Sak 88

Arzɛk soabã ne a Lazaar kɩbarã

A ZEZI ra sõsda ne a karen-biisã n wilgd b sẽn segd n dɩk arzɛgsã n tʋm tɩ zems to-to. A wilgame tɩ d ka tõe n yɩ arzɛgs yembs la d leb n yaa Wẽnnaam yembs ye. Fariziẽ rãmbã me ra kelgda a Zezi. La b sẽn yaa neb sẽn nong ligdã yĩngã b sɩngame n yaand a Zezi. Rẽ n so t’a Zezi yeel-ba: “Yãmb baoodame n na n yɩ tɩrs neba nifẽ, la Wẽnnaam mii yãmb sũyã, tɩ bõe, bũmb ninga neb sẽn pẽgda yaa bõn-põosg ne Wẽnnaam.”

Masã, wakat ra taame tɩ neb nins sẽn da tar-b dũniyã laogã, naamã, la tõog tũudmã wɛɛngẽ wã yɛl na n toeem n yɩ lebend ne b sẽn da yaa to-to pĩndã. B ra na n sika bãmba, la b zẽk neb nins sẽn sak tɩ tẽeb kom n tar-bã. A Zezi goma toeeng a woto yelle, a sẽn leb n yeel Fariziẽ rãmbã woto wã:

“Tõoga ne Wẽnnaam no-rɛɛsdba zĩndame hal tɩ ta [Lisd] a Zã wakate, la sẽn sɩng wakat kãnga Wẽnnaam [Rĩungã] koɛɛga moondame la ned kam fãa nangda pãnga n dat n kẽ. A yaa naana tɩ yĩngri la tẽnga looge n yɩɩda tɩ Tõog kargr a yembr sãam.”

Gʋlsdbã la Fariziẽ rãmbã ra yeta ne wuk-m-meng tɩ b tũuda a Moiiz Tõogã. Tẽeg-y tɩ wakat ning a Zezi sẽn da wa n puk zoang nin Zerizalɛma, b yeela woto ne wuk-m-menga: “Tõnd ya a Moiiz karen-biisi. Tõnd mi tɩ Wẽnnaam da goma ne a Moiizi.” La masã a Moiiz Tõogã pidsa a bõn-datla, sẽn yaa tees sik-m-mens rãmbã a Zezi Kirist sẽn yaa Rĩm ning Wẽnnaam sẽn yãkã nengẽ wã. Dẽ, a Zã moonegã sɩngr tɛka, neb buud fãa, sẽn yɩɩd fãa, naong rãmbã la sik-m-mens rãmbã nangda pãng n dat n lebg Wẽnnaam Rĩungã nin-buiidu.

A Moiiz Tõogã ra paamda pidsg masã. Dẽ, ra ka na n leb n yɩ tɩlae tɩ b tũ-a ye. Tõogã ra kõta sor tɩ b tõe n tik yɛl toɛy-toɛy zut n kao kãadem, la masã a Zezi yeelame: “Ned sã n bas a pag n dɩk a to, a maanda yoobo, la ned sã n dɩk pag ninga b sẽn digã, yẽ me maanda yoobo.” Ad no-kãensã a Zezi sẽn kõ wã sɩd kãba Fariziẽ rãmbã sũyã, sẽn yɩɩd fãa bãmb sẽn da tikd yɛl ka tɛk zut n kaood kãadmã yĩngã!

A Zezi leb n togsa Fariziẽ rãmbã kɩbar sẽn gomd neb a yiib yelle. Toeen-kãseng n wa n baas n zĩnd nin-kãensã vɩɩmã pʋgẽ. Y na n tõog n bãnga nin-kãensã sẽn makd neb ninsi, la b yɛlã toeeng võor bɩ?

A Zezi wilgame: “Arzɛk soab a yembre n da be sẽn yeelgd [lẽ fut la fu-mooma], la daar fãa yẽ paama bũmb fãa tɩ seke t’a vɩɩm yaa noog wʋsgo. Naong soab a Lazaar sẽn tar noad wʋsga ra gãeya arzɛk soaba zak noore. La a ra rata rɩ-zers sẽn lʋɩt arzɛk soaba taabl tẽngrã n dɩ, la baas wa n lelemda a noadã.”

A Zezi da rɩkda arzɛk soabã n makd ne Zʋɩf rãmbã tũudum taoor dãmba. Tũudum taoor dãmb kãens ra ka Fariziẽ rãmbã la gʋlsdbã bal ye, la Sadiseẽ rãmbã ne maan-kʋʋdba kãsem dãmb me ra naagame. B ra yaa rakãagb tẽebã taoor sobend wɛɛngẽ, la b manesmã ra yaa yembr ne arzɛk soabã manesem. B naam fu-moomã ra makda bãmb sẽn be taoorã, tɩ fu-pɛɛlgã makd b sẽn yaa tɩrs bãmb mens nifẽ wã.

