame t’a Zezi yeelame tɩ sẽn tũ-b yẽ wã ka na n tol n ki ye. Woto yĩnga, b yeelame: “Masã tõnd miimi tɩ zĩn n sɩd tar yãmba. A Abrahaam ne Wẽnnaam no-rɛɛsdba kiimi, tɩ yãmb yaool n yetẽ tɩ ned sã n sak yãmb goama a kõn tol n ki abada ye. Yãmb yɩɩda tõnd ba a Abrahaam sẽn ki wã bɩ? Wẽnnaam no-rɛɛsdba me kiimi. Yãmb tẽedame tɩ yãmb yaa bõe?”

Yaa vẽeneg tɩ sõs-kãngã fãa pʋgẽ a Zezi sẽn da rat tɩ nin-kãensã bãng yaa tɩ yẽ la Mesi ning b sẽn kãabã. La a Zezi ka vẽneg fasɩ n wilg t’a yaa Mesi wã ye, a yeelame bala: “Mam sã n waoogd m menga, mam waoogra yaa zaalem. Yaa m Ba n waoogd maam, yãmb sẽn yet t’a soab yaa yãmb Wẽnnaamã. Yãmb ka mi bãmb ye. La mam mii bãmba. Mam sã n yeel tɩ mam ka mi bãmba, mam na n lebga ziri yagd wa yãmba.”

A Zezi leb n goma wẽn-sakd a Abrahaam yell n yeele: “Yãmb ba a Abrahaam da kɩdma ne sũ-noogo n dat n yã mam daarã. Bãmb yã-a lame n paam sũ-noogo.” Sɩda, ne tẽebo, a Abrahaam ra gẽegda Mesi wã b sẽn kãabã waoongo. Zʋɩf rãmbã ka tẽ a Zezi gomdã ye. B leokame: “Yãmb nan ka ta yʋʋm pis-nu nand n yaool n yetẽ tɩ yãmb yãa a Abrahaam?”

T’a Zezi leoke: “Mam yeta yãmb sɩd-sɩda tɩ mam beeme t’a Abrahaam nan ka rog ye.” Yaa vẽeneg t’a Zezi ra gomda a belem sẽn deng t’a yɩ ninsaalã yelle, a sẽn da yaa malɛk sẽn tar pãng n be saasẽ wã.

A Zezi sẽn yeel t’a sɩng n beeme t’a Abrahaam nan ka beẽ wã puuga Zʋɩf rãmbã sũyã, tɩ b nog kug n na n lob-a. La a Zezi lillame n yi wẽnd-doogẽ wã tɩ bũmb ka maan-a ye. Zã 8:37-59; Wilgri 3:14, NW; Wilgri 21:8.

▪ Wãn to la a Zezi wilg tɩ yẽ ne a bɛɛbã ka tar ba a yembre?

▪ Zʋɩf rãmbã sẽn bool a Zezi tɩ Samari neda võor yaa bõe?

▪ A Zezi ra rat n yeelame tɩ bõe, a sẽn yeel tɩ sẽn tũud-b yẽ wã ka na n tol n ki abada wã?