Sak 86

Biribl sẽn menem kɩbare

A ZEZI ra nan togsa Fariziẽ rãmbã makr a yiib sẽn tɩ loe ne pesg la wakɩ koɛɛng sẽn da menem tɩ b leb n yã. Rẽ poore, a Zezi leb n dɩka makr a to, sẽn gomd ba sẽn tar nonglem manesem ne a komdibli a yiib yelle. Biribl fãa ra beega wʋsgo.

B reng n goma yao wã yelle. Yẽ la kɩbarã yãoogo. A kosa a Ba wã t’a kõ-a a rogem pʋɩɩre, t’a ba wã rɩk n kɩs-a n pa bao goam ye. Rẽ poore, biigã yii zakẽ wã n tɩ tall vɩ-yook meng-menga. Kɩbarã pʋga, bɩ y ges y na bãng neb nins yell b sẽn gomdã sẽn makd b rãmba.

A Zezi sɩnga woto: “Dao a yembre n da tar komdibli a yiibu. La yao wa yeela a ba: M ba, pʋɩ paoongã n yãk m dẽnd n kõ-ma. La b ba wã pʋɩɩ a paoongã n kõ bãmba.” Bõe la yao wã rɩk bũmb nins b sẽn kõ-a wã n maane?

A Zezi wilgame: “La dasem bilfu, yaoa wʋka a rẽnd fãa n tog sore n kẽng tẽng sẽn zãra. La zĩ-kãnga, a sãama a paoongã ne tʋʋm-wẽns maanego.” Togs sɩda, a sãama a ligdã ne pʋg-yoaadba. Wa a Zezi sẽn leb n togsã, far n wa n wa kaoosg zugẽ:

“La yẽ sẽn sãam fãa kom kãseng kẽe tẽng kãnga, la naong sɩngame n yõk yẽnda. Yẽ noka tẽng kãng ned a yembre, la a tʋma yẽnda a pʋtẽ t’a tɩ gũ kurkuyã. La yẽ rata zãbne kurkuyã sẽn dɩtã n dɩ n pid a pʋga, la ned ka kõ yẽ ye.”

Sã n yaa ne Tõogã, kurkuy ra yaa rũm-dẽgdo. Dẽnd sẽn wa n yaa tɩlae t’a kɩɩm kurkuyã sɩd yaa zarbg menga! La sẽn da zabd biigã n yɩɩdã yaa kom kãseng sẽn kɩt t’a ra tʋll kurkuyã rɩɩb n dɩ wã menga. A Zezi yeelame tɩ yel-be-kãngã sẽn paam-a wã, “a zĩnd n tagsame.”

A Zezi kẽnga taoor ne a kɩbarã n yeele: “[A yeela a menga]: Mam ba tʋm-tʋmdb wʋsg tara rɩɩb tɩ sek n kelle, tɩ kom dat n kʋ maam ka. Mam na n yikame n kẽng m ba nengẽ n yeel bãmb yaa: M ba, mam beega Wẽnnaam ne yãmb me. Mam ka le tog n bool tɩ yãmb biig ye. Bɩ y ges maam wa y tʋm-tʋmd a yembre. La yẽ yikame n kẽng a ba wã nengẽ.”

Yãmb wee n tags n gese: Biigã sẽn da wa n yit yirã t’a ba wã sã n da yika a sũur ne-a bɩ a kãas-a-la raado, biiga ra ka na n bãng a sẽn na n maaneg vẽeneg woto ye. A ra tõeeme n yãk yam n na n leb a tẽngẽ wã n tɩ bao tʋʋm zĩig a to, sẽn na yɩl n da seg a ba wã ye. La tags-kãng ka wa a yamẽ ye. Ya a yirã bal la a rat n lebe!