Arzɛk soab kãngã sẽn makd b rãmbã sẽn yaa tɩta-nebã ra geta nin-buiidã sẽn yaa naong rãmbã ne pa-nandem, n tol n boond-b meng tɩ amhaarɛts, bɩ tẽn-tomã neba. Bõaas a Lazaar makda neb nins tũudmã taoor dãmb sẽn zãgs tɩ b kõn dɩlg sõma la tɩ b kõn kõ-b zu-nood tẽebã wɛɛngẽ wã. Dẽ, b ra paoogda nin-buiidã n get-b wa bãad dãmb tẽebã wɛɛngẽ, wala a Lazaar sẽn tar noad wʋsgã, n get-b wa neb sẽn zems ne tɩ naag baase. Baasg zãnga, tẽeb kom la ko-yũud n da tar a Lazaar sẽn makd b rãmbã, tɩ b ra be arzɛk soabã rig-noorẽ n baoodẽ tɩ b kõ-b tẽeb rɩ-bers sẽn dʋʋgd tẽngã.

Masã a Zezi bilga toeen-kãseng sẽn zĩnd arzɛk soabã la a Lazaar vɩɩmã pʋgẽ. Toeen-kãens la bʋse, la bõe la toeen-kãens makda?

Arzɛk soabã ne a Lazaar vɩɩmã toeengo

Arzɛk soabã makda tũudmã taoor dãmb sẽn tar zu-nood tẽebã wɛɛngẽ wã. La a Lazaar ra makda nin-buiidã tẽeb kom sẽn da tarã. A Zezi kẽnga taoor ne a kɩbarã, n bilg toeen-kãseng sẽn zĩnd nin-kãensã vɩɩmã pʋgẽ.

A Zezi yeelame: “La naong soaba wa n kiimi tɩ malɛk rãmb dɩk-a n kẽng zĩig ninga a Abrahaam sẽn be wã [a Abrahaam sɛɛgẽ]. La arzɛk soaba me wa n kiimi, tɩ b mum-a. La kɩɩm-kulug pʋgẽ yẽ tara namsg wʋsgo, la yẽ zẽka a neng n yã a Abrahaam sẽn be yɩɩga t’a Lazaar be [a sɛɛgẽ].”

Arzɛk soabã ne a Lazaar ka neb sɩd-sɩd ye, la b makda neb sula. Rẽ kɩtame tɩ d tõe me n yeel tɩ b kũumã yaa makre. Bõe la b kũuma makda?

A Zezi ra nan wilga paalem tɩ toeeng n zĩndi, n yeel tɩ ‘tõogã ne Wẽnnaam no-rɛɛsdba zĩndame hal tɩ ta Lisd a Zã wakate, la sẽn sɩng wakat kãnga Wẽnnaam Rĩungã moondame.’ Rẽnd ya a Zã ne a Zezi Kirist moonegã n wa ne arzɛk soabã ne a Lazaar kũumã, sẽn dat n yeel tɩ yɛlã toeema b vɩɩmã pʋgẽ masã.

A Lazaar sẽn makd neb ninsã yaa sik-m-mens rãmb sẽn tek yam n kos sugri. B kũuma yaa toeengo. B sẽn da be tẽeb kom ning pʋgẽ pĩndã, b lebga neb sẽn tar Wẽnnaam lohorem masã. Pĩnda b ra gũudame tɩ tũudmã taoor dãmb bas tẽeb rɩ-zers tɩ b paame, la masã sɩd ning sẽn be Gʋlsg Sõamyã pʋgẽ a Zezi sẽn kõ wã ra yiisda b tẽeba kom. Woto, b tall-b lame n taas a Abrahaam Kãsengã sẽn yaa Wẽnnaam a Zeova wã sɛɛgẽ, bɩ lohorem zĩigẽ.

La pa woto ne arzɛk soabã sẽn makd neb ninsã ye. B zãgsame tɩ b kõn sak Rĩungã koɛɛg a Zezi sẽn zãms nebã ye. Rẽ kɩtame tɩ b ki, sẽn dat n yeel tɩ sẽn da wõnd b tara lohormã, b kong-a-la zãnga. B pʋd n yeela ne makr goam tɩ b ra bee namsg pʋgẽ. Kelg-y arzɛk soabã masã:

“M ba a Abrahaam, zoe-y mam nimbãanega n tʋm a Lazaar t’a tẽk a nug-bil koomẽ n wa wʋlg mam zɩlemda tɩ bugma zabda maam wʋsgo.” Yaa Wẽnnaam bʋ-kaoor koees sẽn yõogd wa bugma a Zezi karen-biisã sẽn moonã n da namsd arzɛk soabã sẽn makd b rãmbã. B ra ratame tɩ karen-biisã maan zem-zem ne koe-kãens moonego, tɩ bãmb paam yolsg bilf ne b namsgã.

