Sak 89

Nimbãan-zoeer tʋʋmd Zide

SEMEN a wãn sẽn looge, Zʋɩf rãmbã ra makame n na n kʋ a Zezi Rɩk-n-kõ kibsã wakat Zerizalɛm. Dẽ a kẽnga rɩtg babgã, zĩig sẽn ka zãr ne Galile Mogrã.

Sẽn pa kaoos pʋgẽ, a ra leb n teesda goabga, Zerizalɛm sẽnẽ. Sorã zugu, a ra moonda Peere sẽn be Zʋrdẽ Kʋɩlgã yaangã tẽn-bõonegẽ. A ra nan togsa arzɛk soabã ne a Lazaar kɩbarã paalem. Rẽ poore, a kell n zãmsa a karen-biisã yɛl a sẽn da zoe n zãms-b a sẽn da wa n be Galile wã.

Wala makre, a yeelame tɩ “b sã n loe [ned] kokor ne pĩig kugri n lob-a ko-kãsenga pʋgẽ” n são a sẽn na n maan tɩ Wẽnnaam “kom-bõoneg kãensa ned a ye” lʋɩ. A leb n wilga vẽeneg tɩ d segd n yɩɩ sugr kõatba, n wilg woto: “Fo ba-biig sã n beeg foo naoor a yopoe daar a yembr pʋgẽ, la a sã n wa fo nengẽ naoor a yopoe n yeel t’a kota sugri, bɩ f kõ-a sugri.”

Karen-biisã kosa a Zezi: “Bɩ y paas tõnd tẽebo,” t’a Zezi leoke: “Yãmb sã n tar tẽeb wa siil biiga, yãmb tõe n yeela womsɛɛg kãngã: Bɩ f vik n tɩ yals ko-kãsenga pʋgẽ, la a na n saka yãmba.” Woto, tẽeb bilf tõe n maana bõn-kãsemse.

Rẽ poore, a togsa kɩbar sẽn tik daar fãa vɩɩmã yɛl zutu, sẽn wilgd Wẽnnaam Sẽn-tõeyã-fãa wã sõgen manesem sẽn segd n yɩ a soaba. A Zezi yeelame: “Ãnda n be yãmb sʋka n tar tʋm-tʋmd sẽn kooda wala sẽn gũud rũmsi, t’a yi weoogẽ n wa t’a yeel-a: Wa zĩnd tao-tao n dɩ? Yẽ na n yeel-a lame: Segl dɩɩb yʋngã n sẽbg f sɛɛg n kõ maam dɩɩb tɩ m dɩ la m yũ, tɩ fo yaool n dɩ la f yũ. Yẽ na n pʋʋsa tʋm-tʋmd kãng barka a sẽn maan bũmb nins yẽ sẽn togs-a t’a maana bɩ? Yaa woto ne yãmb me yãmb sã n maan bũmb nins fãa b sẽn yeel yãmb tɩ y maana n sɛ, bɩ y yeele: Tõnd yaa tʋm-tʋmdb sẽn ka yõodo. Tõnd maana tʋʋmd ning d sẽn tog n maana bala.” Dẽ, Wẽnnaam sõgen dãmbã ka segd n tags tɩ b sẽn balemd Wẽnnaamã b maand-a-la yel-sõmd abada. La wakat fãa b segd n tẽegame tɩ b sẽn balemd-a t’a get-b wa a zak neb a sẽn tar bas-yard ne wã, yaa zu-zẽkr n kõ-ba.

Wõnda a Zezi sẽn togs kɩba-kãngã poor bilfu, koe-taasd n wa. Ya a Lazaar tãop a Maari ne a Mart sẽn be Betani sẽn be Zide soolmẽ wã n tʋm-a. Koe-taasdã togsa woto: “Zusoaba, ges-y-yã, yãmb sẽn nong a soaba ka keem ye.”

A Zezi leokame: “Bã-kãng kõn yɩ a yõor ye, a yaa Wẽnnaam waoogr yĩnga, tɩ Wẽnnaam Biiga na n paam waoogr ne bõn-kãnga.” A Zezi kell n paa a sẽn da beẽ wã rasem a yiibu. Rẽ poore a yeela a karen-biisã: “Wa-y tɩ d lebg n kẽng Zide.” La a karen-biisã tẽeg-a lame: “Karensaamba, Zʋɩf rãmba da baooda yãmb n na n lob ne kug mas-masã bala, tɩ yãmb dat n le leb be?”

T’a Zezi leok-ba: “Yibeoog [n] tɩ ta zaabr ka lɛɛr-dãmb piig la a yiibu? Ned sã n kẽnd wĩndga, a ka lagsd ye, bala, a nee dũni kãngã vẽenemã. La ned sã n kẽnd yʋngo, a lagsdame, bala, vẽenem ka be yẽ pʋgẽ ye.”—Kãab-paalgã Koe-noogo.

Wõnda a Zezi ra rat n yeelame tɩ ‘yibeoog n tɩ ta zaabr lɛɛr dãmbã,’ bɩ wakat ning Wẽnnaam sẽn yãk a Zezi tẽng zug tʋʋmdã yĩngã ra nan ka sa ye. La hal tɩ wakat kãng wa sa, ned ba a yembr ka tõe n maan-a wẽng ye. A Zezi segd n dɩka ‘yibeoog n tɩ ta zaabrã,’ sẽn yaa wakat koɛɛgã sẽn ket a yĩngã n tʋm sõma wa a sẽn tõe tɛka. Bala rẽ poore ‘yʋngã’ na n waame, sẽn yaa sasa ning a bɛɛbã sẽn na n wa kʋ-a wã.

A Zezi paasame: “Tõnd zoa a Lazaar gõeeme. La mam na n kẽng n tɩ neka yẽnda.”

Karen-biisã ra tagsdame t’a Lazaar gõeeme n vʋʋsdẽ, tɩ woto yaa bũmb sẽn wilgd t’a bãagã na n sãoogame, tɩ b yeele: “Zusoaba, yẽ sã n gõe, a na n yikame.”

Rẽ a Zezi togs-b-la vẽenega: “A Lazaar kiimi. La mam sũur yaa noog yãmb yĩnga mam sẽn ka zĩnd be wã yĩnga, tɩ yãmb tõe n tẽ. D kẽng yẽ nengẽ.”

A Toma ra miimi tɩ b tõe n kʋʋ a Zezi Zide, la a sẽn da rat n teel-a wã yĩngã, a yeela a karen-bi-taasã: “Wa-y tɩ d kẽng n tɩ naag n ki.” Woto karen-biisã gẽnega b yõy n yãag a Zezi a nimbãan-zoeer tʋʋm-kãngã pʋgẽ Zide. Luk 13:22; 17:1-10; Zã 10:22, 31, 40-42; 11:1-16.

▪ Sẽn pa kaoos pʋgẽ, yɛ la a Zezi ra moonda?

▪ Zãms-bʋs la a Zezi leb n togs n yɩlem, la yel-bʋg sẽn tik daar fãa vɩɩmã yɛl zut la a bilg-yã, sẽn na yɩl n mak bõe?

▪ B wa n taasa a Zezi kɩba-bʋgo, la a rat n yeelame tɩ bõe, a sẽn gom ‘yibeoog n tɩ ta zaabr’ la ‘yʋngã’ yellã?

▪ A Toma ra rat n yeelame tɩ bõe, a sẽn yeel tɩ b ‘wa tɩ b kẽng n tɩ naag-a n ki’ wã?