Sak 77

Rogem pʋɩɩr yelle

NEBA ra miimi t’a Zezi rɩta Fariziẽ wã zakẽ. Dẽ, neb tusa n da tigim yɩngã n gũud a Zezi yiibu. Fariziẽ rãmbã ra tugda beem ne a Zezi n baoodẽ t’a gom n tudg tɩ b yõk-a. La kʋʋngã ka wa bãmb ye, bãmb ra kelgda a Zezi ne naneb wʋsgo.

A Zezi ra reng n yeela a karen-biisã: “Gũus-y y mens ne Fariziẽ dãmba rabɩlle sẽn dat n togs tɩ b zãmbã.” Wa a Zezi sẽn da wilg rɩɩbã wakatã, Fariziẽ rãmbã tũudum ra pida ne zãmbo. Baa Fariziẽ rãmbã sã n solga b wẽnema n maand wa b yaa wẽn-zoɛtba, b bãong na n wa baas n pukame. A Zezi yeela woto: “Bũmb ka be sẽn ludi sẽn kõn puk ye, la bũmb ka be sẽn solge b sẽn kõn bãng ye.”

A Zezi sẽn da wa n tʋm tʋm-tʋmdb 12 wã tɩ b tɩ gilg n moon Galile wã, a ra togsa goam n keng b pelse. Masã, a leb n togsa gom-kãens n yɩlem, n yeele: “Ra zoe[-y] neb nins sẽn kʋʋd yĩnga n yaool n ka tõe n maan bũmb n paasa ye.” Wẽnnaam pa yĩmd baa yaa yir yɛng meng yell ye. Rẽ n so t’a Zezi kõ a karen-biisã bas-m-yam tɩ Wẽnnaam ka na n yĩm bãmb me yell ye. A yeelame: “B sã n tall yãmb n kẽng karen-dotẽ, walla tẽn-soaadba ne pãens rãmba taoore, . . . wakat kãng bala [vʋʋsem sõng] na n wilga yãmb y sẽn tog n yeele.”

Ned n zĩnd kʋʋngã sʋk n gome. Nin-kãng kosame: “Karen-saamba, bɩ y togs m ba-biiga t’a rɩk tõnd ba wã sẽn ki n bas bũmb ninga n pʋɩ n yãk m dẽnd n kõ-ma.” A Moiiz Tõogã ra yetame tɩ bi-kãsengã segd n paama pʋɩɩr a yiib a ba sẽn ki n basã pʋgẽ. Rẽnd no-koeemd ra ka segd n zĩndẽ ye, la wõnda rogem pʋɩɩrã pʋgẽ, rao wã ra rata sẽn yɩɩd b sẽn da segd n kõ-a wã.

Wa sẽn zemse, a Zezi zãgsame t’a kõn kẽ yellã pʋgẽ ye. A soka rao wã: “Daoa, ãnda n kõ maam noor tɩ m yɩ yãmb bʋ-kaooda walla te-pʋɩta?” Rẽ poore a kõo kʋʋngã sagl-kãngã sẽn tar yõod wʋsgã: “Bɩ y gũus y mens neere n da [yɩ rat-tɩ-loog rãmb] ye, tɩ bõe, ned ka tar vɩɩm a paoong sẽn yaa wʋsg yĩng ye.” N-ye, baa ninsaal sẽn wa n paam arzɛk wʋsg to-to fãa, a na n wa baas n kiimi n base. A Zezi tũnuga ne makr n wilg rẽ vẽenega. A leb n tũnuga ne mak kãng me n wilg tɩ ned sã n ka tõog n bao n tall yʋ-noog Wẽnnaam taoore, yaa yalemdo. A wilgame:

“Arzɛk soab a yembr pʋt n da sak sõama. La a tagsa a sũur pʋgẽ: Mam na n maana wãna? Tɩ bõe, mam ka tar zĩig sẽn na bĩng m kooda ye. Yẽ yeelame: Ad mam sẽn na n maan bũmb ninga. Mam na n wãa m bao wã n me sẽn yaa bɛd n yɩɩda. La m na n bĩnga m kooda ne mam teeda fãa bãmb pʋse. La m yeel m meng yaa: Mam tara paoong wʋsg sẽn bĩngi sẽn sek yʋʋm wʋsgo. Vʋʋse n dɩ la f yũ, la f maan sũ-noogo. La Wẽnnaam yeela yẽnda yaa: Yalma! yʋnga bala [b] na n deega fo sɩɩga. La fo sẽn segla na n yɩɩ ãnda rẽnda?”

A Zezi kʋʋ goama n yeele: “Yaa woto ne ned ninga sẽn bĩngd paoong a meng yĩnga, n yaool n ka tar Wẽnnaam arzɛgs ye.” Tõeeme tɩ karen-biisã ka lʋɩ arzɛgs bao n zama sẽn yaa yalemdã bẽdg pʋgẽ ye. Ne rẽ fãa, daar fãa vɩɩmã yɩɩr tõee nana-nana n kɩt tɩ b ka tũ a Zeova ne b sũur fãa ye. Dẽ, a Zezi tũnuga ne so-kãngã n leb n togs sagl-sõma a sẽn da kõ a tãng zug zãmsgã pʋgẽ yʋʋmd la pʋɩ-sʋk la woto wã. A wẽnemd n yeela a karen-biisã:

“Yaa woto yĩng n kɩt tɩ mam yeel yãmb tɩ y ra maan yɩɩr ne yãmb vɩɩma yell ye, yãmb sẽn na n dɩ bũmb ninga, wala y yĩnga yelle, y sẽn na n yeelg bũmb ninga ye. . . . Bɩ y ges gãabdo. Bãmb ka bʋta, la b ka tigsd ye, la bãmb ka tar bũmb bĩngr zĩiga wala baoor ye. La Wẽnnaam dɩlgda bãmba. . . . Bɩ y ges rulg-lɛlmã sẽn yɩ wãn n bɩtẽ. A ka tʋmda, la a ka wĩid lamd me ye, la baasgo, mam yeta yãmba t’a Salomo ne a naamã fãa, a ka tõog n maneg a meng n zeng rulg-lelemd a yembr ye. . . .

“La bɩ y ra maan yɩɩr n bao y sẽn na n dɩ la y sẽn na n yũ bũmb ninga ye, tɩ bõe, yaa dũniyã neb nins sẽn ka pʋʋsd Wẽnnaama n baood bõn-kãense. La yãmb Ba miimi tɩ yãmb data bõn-kãense. La sẽn yɩɩda, bɩ y bao Wẽnnaam [Rĩungã] tɩ Wẽnnaam na n kõo yãmb bõn-kãens fãa.”

Sẽn yɩɩd fãa yaa d sã n be naong pʋgẽ laogã wɛɛngẽ la d segd n ning a Zezi gom-kãensã d yamẽ sõma. Ned sã n maand yɩɩr ne laogã yɛl tɩ loog n sɩng n maagd tẽebã wɛɛngẽ, sɩd-sɩda, a ka wilgd t’a tẽedame tɩ Wẽnnaam tõe n gesa a sõgen dãmbã yell ye. Luk 12:1-31; Tõodo 21:17.

▪ Tõeeme tɩ yaa bõe n kɩt tɩ rao sok a Zezi yɛl rogem pʋɩɩrã wɛɛngẽ, la sagl-bʋg la a Zezi kõ-yã?

▪ Mak bʋg la a Zezi kõ-yã, la a võor yaa bõe?

▪ Sagl-bʋg la a Zezi leb n togs n yɩlem, la bõe yĩng tɩ zemse?