Yaa vẽeneg t’a Zezi kɩbarã pʋgẽ, ba wã makda tõnd saasẽ Ba wã, sẽn yaa Wẽnnaam a Zeova, sẽn yaa nimbãan-zoɛt la a tar nonglmã. Sẽn paase, tõe tɩ y zoe n bãngame tɩ biribl sẽn menemã, bɩ laog-sãamdã makda b rãmb nins b sẽn mi wala yel-wẽn maandbã. Fariziẽ rãmbã a Zezi sẽn da gomd ne wã ra zoe n sãbga a Zezi, a sẽn da rɩt ne nin-kãensã wã yĩnga. La kẽemã yẽ ra makda ãnda?

Biribl sẽn menemã lebg n waame

Biriblã sẽn menemã, bɩ sẽn yaa laog sãamdã a Zezi makrã pʋgẽ wã sẽn lebg n wa a Ba wã zakẽ wã, wãn to la b reeg-a? Kelg-y a Zezi sẽn bilg rẽ to-to:

“La yẽ sẽn ket n be yɩɩga, a ba wã yãa yẽnda n zoe a nimbãanega n wudg n mobg-a n mok-a.” Ad yaa ba sẽn be yamleoog la sẽn tar nonglem, sẽn sɩd makd tõnd saasẽ Ba a Zeova sõma!

A ba wã ra tog n wʋmame t’a biriblã talla vɩ-yooko. Baasg zãnga a reeg-a-la a yira n ka yaas n bao gom-wogd ye. A Zezi me ra sakd n deegda nebã woto, n baood n na n sõs ne yel-wẽn-maandb la yõor yaood dɛɛgdba. Kɩbarã pʋgẽ bãmb la biribl sẽn yaa laog-sãamdã makda.

Sik sẽn kae, a Zezi kɩbarã pʋgẽ Ba wã sẽn yaa ned sẽn tagsdã bãngame t’a biigã teka yam, a sẽn da ne-a t’a wat ne sũ-sãangã yĩnga. La ba wã sẽn yãk yam n na n seg-a wã, kɩtame tɩ biigã tõe n vẽneg a yel-wẽnã n togs nana-nana n yɩɩda, wa a Zezi sẽn togsã: “Biiga yeela a ba yaa: M ba, mam beega Wẽnnaam ne yãmb me, mam ka le tog n bool tɩ yãmb biig ye. [Kɩt-y tɩ mam yɩ wala ned yãmb sẽn dɩk tʋʋmã].”

La biigã sẽn da nan ket n gomd bal la a ba wã sẽn kõ a yembsã noor n yeele: “Bɩ y kẽng tao-tao n tɩ bao fu-neer n wa yeelg-a. La y pid-a nug-bĩnga la y wĩd-a neooda. Yõk-y nag-bi-noabdga n wa kʋ n maan dɩɩb tɩ d dɩ n maan sũ-noogo. Tɩ bõe, mam biiga yãmb sẽn ne wã ra kiime, la a le vɩɩme yɛsa. Tɩ bõe, a rag n menemame, la mam yã-a lame.” Rẽ poore b sɩngame ‘n maand sũ-noogo.’

Wakat kãng tɩ ba wã “bi-kãsenga ra bee pʋʋgẽ.” Kelg-y kɩbarã baasg n ges y na tõog n bãng bi-kãsengã sẽn makd neb ninsi. A Zezi yeela bi-kãsengã wɛɛngẽ woto: “Yẽ sẽn wa n kolg yiri, a wʋma yʋʋmba ne warba saooga. Yẽ boola tʋm-tʋmd a ye n sok-a bõn-kãng võore. Tʋm-tʋm-kãng yeela yẽnda: Yãmb yaoa n wa tɩ y ba kʋ nag-bi-noabdga, b sẽn leb n yã yẽnda ne laafɩ wã yĩnga. Yẽ sũur puugame t’a ka sak n na n kẽ ye. La a ba yi n kosa yẽnda t’a kẽ. La yẽ leoka a ba yaa: Gese, yaa yʋʋm wʋsg la mam tʋmd ne yãmba n nan ka kɩɩs yãmb noor baa vugr ye. La yãmb nan ka kõ maam, baa bulla tɩ m maan sũ-noog ne m zo-rãmb ye. La yãmb biig ninga sẽn sãam-a yãmb paoongã ne pʋg-yoaadba sẽn wa, yãmb kʋʋ nag-bi-noabdg yẽ yĩnga.”