“A Abrahaam leoka yẽ yaa: M biiga, bɩ f bãng tɩ fo sẽn da be dũniyã zug wakate, fo paama bõn-sõama fãa la a Lazaar paama fare. La masã yẽ paamda belsgo la fo paamda toogo. La bũmb a to me, bog-kãsenga n be tõnd ne yãmb sʋka, hal tɩ neb nins sẽn dat n yi ka n kẽng yãmb nengẽ wã ka tõe ye, la neb nins sẽn dat n yi be n wa tõnd nengẽ wã me ka tõe ye.”

Ad sɩd zemsame tɩ toeen-kãseng woto zĩnd a Lazaar sẽn makd b rãmbã la arzɛk soabã sẽn makd b rãmbã sʋkã! Yɩɩ kiis a wãn poor yʋʋmd 33 Pãntekotẽ la toeengã zĩnd-yã. Yɩɩ wakat kãng la b ledg pĩnd Tõogã kaool ne kaool paalgã. Rẽ poore, ra lebga vẽeneg ne neba fãa tɩ ya a Zezi karen-biisã n tar Wẽnnaam lohorem, la pa Fariziẽ rãmbã la tũudum taoor dãmb a taabã ye. Dẽ, “bog-kãsenga” sẽn welgd makr wɛɛngẽ arzɛk soabã ne a Zezi karen-biisã yaa Wẽnnaam bʋ-kaoorã sẽn yaa tɩrgã la sẽn ka tõe n toeemã.

Rẽ poore, arzɛk soabã kosa “ba a Abrahaam” woto: “Tʋm[-y] a Lazaar mam ba-yirã, tɩ bõe, mam tara ba-bi-raop a nu.” Woto arzɛk soabã vẽneg n togsame t’a kĩi ne ba a to n yɩɩda, sẽn sɩd ya a Sʋɩtãanã. Arzɛk soabã ra kota a Lazaar t’a boog Wẽnnaam bʋ-kaoor koeesã toom sẽn na yɩl n da ning a “ba-bi-raop a nu” wã, sẽn yaa yẽ tẽed-n-taasã, “to-kãngã zĩigẽ” ye.

“A Abrahaam leokame: Bãmb tara a Moiiz ne Wẽnnaam no-rɛɛsdbã. Bɩ b kelg bãmba.” N-ye, “ba-bi-raop a nu” wã sã n dat n põs namsgã, b segdame n sak a Moiiz ne no-rɛɛsdbã gʋlsg sẽn wilgd t’a Zezi la Mesi wã, la b lebg a karen-biisi. La arzɛk soabã kɩɩsame n yeele: “M ba a Abrahaam, woto ka sek ye, ned sã n vʋʋg n kẽng bãmb nengẽ, bãmb yam na tek tɩ b kos sugri.”

La a leok-a lame: “Bãmb sã n ka kelg a Moiiz ne Wẽnnaam no-rɛɛsdbã, baa ned sã n vʋʋg n kẽng bãmb nengẽ, bãmb kõn deeg ye.” Wẽnnaam ka na n maan bãn bɩ yel-solem bɛd sẽn na yɩl n kɩt tɩ neba tẽ ye. Neba sã n dat n paam a lohorem, b tog n karma Gʋlsg Sõamyã la b tũ-ba. Luk 16:14-31; Zã 9:28, 29; Matɩe 19:3-9; Galat dãmb 3:24; Kolos rãmb 2:14; Zã 8:44.

▪ Bõe yĩng tɩ arzɛk soabã la a Lazaar kũuma ra tog n yaa makr bala, la bõe la b kũuma ra makda?

▪ A Zezi yeelame t’a Zã moonegã sɩngr tɛka toeen-bʋg n zĩndi?

▪ A Zezi kũumã poore, bõe n da ka na n leb n yɩ tɩlae tɩ b tũ, la toeen-bʋg la rẽ na n wa ne kãadem kaoobã wɛɛngẽ?

▪ A Zezi makrã pʋgẽ, ãnda la arzɛk soabã la a Lazaar makda?

▪ Namsg ning arzɛk soabã sẽn paamã yaa bõe, la a ra kotame tɩ b maan bõe n yols-a?

▪ “Bog-kãsenga” makda bõe?

▪ Arzɛk soabã ba meng-meng yaa ãnda, la ãnda rãmb la a ba-biis a nu wã?