Sak 92
Wãoob piig sẽn paam sãoogr a Zezi yaoolem Zerizalɛm kẽndã wakate
SẼN na yɩl n põs Sãnedrẽ wã neb sẽn da rat n kʋ-a wã, a Zezi yii Zerizalɛm n kẽng Efrayim tẽnga. Efrayim ra bee Zerizalɛm rɩtg sẽnese, tõe tɩ kolga kɩlometr 25 ne Zerizalɛm. A paa be ne a karen-biisã, n zãag ne a bɛɛbã.
La yʋʋmd 33 Pakã sẽn da kolgdã, a Zezi leb n dɩka sore. A pasga Samari n kẽng Galile. Rẽ n ya a yaoolem waoong bab-kãngã pʋgẽ, sẽn deng a kũumã. A sẽn ta Galile, yẽ ne a karen-biisã tɩ lagma ne neb a taab sẽn da rebd Zerizalɛm Pakã yĩnga. B rɩka sor ning sẽn pasgd Peere soolmã, sẽn yaa Zʋrdẽ Kʋɩlgã yaangã.
B so-toakã sɩngrẽ, a Zezi sẽn da wa n kẽed Samari bɩ Galile tẽn-bil a yembrẽ, wãoob piig n wa n seg-a. Bã-wẽng kãngã rɩta neda yĩng bilf-bilfu: a soabã nus-bi, a nao-bi, a tʋba, a yõore, la a no-bɩmse. Sẽn na yɩl tɩ bãagã ra wa long neb a taabã, Wẽnnaam Tõogã ra yeta wãoobã wɛɛngẽ: “A lud a no-kõbdo. La bɩ a yeel tɩ: ‘Rẽgdo! Rẽgdo!’ La yẽ na n yɩɩ rẽgd a bãaga tɛk fãa. La bɩ a zĩnd toor sika zĩig yɩnga.”
Wãoob piigã tũu Wẽnnaam Tõogã sẽn yeel bũmb ning wãoobã wɛɛngẽ wã, n yals yɩɩga. La b ra zẽka b koees n kaasd woto: “Zezi, Zusoaba, bɩ y zoe tõnd nimbãanega!”
A Zezi sẽn tool n yã-bã, a kõ-b-la noor n yeele: “Kẽng n wilg-y maan-kʋʋdbã yãmb mense.” A Zezi yeela woto, bala Wẽnnaam Tõogã ra kõta maan-kʋʋdbã sor tɩ b togs tɩ wãoor sãoogame n yaa yɩlemde. Woto b tõe n sakame tɩ nin-kãensã leb n kẽ neb a taabã sẽn tar laafɩ wã sʋka.
Wãoob piigã sɩd talla bas-yard t’a Zezi tõe n maana yel-soalmã. Ne b sẽn da nan ka paam sãoogrã, b looga tao-tao n na n tɩ yã maan-kʋʋdbã. Sorã zugu, b paama keoor b sẽn tẽ a Zezi wã. B sɩngame n neẽ tɩ b bãagã sãoogame!
Wãoob a wɛ wã sẽn sãoogã kell n loogame. La wãoor a to wã sẽn yaa Samari nedã lebg n waa a Zezi nengẽ. Tɩ bõe? Bala a ra tara mi-beoog wʋsg a sẽn paam sãoogrã yĩnga. A zẽka a koɛɛg n pẽg Wẽnnaam. La a sẽn yã a Zezi wã, a wõgemda a taoor n pʋʋs-a barka.
A Zezi leokame: “Ka bãmb piig n paam maagra la? La neb a wɛ wã bee yɛ? Yaa sãan-kãngã bal n lebg n wa n na n kõ Wẽnnaam waoogr bɩ?”
Rẽ poore a yeela Samari nedã: “Yik n kẽnge, fo tẽeb n maag foom.”
Tõnd sẽn karem a Zezi sẽn sãoog wãoob piigã kɩbarã, d segd n ninga zãmsg ning a Zezi sok-kãngã sẽn tarã d yamẽ: “La neb a wɛ wã bee yɛ?” Zɩ-beoog ning neb a wɛ wã sẽn tallã yaa kongr sẽn yaa kãsenga. Rẽ yĩnga, tõnd me na n maana wala Samari neda, n wilg d mi-beoog ne Wẽnnaam, bũmb nins a sẽn kõt tõndã yĩnga, wala makre, vɩɩm sẽn-kõn-sa Wẽnnaam dũni paalgã sẽn yaa tɩrgã pʋgẽ saagr sẽn yaa waazibã bɩ? Zã 11:54, 55; Luk 17:11-19; Maankʋʋre 13:16, 17, 45, 46; Wilgri 21:3, 4.
▪ Wãn to la a Zezi maan tɩ b sẽn da baood n na n kʋ-a wã ka tõoge?
▪ Yɛ la a Zezi tũ-yã, la zĩ-bʋg la a ra rebda?
▪ Bõe yĩng tɩ wãoobã yals yɩɩga, la bõe yĩng t’a Zezi yeel-b tɩ b kẽng maan-kʋʋdbã nengẽ?
▪ Bõe la yel-kãngã segd n zãms tõndo?