Wala bi-kãsengã, ãnda n sãbg a Zezi a sẽn da tall nimbãan-zoeer ne yel-wẽn-maandbã la a ges b yellã? Rag n pa gʋlsdbã la Fariziẽ rãmbã sɩda? Yaa b sẽn sãbg a Zezi a sẽn da reeg yel-wẽn-maandbã yĩngã n kɩt t’a togs kɩba-kãngã. Dẽnd yaa vẽeneg tɩ yaa bãmb la bi-kãsengã makda.

A Zezi baasa a kɩbarã ne ba wã sẽn yõk a bi-kãsengã sɛɛg n yeel-a woto wã: “M biiga, fo bee ne maam daar fãa, la mam sẽn tarã fãa yaa fo n so. La a zemsame tɩ tõnd maan sũ-noog n deem, tɩ bõe, fo yaoa ra kiimi, la a leb n paama a vɩɩm yɛsa. A ra menemame, la mam le yã-a lame.”

A Zezi ka yeel bi-kãsengã sẽn baas n maan bũmb ning ye. Sɩd me, kaoosg zugẽ, a Zezi sẽn wa n vʋʋgã poore, ‘maan-kʋʋdba wʋsg saka tẽeb kãnga,’ tõe tɩ ‘bi-kãsengã’ sull neb yell a Zezi sẽn gomd ka wã kẽer ra bee sʋka.

La tõnd wakatã, komdibli a yiibã makda ãnda? Tog n yaa b rãmb nins sẽn bãng a Zeova raabã tɩ sek b na tõog n tall zems-n-taar ne-a wã. Bi-kãsengã makda “bãg-bilã,” bɩ “kom-dẽems yʋy sẽn gʋls saasẽ wã tiging” neb kẽere. Nin-kãensã talla manesem sẽn yaa wa bi-kãsengã manesem. B rag n ka tʋll n sak tẽng zug sull neba, sẽn yaa ‘piis a taabã,’ bala b ra tagsdame tɩ b reegda bãmb zĩiga.

La biribl sẽn yaa laog sãamdã makda neb nins sẽn lak n bas Wẽnnaam nin-buiidã n na n tɩ bao yõ-noogr ning dũniyã sẽn kõtã. La tarẽ-n-tarẽ, nin-kãensã wat n teka yam n kos sugr n le lebg Wẽnnaam sõgen dãmb sẽn tar yẽesem. Sɩda, Ba wã sɩd wilgda nonglem la nimbãan-zoeer ne neb nins sẽn sak tɩ b rata sugr n na n lebg n wa a nengẽ wã! Luk 15:11-32; Maankʋʋre 11:7, 8; Tʋʋma 6:7; Luk 12:32, NW; Hebre dãmba 12:23, NW; Zã 10:16.

▪ Ãnd dãmb la a Zezi togs a kɩbarã, la bõe yĩnga?

▪ Ãnd soab la kɩbarã yãoogo, la bõe n paam-a?

▪ A Zezi wakatẽ nin-bʋs la ba wã la yao wã ra makda?

▪ Wãn to la a Zezi rɩk togs-n-taar ne ba sẽn yaa nimbãan-zoɛtã sẽn be makrã pʋgẽ wã?

▪ Bi-kãsengã ra tagsda wãn-wãn ne a yao wã reegre, la wãn to la Fariziẽ rãmbã ra maan wala bi-kãsengã?

▪ Rũndã-rũndã a Zezi kɩbarã võor yaa bõe?