Sak 93

Ninsaal Biriblã sã n wa puki

A ZEZI ra ket n bee rɩtg babgã (Samari bɩ Galile). Yɩɩ wakat kãng la Fariziẽ rãmbã sok a Zezi Rĩungã waoong yelle. B ra tẽedame tɩ Rĩungã na n waa ne ziir tɩ neba fãa yã a pukrã vẽenega, la a Zezi yeelame: “Wẽnnaam [Rĩungã] waoong ka bãngd ne nin gesg ye. B kõn tol n yeel tɩ Wẽnnaam [Rĩungã] bee ka walla a bee ka sẽnẽ ye. Tɩ bõe, Wẽnnaam [Rĩungã] bee yãmb sʋka.”

A Zezi goam nins b sẽn lebg ka ne moor tɩ “bee yãmb sʋka” Biibl kẽer lebgame tɩ “bee yãmb pʋse.” Rẽ kɩtame tɩ neb kẽer tags t’a Zezi ra rat n yeelame tɩ Wẽnnaam Rĩungã rɩta naam a sõgen dãmbã sũyẽ. La ra yaa vẽeneg tɩ Wẽnnaam Rĩungã ka be Fariziẽ kãensã sẽn ka tẽebã, a Zezi sẽn gomd ne wã sũyẽ ye. La a ra bee bãmb sʋka, bala a Zezi Kirist Wẽnnaam sẽn yãk t’a yɩ a Rĩungã rĩma ra yasa bãmb sʋka.

Tõeeme tɩ yaa Fariziẽ rãmbã loogr poor la a Zezi leb n gom ne a karen-biisã Rĩungã waoong yelle. Sẽn da be a Zezi yamẽ n yɩɩd ra ya a sẽn na n wa be a Rĩungã naamẽ beoog daarã. Yaa rẽ yĩng la a sẽn keoog-b woto wã: “B na n yeela yãmb tɩ b bee ka, walla b bee ka sẽnẽ. Da kẽng-y ye, la ra tũ-y [ziri Mesi kãens] ye. Tɩ bõe, a wa sa-yãgb sẽn yit yĩngr zĩig a yembre n yãgd n tɩ ta zĩig a to wã, Ninsaal Biiga na n yɩɩ woto me bãmb daarã.” Dẽ, a Zezi ra wilgdame tɩ wala neb sẽn tõe n zĩnd zĩ-zãrsẽ n yã sa-yãgbã, woto me yẽ sẽn na n wa be a Rĩungã naamẽ wã kaset na n yɩɩ vẽeneg ne b rãmb nins fãa sẽn tʋll n yã rẽ wã.

Rẽ poore, a Zezi rɩka makr ne yɛl sẽn zĩnd pĩnda, n wilg manesem ning nebã sẽn na n wa talle, a sã n wa be a naamẽ wã beoog-daare. A wilgame: “Bũmb ninga sẽn zĩnd a Nowe wakata na n zĩnda Ninsaal Biiga wakat me. . . . Bũmb ninga sẽn zĩnd a Lot wakata me na n zĩndame. Neb ra rɩtame la b yũuda, b ra raadame la b koosdẽ, b ra bʋtame la b metẽ. La a Lot sẽn yi Sodom daare, bugum ne kidbr yii yĩngri n ni wa saag n sãam bãmb fãa. A na n yɩɩ woto me daar ninga Ninsaal Biiga sẽn na n pukã.”

A Zezi ra ka rat n yeel tɩ b sãama a Nowe ne a Lot wakatẽ nebã b sẽn da rɩte, n yũuda, n daad la b koosd teedã, n bʋtẽ, la b metẽ wã ye. Ba a Nowe ne a Lot ne b zagsã neb maana bõn-kãense. La yaa bõn-kãens maaneg n da pak neb a taabã tɩ b toog yaool n kae ne Wẽnnaam daabã ye. Yaa rẽ yĩng la b sẽn da sãam-bã. Leb n na n yɩɩ rẽ yĩng la b na n sãam neba, Kirist sã n wa puk to-kãsengã sẽn na n wa zãmaan-kãngã zugã sasa.

Sẽn na yɩl n wilg vẽeneg tɩ tara yõod tɩ neba yɩ tao-tao n sak Wẽnnaam b sã n yã kaset ning sẽn wilgd tɩ yẽ bee a Rĩungã naamẽ wã, a Zezi paasame: “Baraare ned ninga sẽn be roog zug t’a teed be roog pʋgẽ, bɩ a ra sig n dɩk ye. La ned ninga sẽn be pʋʋgẽ, bɩ yẽ ra leb poorẽ ye. Bɩ y tẽeg a Lot paga yelle.”

Kaset sã n wa wilg tɩ Kiristã bee a naamẽ wã, neba ka segd n bas tɩ b arzɛgsã nonglem kɩt tɩ b maan yood-yood n ka sak Wẽnnaam ye. Yaa wala a Lot pagã sẽn da wa n yit Sodomã, a sũurã ra tʋlla bũmb nins a sẽn bas poorẽ wã t’a wẽnemd n ges a poorẽ, la a lebga kugri.

A Zezi leb n bilga yɛl nins sẽn na n zĩnd a sã n wa be a Rĩungã naamẽ wã, n togs a karen-biisã: “Baraar yʋngo, neb a yiib sẽn gãe gãag a yembre, b na n dɩka a yembre la b bas a yembre. La pagb a yiib sẽn werd neerẽ, b na rɩk a yembre n bas a yembre.”

Rɩkrã zemsa ne a Nowe la a zakã rãmb sẽn kẽ koglgẽ wã, la ne malɛgsã sẽn peeg a Lot ne a zakã rãmb n yi Sodomã. Rɩkrã rat n yeelame tɩ fãagre, tɩ basgã rat n yeel tɩ sãoongo.

Zĩ-kãngã karen-biisã sok-a lame: “Yaa zĩ-bʋgo, Zusoaba?”

T’a Zezi leoke: “Dɩgr sẽn be zĩig ninga, yɩbrd tigimda zĩ-kãnga.” B rãmb nins b sẽn ‘dɩk’ tɩ b na n paam fãagrã yaa wala yɩbrd nin sẽn ne zĩ-zãrgẽ, b sẽn tigimd taab ‘dɩgrẽ’ wã yĩnga. Dɩgrã tɩ loee ne Kirist hakɩkã sẽn na n wa be a Rĩungã naamẽ tɩ neb nin ka neẽ wã, la ne tẽeb rɩɩb wʋsgã a Zeova sẽn kõtã. Luk 17:20-37; Sɩngre 19:26.

▪ Wãn-wãn la Rĩungã ra be Fariziẽ rãmbã sʋka?

▪ Wãn to la Kiristã sẽn na n wa be a Rĩungã naamẽ wã yaa wa sa-yãgbo?

▪ Bõe yĩng tɩ b na n sãam neb b tʋʋma yĩng Kirist sẽn wat n be a naamẽ wã sasa?

▪ Rɩkrã la basgã võor yaa bõe?